3/7/2021
Today from Hiiraan Online:  _
Wararka Maanta- Khamiis, Jan 23, 2014
Munaasabad xalay loo sameeyay Xubnaha baarlamaanka (SAWIRRO)



Khamiis, Janaayo 23, 2014 (HOL) — Munaasabad casho sharaf ah oo qayb ka ahayd xiritaanka Kalfadhiga saddexaad ee golaha shacabka ayaa xalay lagu qabtay xarunta Villa Hargeysa ee magaalada Muqdisho.

Munaasabadda ayaa loo sameeyay xidhibaannada baarlamaanka Soomaaliya iyadoo ay ka qaybgaleen madaxweynaha Soomaaliya, ra’iisul wasaaraha, golaha wasiirrada, xildhibaannada, taliyeyaasha ciidamada, howlwadeennada iyo guddoomiyaha maxkamadda sare.

Billowgii munaasabadda ayaa waxaa ka hadlay xildhibaanno ka sheekeeyay marxaladihii uu baarlamaanku soo maray intii lagu jiray kalfadhigii saddexaad, waxayna uga mahad-celiyeen gudoomiyaha baarlamaanka casho sharafta uu u sameeyay.

Wasiirka warfaafinta, Mustaf Sheekh Cali Dhuxuloow iyo wasiirada haweenka Khadiijo Maxamed Diiriye oo iyaguna khudbaddo kooban ka jeediyay ayaa u mahad-celiyay xIldhibaannada iyo guddoonka baarlamaanka waxayna ku boorriyeen xildhibaannada inay joogteeyaan la xisaabtanka xukuumadda.

HALKAN KA DAAWO SAWIRRO BADAN:

Ra’iisul wasaaraha Soomaaliya, C/weli Sheekh Axmed Maxamed oo isaguna hadal kooban ka jeediyay munaasabadda ayaa mahad-celin iyo hambalyeyn u jeediyay baarlamaanka isagoo sheegay in wax lagu farxo ay tahay sida uu baarlamaanku howlihiisa u wato, wuxuuna sidoo kale ka hadlay tallooyin ay xildhibaannadu soo jeediyeen oo u badnaa qorshaha xukuumadda, isagoo ka ballanqaaday goobta inuu ka dhabeyn doono qorshihii uu soo bandhigay.

Guddoomiyaha maxkamadda sare ee dalka, garyaqaan Ceydiid Cabdullaahi Ilka-xanaf oo isaguna khudbad kooban ka jeediyay munaasabadda ayaa xusay inuu aad ugu riyaaqay sida tooska ah ee ay xildhibaannadu u kaftamayeen isla markaana ay isugu soo bandhigayeen dhaliillaha jira; iasgoo ku guubaabiyay xukuumadda iyo baarlamaankaba inay hirgeliyaan isla xisaabtanka ee ay ballan-qaadeen xukuumadda iyo baarlamaanka.

Guddoomiyaha baarlamaanka, Maxamed Sheekh Cusmaan Jawaari oo isna hadal ka jeediyay xiritaankii munaasabadda ayaa u mahad-celiyay dhammaan xildhibaannada, wuxuuna u rajeeyay muddada fasaxa ay ku jiraan inay si dhab ah u soo ogaadaan baahida ay qabaan shacabka ay metelaan ee ku dhaqan gobollada iyo degmooyinka dalka.

Munaasabadda ayaa kusoo dhammaatay jawi farxad iyo isku hambalyeyn, waxaa intii ay socotay suugaan wadani ah iyo majaajilooyin ka qosliyay dhammaan ka qeybgalayaasha kusoo bandhigay fanaaniinta hobollada Waaberi.

Maxamed X. Xuseen, Hiiraan Online
[email protected]
Muqdisho, Soomaaliya













Click here
1/23/2014 12:30 PM EST
Khamiis, Janaayo 23, 2014 (HOL) — Madaxweyne xilliyeedkii u dambeeyay ee maamulka Khaatumo, C/nuur Cilmi Qaaje (Biindhe) ayaa shaaciyay inay ku faraxsan yihiin maamulka cusub ee loo doortay Puntland, wuxuuna xusay inay noqon karaan kuwo horumar u horseeda maamulkaas.

1/23/2014 11:00 AM EST
Khamiis, Janaayo 23, 2014 (HOL) — Kooxo hubeysan oo aan haybtooda la garanayn ayaa ku dilay maanta duleedka magaalada Qaahira ee xarunta Masar shan ka mid ah askarta booliiska dalkaas, iyagoo weerarka six un ugu dhaawacay laba askari oo kale.

1/23/2014 10:52 AM EST
Khamiis, Janaayo 23, 2014 (HOL) — Hay’adda Hormuud Foundation ayaa maanta ugu deeqday isbitaalka Dayniile ee Muqdisho 30-fuusto oo shidaal ah si howlaha isbitaalka loogu sii wado.

1/23/2014 10:40 AM EST
Khamiis, Janaayo 23, 2014 (HOL) — Culummaa’uddiinka Ahlusunna Waljamaaca ayaa kulan lagu taageerayo ka mid noqoashada ciidamada dalka Itoobiya ay ka mid noqdeen AMISOM ku qabtay maanta magaalada Baydhabo ee xarunta gobolka Bay.

1/23/2014 10:20 AM EST
Khamiis, Janaayo 23, 2014 (HOL) — Wafdiyo ka socda maamulka KMG Jubba iyo dalka Jabuuti oo ay kala hoggaaminayaan madaxweynaha Jubba, Sheekh Axmed Madoobe iyo wasiirka arrimaha diinta iyo dhaqanka Jabuuti, Xasan Aadan Xasan ayaa si weyn loogu soo dhaweeyay magaalada Garoowe ee xarunta Puntland.

1/23/2014 10:02 AM EST
Khamiis, Janaayo 23, 2014 (HOL) — Kadib markii shalay munaasabad lagu qabtay magaalada Baydhabo ee xarunta gobolka Bay si rasmi ah ciidamada Itoobiya ugu biireen howlgalka midowgga Africa AMISOM, ayeey aragtiyo kala duwan ka dhiibteen arrintaa iyada ah dadka ku dhaqan magaalada Beledweyne ee xarunta gobolka Hiiraan oo ay ku sugan yihiin tirrada ugu badan ciidamada Itoobiya ee ka howlgallada gobollada dhexe.

1/23/2014 7:25 AM EST
Khamiis, Janaayo 23, 2014 (HOL) — Maamulka gobolka Banaadir ayaa maanta qalab isboorti u qaybiyay cayaartoyda 17-ka degmo ee gobolka Banaadir, kuwaasoo isugu jiray dhar, kabo iyo kubbado kala duwan sida kuwa kubadda miiska iyo kuwa kubadda cagta.

1/23/2014 7:10 AM EST
Khamiis, Janaayo 23, 2014 (HOL) — Golaha wasiirrada xukuumadda cusub ee Soomaaliya ayaa maanta kulankoodii ugu horreeyay ku yeeshay Muqdisho, kaasoo ay uga hadleen xeer hoosaadka ay ku shaqeynayaan iyo sidii ay xilalka ula wareegi lahaayeen.

1/23/2014 5:12 AM EST
Khamiis, Janaayo 23, 2014 (HOL) — Wafdi ballaaran oo uu horkacayo madaxweeynaha maamulka KMG ah ee Jubba Sheekh Axmed Maxamed Islaam (Axmed Madoobe) ayaa manta u ambabaxay magaalada Garoowe ee caasimadda dowlad goboleedka Puntland.

1/23/2014 2:28 AM EST
Khamiis, Janaayo 23, 2014 (HOL) — Abaanduulaha ciidamada xoogga dalka, Jen. C/risaaq Khaliif Cilmi ayaa soo dhaweeyay ka mid noqoshada ciidamada Itoobiya ay ka mid noqdeen kuwa Midowga Afrika ee AMISOM, isgaoo xusay in tani ay isbedel weyn ku sameynayso dagaallada looga horjeedo kooxda Al-shabaab.

1/23/2014 2:17 AM EST
Khamiis, Janaayo 23, 2014 (HOL) — Ciidamada dowladda Soomaaliya ayaa isaga baxay degmada Mahadaay ee gobolka Shabeellada dhexe iyadoo la sheegay inay xoogagga Al-shabaab qarka u saran yihiin degmadaas.