Isniin, Maarso 10, 2014 (HOL) —
Ra’iisul wasaaraha Soomaaliya, C/weli Sheekh Axmed Maxamed ayaa xalay kulan
ballaaran la qaatay saraakiisha ciidanka Qalabka sida ee dowladda Soomaaliya
iyo ciidamada AMISOM, isagoo ugu hambalyeeyay guulaha ay kasoo hooyeen howlgallada
ka socda qeybo ka tirsan gobollada Bakool iyo Gedo, kuwaasoo kooxaha uu sheegay
in Al-shabaab looga sifeynayay magaalooyinka kala ah: Xudur, Waajid, Rab-dhuure
iyo Buur-dhuubo.
Kulanka oo ka dhacay xarunta guddiga
Wadajirka ee xiriirinta howlgallada (Joint Operations Coordination Center) ayaa
waxaa sidoo kale ka qaybgalay wasiirrada gaashaandhigga iyo amniga Qaranka,
waxayna laga dhegeystay warbixinno ku aaddan howlgallada ka socda gobollada dalka
qaarkood.
Gaba-gabadii kulanka ayaa ra’iisul
wasaare Cabdiweli Sheekh wuxuu faahfaahin ka siiyay warbaahinta kulanka uu la
yeeshay saraakiisha, isagoo xusay inuu ciidanka xoogga dalka iyo kuwa AMISOM ugu
hambalyeeyay geesinimadii ay muujiyeen iyo sida ay cadowga uga fara maroojiyeen
degaanno ay ka mid yihiin: Xudur, Waajid, Rab-dhuure iyo Buur-dhuubo oo ka kala
tirsan gobolada Bakool iyo Gedo.
“Shacabka Soomaaliyeed waxaan u
sheegayaa in cadowgoodii sii daciifayo, ayna meesha ka baxday awoodoodoodii mid
dhaqaale iyo mid niyadadeedba, ayna ku jiraan maalmahoodii ugu dambeeyay,” ayuu
yiri ra’iisul wasaaraha oo tilmaamay in shacabka ku nool degaannada laga saaray
Al-shabaab ay soo dhaweeyaan ciidanka xoogga iyo kuwa garabka siinaya ee
AMISOM, lana shaqeeyaan.
Mudane C/weli oo sii hadlayay
ayaa yiri: “Sababta Al-shabaab degaannadan looga saarayo waxaa weeye si looga
dul-qaado shacabka Soomaaliyeed caburinta ay ku hayaan mar walba, sida: dilka,
bara-kicinta iyo handadaadda.”
Ra’iisul wasaaraha ayaa xusay
in xukuumadda Soomaaliya ay ka shaqeyneyso sidii gargaar bani’aadamnimo loo
gaarsiin lahaa degaannadaas, ayna sidoo kale u heli lahaayeen adeegyadii aasaasiga
ahaa sida waxbarashada iyo caafimaadka.
Dhanka kale, ra’iisul wasaaruhu
wuxuu baaq u jeediyay dhallinyarada u dagaalanta Al-shabaab, wuxuuna ka
codsaday inay ka waantoobaan falalka liddiga ku ah diinta Islaamka iyo dhaqanka
suuban, bulshadoodana kusoo laabtaan, isagoo u ballan-qaaday in dowladdu ay ku
dadaali doonto inay helaan waxbarasho iyo farsamooyin ay ku dabbaraan
noloshooda.
Maxamed X. Xuseen, Hiiraan
Online
[email protected]
Muqdisho, Soomaaliya