3/7/2021
Today from Hiiraan Online:  _
Wararka Maanta- Sabti, Jan 18, 2014
Haween kasoo Horjeestay habka loo Magacaabay Golaha Wasiiradda



Sabti, Janaayo 18, 2014 (HOL) — Kulan maanta ka dhacay xarunta ururka horumarinta haweenka Soomaaliyeed ee SWDC oo ay ka qaybagleen qaar ka mid ah haweenka Soomaaliyeed ayaa waxaa looga soo horjeestay qaabka loosoo magacaabay golaha wasiirada cusub ee Soomaaiya.

“Golahii wasiirrada xukuumaddii hore ee Saacid  oo ka koobnayd 10 wasiir  waxaan ka helney laba wasiir oo wasaarado muhiim ah loo dhiibay, waxaan haatan filaynay in intaas ka badan aan ka helo golaha wasiirrada cusub ugu yaraan 18 wasiir, maadaama ay yihiin 55 wasiir taasna ma dhicin,” ayay tiri Xaliimo Ismaaciil Ibraahim (Xaliimo Yareey) oo intaas raacisay.

“Haween dadaal u galay in xubno ka noqdaan golaha wasiirrada ayaa dheg jeleq loo siin waayay codsiyadooda, marka waxaan madaxda dowladd ka codsanaynaa inay  ka dhabeeyaan ballan-qaadkoodii  hore ee ahaa inay xubno badan ay haweenku ku yeelan doonaan dowaldda Soomaaliya.”

Sidoo kale, Sahro Axmed Maxamed oo iyana ka hadashay kulankaas ayaa sheegtey in haweenka Soomaaliyeed aysan xaquuqdii ay doonayeen ka helin dhammaan dowladihii dalka soo maray; waxayna  madaxweynaha, ra’iisul wasaaraha iyo gudoomiyaha baarlamaanka ka codsatay in guddiyadda heer Qaran ee la dhisayo ay haweenka Soomaaliyeed  ku yeeshaan xubno badan maadaama lagu qadiyay baarlamaankii la dhisay iyo golaha wasiirrada ee uu dhawaan soo magacaabay raiisul wasaaraha.

Haweenka Soomaaliyeed ayaa iyagu xubno aan sida u buurneyn ku yeeshay baarlamaankii federaalka oo lagu dhisay magaalada Muqdisho  sidoo kale waxay xubno aad u yar ka heleen baarlamaanka Puntland oo ka koobnaa 66 xildhibaan kuwaasoo ay ka yihiin laba xubnood oo keliya.

Kulanka haweenka ay ku yeesheen Muqdisho ee ay uga hadleen habka loo soo magacaabay golaha wasiirrada ayay ku sheegeen inuu yahay mid ay dunida ku ogeysiinayaan cabashadooda iyo sidii haweenka Soomaaliyeed ay u heli lahaayeen xaquuqdooda siyaasadeed.



Maxamed X. Xuseen, Hiiraan Online
[email protected]
Muqdisho, Soomaaliya













Click here
1/18/2014 2:24 PM EST
Sabti, Janaayo 18, 2014 (HOL) — Saddex gabdhood oo u shaqeynayay hay’adda maxaliga ah ee GREDA oo wada-shaqeyn la leh hay’adda NRC ayaa maanta lagu qafaashay deegaanka Goof-gaduud Shabeelow ee gobolka Bay.

1/18/2014 10:29 AM EST
Sabti, Janaayo 18, 2014 (HOL) — Maxkamada gobolka Banaadir ayaa maanta ku ridday xukunno kala duwan eedeysanayaal loo haystay dambiyo kala duwan; kuwaasoo saddex ka mid ah lagu xukumay dil toogasho.

1/18/2014 9:04 AM EST
Sabti, Janaayo 18, 2014 (HOL) — Tan iyo wixii ka danbeeyay markii ra’isul wasaaraha xukuumadda federaalka Soomaaliya Mudane C/weli Sheekh Axmed uu ku dhawaaqay golihii cusub ee wasiirada ayaa waxa isa soo tarayay aragtiyo kala duwan oo ay shacabka Soomaaliyeed ka dhiibanayeen Tirada wasiirada cusub ee lagu dhawaaqay, iyadoo qaar kamid ah dadka ay soo dhaweeyeen halka qaar kalena ay dhaliileen.

1/18/2014 8:58 AM EST
Sabti, Janaayo 18, 2014 (HOL) — Mas’uuliyiinta maamulka gobolka Hiiraan iyo xubno ka socday hay’addaha samafalka ayaa kormeer ku tagay deegaannaddii dhawaan lagu dagaallamay ee gobolka Hiiraan.

1/18/2014 3:21 AM EST
Sabti, Janaayo 18, 2014 (HOL) —Waxaa soo gaba gaboobay ololihii xoolalaha loogu uruurinayey dadkii reer guuraaga u badnaa ee ku cayroobey duufaannadii ka dhacay Puntland iyadoo xoolo gaaraya 11kun oo neef loo qaybshay qoysas gaaraya 656 kuwaasi oo xaadir ahaa halka lagu qaybinayay xoolaha oo ah duleedka degmada Qarxis oo ka tirsan gobolka Nugaal.

1/18/2014 2:29 AM EST
Sabti, Janaayo 18, 2014 (HOL) — Waxaa maalmahan ka socday waqooyiga gobolka Sool dadaallo lagu dhex-dhexaadinayo beelo uu dagaal ku dhex-maray deegaanka Docolaha, iyadoo lagu guuleystay in heshiis laga gaaro colaaddaas lana kala qaado ciidamadii dagaalamay.

1/18/2014 2:00 AM EST
Sabti, Janaayo 18, 2014 (HOL) — Madaxweynaha cusub ee Puntland, C/weli Maxamed Cali Gaas ayaa hadal uu jeedinayay ku sheegay inay wali Puntland ka dhowrayso dowladda faderaalka Soomaaliya ballan-qaadkii halka milyan ee doollar ahaa oo ay u ballanqaadday Puntland markii deegaanno ka mid ah Puntland ay ku dhufatay duufaanta sannadkii hore.

1/18/2014 1:59 AM EST
Sabti, Janaayo 18, 2014 (HOL) — Mas’uulkii labaad oo ka tirsan wasiirrada cusub ee xukuumadda Somalia ayaa shalay gellinkii dambe ku dhawaaqay inuu iska casilay xilka loo magacaabay oo ah wasiir ku xigeen.