Axad, Feberaayo 23, 2014 (HOL) — Fagaaraha beerta nabadda ee Muqdisho
waxaa maanta ka dhacay bannaabaxii ugu weynaa oo ay soo qaban-qaabiyeen maamulka
gobolka Banaadir iyo ururka Haweenka Qaranka Soomaaliyeed, ayna gacan ka
geysatay hay'adda wadahadalka bulshada (CCD) ayna ka qayb galeen boqollaal
dadweyne oo ka kala socday 17-ka degmo ee gobolka Banaadir.
Ra'iisal wasaaraha Soomaaliya, C/weli Sheekh Axmed, guddoomiye
ku xigeenka koowaad ee gobolka baarlamaanka
Jeylaani Nuur Iikar, wasiiradda haweenka, Khadiijo Maxamed Diiriye, guddoomiyaha
haweenka Banaadir, Jawaahir Baarqab, guddoomiyaha ururka haweenka Qaranka, Batuulo
Sheekh Axmed Gaballe iyo madax kale oo fara badan ayaa iyaguna ka qaybgalay.
Wasiiradda haweenka iyo qoyska, Khadiijo Maxamed Diiriye ayaa
khudbad gaaban oo ay halkaasi ka jeedisay ku sheegtay in shucuurta dadweynaha
Muqdisho ay ku muujiyeen sida ay uga xun yihiin falalka Al-Shabaab ay ka
geysaneyso magaalada Muqdisho.
"Dadweynaha Muqdisho oo kaashanaya dowladdooda waxay
maanta diyaar u yihiin inay ka hor-tagaan kooxaha ka horjeeda nabadda iyo
jirtaanka dowladda" ayay tiri wasiiradda oo ku ammaanay dadweynaha
Muqdisho sida uga go'an tahay dagaal ay la galaan cadowgooda.
HALKAN KA DAAWO SAWIRRO BADAN:
Sidoo kale; waxaa halkaas khudbad gaaban ka jeedisay guddoomiyaha
haweenka Qaranka iyo guddoomiyaha haweenka maamulka gobolka Banaadir, waxayna iyana
sheegeen in falalka argagaxisada ay muujineyso cadowtinimada ay u qabaan dadka Soomaaliyeed,
iyagoo intaas ku daray in laga adkaanayo kooxaha cadowga ku ah Qarannimada
Soomaaliya.
Dadweynaha isaga kala yimid 17-ka degmo ee gobolka Banaadir oo
watay boorar ay ku qornaayeen "Doonimeyno Argagixisada, Shabaab
doonimeyno" iyo ereyo kale ayaa goobta dibadbaxu ka dhacayay ku sugnaa, iyadoo
dadweynaha qaarkood ay muujinayeen shucuur ay ku muujinayeen inay ka horjeedaan
falalka amni-darro ee ay Al-shabaab ka geysanayso Muqdisho.
Ra'iisal wasaaraha Soomaaliya, C/Weli Sheekh ayaa markii uu
soo galay beerta nabadda oo uu ka dhacayay dibadbaxa wuxuu salaan kula dhaqaaqay
dadweynihii dibadbaxa ka qayb-galay, isagoo halkaas ka jeediyay khudbad gaabanisagoo
hoosta ka xariiqay in dowladdiisu ku garab istaageyso shacabka Muqdisho
dagaalka looga horjeedo Al-shabaab.
"Dowladda federaalka Soomaaliya waxay garab taagan tahay,
isla markaana gacan ku siinaysaa dadweynaha Muqdisho sidii kooxaha Al-shabaab dalka
oo dhan looga saari lahaa," ayuu yiri C/weli Sheekh oo uga mahad-celiyay
dadweynaha gobolka Banaadir sida ay isku soo abaabuleen; iyagoo shucuurtooda ku
muujinaya inay u midoobaan sidii ay isaga difaaci lahaayeen cadowgooda.
Ugu dambeyn, ra'iisal wasaaraha ayaa ku ammaanay haweenka
Soomaaliyeed inay mar walba hormuud u yihiin xornimada dalka, maantana shucuur
taas la mid ah ay ku muujiyeen inay u midoobaan burburinta wax uu ku tilmaamay
kooxaha cadowga ah ee Al-Shabaab oo uu sheegay inay la galayaan dagaal aan loo
kala hareyn.
Maxamed X. Xuseen, Hiiraan Online
[email protected]
Muqdisho, Soomaaliya