Axad, Feberaayo 23, 2014 (HOL) — MGuddida Turxaan bixinta
xisbiga kulmiye ee uu dhowaan madaxweyne Siilaanyo u saaray ayaa sheegay inay
soo afjareen khilaafkii ragaadiyey xisbiga taladda haya ee KULMIYE.
Khilaafkan kulmiye dhexdiisa ka jiray ayaa bilihii u dambeeyey
si weyn usoo shaacbaxday, taas oo keentay in dhawr jeer dib loo dhigo
shirweynihii xisbigaasi qabsan lahaa.
Madaxweyne Siilaanyo ayaa guddi wasiiro u badan u saaray xal
ka soo gaadhida khilaafka xisbiga udhexeeya, waxaanay xalay kulan ku yeesheen
madaxtooyada, kuwaas oo garabyadii is hayey ka dhex muuqdeen.
“Sida aad la socotaan waxaa madaxweyuhu u magacaabay gudi
turxaan bixin khilaafka soo kala dhex
galay madaxda sare ee xisbiga Kulmiye kaas oo saamayn ku yeeshay qabsoomida
shirweynaha sadexaad ee xisbiga Kulmiye. Gudidaas oo ka koobnayd toban xubnood
waxay si mug iyo miisaan leh uga hawl
gashay shaqadii loo igmaday”ayaa lagu yidhi qoraal ay soo saareen gudidda
khilaafsaarka xisbigaasi.
“Gudidu si ay u daristo baaxada khilaafka iyo waxa lagu kala
cabanayo waxay kulamo gooni gooni ah la yeelatay dhinacyadii wax kala
tirsanayey iyadoo dhinacwalba la yeelatay sadex kulan oo gaar ah. Si khilaafka loo fududeeyo waxay gudidu kulamo
shakhsi shakhi ah la yeelatay xubnaha xisbiga ee kala cabanayey kaas oo ay u
kala dab qaadaysay (shuttle diplomacy). Kulamadaas gaar gaarka ah ka dib waxay
gudigu si toos ah isu soo hor fadhiisiyey dhinacyadii wax kala tirsanayey
kuwaas oo dhinac waliba ku soo bandhigay wixii uu tirsaanayey si furan oo
saraaxad leh”ayey raaciyeen hadalkoodda.
HALKAN KA DAAWO SAWIRRO BADAN:
Guddidan loo saaray inay soo xaliyeen khilaafka ka dhexjiray
madaxda sare ee KULMIYE ayaa soo saaray go’aamo ay ka mid yihiin kuwan hoosta
ku qoran:
1. Waxaa awooda qaban qaabada iyo diyaarinta shirka iska leh gudida qabanqaabada shirweynaha, waxaana
gudidaas musdanbeed u noqonaya hogaanka xisbiga.
2. Iyada oo raacayo dastuurka xisbiga waxay gudiga fulintu
ansixinaysaa afarta xubnood ee lagu soo daray gudida qabanqaabada,
3. Hadii loo baahdo waxka bedelka dastuurka xisbiga waxaa
awooda diyaarinta waxka bedelka yeelanaya gudida fulinta, waxaana soo
jeedintooda ay u gudbinayaan gudida qabanqaabada oo iyana u gudbin doonta
shirweynaha.
4. Iyada oo la dhawrayo wada jirka xisbiga waxay gudidu
go’aamisay in dhammaan xubnaha hogaanka oo kala ah gudoomiyaha, afartiisa
kuxigeen iyo xogahaya guud sidooda loo daayo oo aan cidi kula tartamin isla
markaana shirweynaha dib loogu soo doorto si loo mariyo sharciyada
5. In Cabdicasiis Maxamed Samaale uu ka mid noqdo gudida
fulinta ee xisbiga.
6. gudida fulinta ee cusub waxaa soo magacaabaya hogaanka
xisbiga oo wada jira , waxaanay
kala tashanayaan
Madaxwaynaha JSL.
7. Saddexda urur ee kala ah
Dalsan , Damal iyo Umadda waa in
la siidaayo liisaska xubnaha Golayaashooda dhexe si ay uga qayb galaan
shirwaynaha xisbiga ee soo socda .
8. Sida uu dhigayo sharciga xisbigu Ergooyinka shirwaynuhu waxay ka imanayaan gobolada
iyo degmooyinka , waxaana soo xulaya
madaxda xisbiga ee degmooyinka iyo Gobolada iyo masuuliyiinta heer qaran ee xisbiga u
matalaya gobolada iyo degmooyinka
.
9. Soo xulista xubnaha golaha dhexe ee lagu
dooran doono shirwaynaha waxaa
lagu soo xulayaa sida ku cad
qodobka sideedaad.
Guddidan turxaan saarka xisbiga ayaa ka kooban toban xubnood,
waxaana hogaaminayey wasiirka gaashaandhiga Axmed Xaaji Cadami oo sheegay in
halkaasi lagu soo afjarya khilaafkii xisbiga ka dhexjiray.
Khilaafkan ayaa xisbiga kulmiye laba garab u qaybiyey, kuwaas
oo kala raacay madaxweyne ku xigeenka iyo wasiirka Maaliyadda oo dhinac ah iyo
gudoomiyaha xisbiga kulmiye iyo ku xigeenkiisa oo dhinac ah, taasina waxay
keentay in hawl maalmoodkii xisbigu socon waayo, isla markaana meel adag
gaadho.
Barkhad-ladiif M. Cumar, Hiiraan Online
[email protected]
Hargeysa, Somaliland