3/7/2021
Today from Hiiraan Online:  _
Wararka Maanta- Arbaco, Jan 15, 2014
Jaamacada SIMAD oo u guurtay hab waxbarsho oo casri ah (Sawirro)



Arbaco, Janaayo 15, 2014 (HOL) — Munaasabad ballaaran oo lagu qabtay maanta xarunta maamulka Jaamacadda SIMAD ee Muqdisho ayaa looga dhawaaqay in jaamacaddu ay hadda wixii ka dambeeya ku shaqeyn doonto habka casriga ah ee digital-ka loo yaqaan, iyadoo isticmaalaysa barnaamij lagu magacaabo Open Campus Management System (OCMS).
Habkan ayaa ka kooban dhawr adeeg oo ay ku xiriiri doonaan macallimiinta, ardayda, shaqaalaha jaamacadda iyo maamulka.

Guddoomiye ku-xigeenka Jaamacadda SIMAD ee dhinaca horumarinta, Daahir Xasan Carab oo ka hadlay munaasabaddii lagu soo bandhigayay barnaamijkan cusub ayaa sheegay in adeeggani uu faa’iido badan u leeyahay jaamacadda iyo ardayda wax ka barata, isagoo tilmaamay inay suuro-galinayo in la badbaadiyo waqti badan oo ku bixi jiray shaqada jaamacadda iyo xiriirka ardayda iyo macallimiinta.

Sidoo kale, Daahir wuxuu sheegay in ardaygii doonaya inuu jaamacadda iska diiwaan-geliyo ama helo macluumaad ku saabsan waxbarashadiisa uu u saamaxayo barnaamijkaani inuu gurisgiisa ama goobtiisa shaqo uu ku heli karo macluumaadka iyo adeegyada uu u baahan yahay. “Arday iyo macallin ama maamulba waxay wax kasta ku ogaan karaan hal gujis (click),” ayuu yiri Ustaad Daahir Carab.

Guddoomiyaha Jaamacadda SIMAD, C/raxmaan Maxamed Xuseen (Odawaa) oo hadal ka jeediyay xafladda ayaa sheegay in juhdi badan lagu bixiyay in la soo gaaro heerkan, isla markaana ay waqti badan qaadatay in la dhaqan-geliyo barnaamijkan oo ah kii ugu horreeyay ee ay jaamacad Somaaliyeed ku shaqeyso.

“Jaamacaddu waa mid aan faa’iido doon ahayn, waxaana daliil ah waxa ka soo baxa dib ayaa loogu celiyaa si loo horumariyo. Barnaamijkan ayaana qeyb ka ah horumarinta la taaban karo ee lagu sameeyay habka ay ku shaqeyso jaamacaddam” ayuu yiri guddoomiye Odawaa.

Isagoo sii hadlaya ayuu intaa ku daray in ujeeddada waqtiga loogu bixiyay in la dhaqan-geliyo barnaamijkaan ay tahay sidii loo hagaajin lagaa hannaanka waxbarasho ee jaamacadda iyo qaabka ay wax u bartaan ardayda, wuxuuna ku daray hadalkiisa in hadafka SIMAD uu yahay inay noqoto jaamacad caalami ah.

Sannadkii hore ayay Jaamacadda SIMAD furtay maktabad Electronic ah oo noqotay tii ugu horreysay ee dalka laga hirgeliyo, waxaana laga heli karaa konton kun oo buugaag, joornaallo, muuqaallo iyo agab kale.



Maxamed X. Xuseen, Hiiraan Online
[email protected]
Muqdisho, Soomaaliya













Click here
1/15/2014 8:36 AM EST
Arbaco, Janaayo 15, 2014 (HOL) — Wadahadallo u dhexeeya dhinacyo ay dagaallo ku dhexmareen deegaanka Docolaha ayaa waxay ku dhow yihiin in guul laga gaaro, sidaa waxaa sheegay wasiirka arimaha gudaha Somaliland, Cali Maxamed Waran-cadde xilli uu ku sugnaa tuulada Guumeys oo 90-km dhinaca waqooyi kaga beegan magaalada Laascaanood.

1/15/2014 8:25 AM EST
Arbaco, Janaayo 15, 2014 (HOL) — Muxyadiin Taruuri oo ahaa dhakhtar u jooga hay’adda WHO degmada Waajid ayaa waxaa gurigiisa ka kaxeystay xoogag ka tirsan Al-shabaab, iyadoo la sheegayo in kooxaha dhakhtarka ka xeystay ay ka yimaadeen degmada Diinsoor.

1/15/2014 8:11 AM EST
Arbaco, Janaayo 15, 2014 (HOL) — Madaxweynaha Somalia, Xasan Sheekh Maxamud ayaa maanta waraaqihii aqoonsiga ka guddoomay danjiraha dalka Faransiiska u joogi doona Soomaaliya, Remi Marechaux. Iyadoo goobta ay ku sugnayd wasiiradda sii haysa xilka wasaaradda arrimaha dibadda Somalia Fowsiyo Yuusuf Xaaji Aadan.

1/15/2014 8:10 AM EST
Arbaco, Janaayo 15, 2014 (HOL) — Marxalado kala duwan oo uu soo maray kadib waxaa heer gabo-gabo ah ku dhaw dhameystirka dhismaha masjidka Bardaha ee magaalada Beledweyne sida ay HOL u sheegeen guddiga gacanta ku haya dhismaha masjidka.

1/15/2014 7:55 AM EST
Arbaco, Janaayo 15, 2014 (HOL) — Waxaa maalinimada berri ah ka furmaya waddanka Turkiga wada hadalladii u dhaxeeyay dhinacyada Soomaaliya iyo Somaliland si meesha looga saaro waxyaabaha lagu isku khilaafsan yahay oo muddo soo socday.

1/15/2014 7:54 AM EST
Arbaco, Janaayo 15, 2014 (HOL) — Ra’iisul wasaaraha Soomaaliya Cabdiweli Sheekh Axmed Maxamed ayaa maanta kulankiisii ugu horreeyay la qaatay danjiraha Britain u fadhiya Soomaaliya, Weil Nigan. Isagoo uga mahadceliyay taageerada ay Britain siiso Soomaaliya.

1/15/2014 1:59 AM EST
Arbaco, Janaayo 15, 2014 (HOL) — Xildhibaanno ka tirsan golaha wakiillada Somaliland ayaa xukuumadda Somaliland ee uu hoggamaaminayo Siilaanyo ku eedeeyay inay is-hortaagtay biyo-gelin la doonayo in lagu sameeyaan magaalada Hargreysa oo ay dhawaanahan biyo la’aan xoogani ka jirtay.

1/15/2014 1:32 AM EST
Arbaco, Janaayo 15, 2014 (HOL) — Dowladd Soomaaliya ayaa markii ugu horreysay ka hadashay ciidammo Mareykan ah oo ku sugan Soomaaliya, kuwaasoo dhawaan ay saraakiil Mareykan ah sheegeen inay ku sugan yihiin Muqdisho.

1/15/2014 12:24 AM EST
Arbaco, Janaayo 15, 2014 (HOL) — Dagaal culus oo khasaare geystay ayaa ku dhexmaray xalay degmada Mahadaay iyo deegaanka Buurane ee gobolka Shabeellada dhexe, iyadoo xooggagga Al-shabaab ay u suurogashay inay la wareegaan deegaannadan.

1/15/2014 12:08 AM EST
Arbaco, Janaayo 15, 2014 (HOL) — Madaxweynaha Puntland, C/wali Maxamed Cali Gaas ayaa xilkii ugu horreeyay magacaabay tan iyo markii uu noqday madaxweynaha Puntland, waxaana wareegtadiisii u horreysay uu ku magacaabay agaasimaha madaxtooyada Puntland, Deeq Suleymaan Yuusuf.