Sabti, Janaayo 04, 2014 (HOL) —Xarunta Golaha baarlamaanka Puntland ee magaalada Garoowe waxaa weli ka socota doorashada guddoonka sare ee baarlamaanka Puntland.
Xildhibaanada baarlamaanka ayaa mar dhow doortay guddoomiye ku-xigeenka koowaad ee Golaha Wakillada, xilkaasoo ay shan xildhibaan u tartameen.
Xildhibaanada u tartamay xilka guddoomiye ku-xigeenka 1-aad ee baarlamaanka Puntland ayaa ayaa kala ahaa:
1. Salaad Xareed Cali
2. C/risaaq Siciid Ibraahim
3. C/xamiid Sh. C/salaan
4. C/qaadir C/salaan Maxamuud
5. C/casiis Siciid Gacmey
Xildhibaan C/xamiid Sheekh C/salaam ayaa ku guuleystey xilka guddoomiye ku-xigeenka 1-aad ee golaha wakiillada kaddib markii uu helay 40 kamid ah codadka 66-da xildhibaan ee Baarlamaanka Puntland uu ka kooban yahay.
Murashaxiinta kale ee ay tartamayeen oo gudoomiye ku-xigeenkii hore ee Baarlamaanka Puntland Salaad Xareed Cali uu kamid ahaa ayaa helay codad aad u yar. Guddoomiyaha cusub oo si kooban u hadlay ayaa u mahadceliyey xildhibaanada codkooda siiyey.
Xilligan waxaa socota doorashada guddoomiye ku-xigeenka labaad ee Golaha, xilkaasoo ay u tartamayaan labada murashax ee kala ah: Xuseen Yaasiin Diiriye iyo Cabdixakiin Macallin Daahir.
Wararka doorashada wixii ka socda dib ayaan idiinka soo gudbin doonnaa...
Maxamed Salaad Xaaji Dirir, Hiiraan Online
[email protected]
Garoowe, Soomaaliya