Jimco, Feberaayo 28, 2014 (HOL) — Dowladda Somalia ayaa
heshiis iskaashi ciidamada ah la gashay dalka dalka Turkiga, iyadoo
heshiiskan uu dhinaca Somalia u saxiixay taliyaha guud ee ciidamada
xoogga dalka, Jen. Daahir Aadan Cilmi (Indha-qarshe).
Saraakiil ka
socota wasaaradda difaaca dalka Turkiga oo booqasho ku yimid Muqdisho ayaa
dhinaca Turkiga u saxiixay heshiiskan, kaasoo noqonaya kii ugu horreeeyay oo Turkigu
uu si gaar ah ugu tababari doono ciidamada xoogga dalka.
Taliyaha ciidamada
xoogga dalka Soomaaliya, Jen. Indha-qarshe ayaa saraakiisha Turkiga ka socda
kala hadlay sidii dowladda Turkiga ay uga qaybqaadan lahayd dhimaha ciidamada
xoogga dalka, isagoo ku sheegay heshiiskan inuu yahay mid dhabaha u xaaaraya
sidii ay Soomaaliya ku yeelan lahayd ciidammo milateria ah oo awood leh.
“Waxaan wasaaradda
difaaca Turkiga la galnay heshiis dhigaya sidii ay ciidamadeenna xooggan ugu siin
lahaayeen gudaha dalka Soomaaliya tababar, iyagoo meel hoos kasoo bilaabaya
dhismaha ciidanka xoogga dalkeenna,” ayuu yiri taliyaha ciidamada xoogga dalka.
Heshiiskan cusub
ayaa ah mid xoojinaya heshiis ay labada wasaaradood ee difaaca Somalia iyo
Turkiga ay horay u kala saxiixdeen, kaasoo ay horay u meel mariyeen
baarlamaannada labada dal ee Somalia iyo Turkiga.
Sannadkii lasoo
dhaafay ee 2013 ayay labada galeen heshiis hordhac ah oo ku saabsan sidii Turkigu
ay u tababari lahaayeen ciidamada Soomaaliya, kuwaasoo ay ku jireen ciidamada
booliiska, kuwa sirdoonka iyo kuwa badda Soomaaliya.
Dowladda Turkiga
ayaa horay u tababartay 500 oo askari oo ka tirsan booliiska Soomalaiya, kuwaasoo
isugu jiray rag iyo dumar, waxayna tababarkooda ku soo qaatay gudaha dalka Turkiga.
Toddobaadkii lasoo
dhaafay ayuu Midowga Yurub oo tabaar siiya ciidamada Somalia u soo wareejiyay
tababarkooda gudaha dalka Soomaaliya, iyadoo markii hore lagu tababari jiray
dalka Uganda, iyadoo ay tani ku timid heshiis dhexmaray dowladda federaalka
Soomaaliya iyo ururka Midowga Yurub.
Xukuumadda Somalia
ayaa dadaal ugu jirtay sannadihii lasoo dhaafay sidii ay u xoojin lahayd
awoodda ciidamada xoogga dalka si ay ula dagaalamaan xoogagga Al-shabaab oo
isku dayay muddo shan sano in ay xukunka ka tuuraan dowladda Soomaaliya.
Maxamed X. Xuseen,
Hiiraan Online
[email protected]
Muqdisho, Soomaaliya
