Axad, Feberaayo 23, 2014 (HOL) — Waxaa si wayn loo adkeeyay
ammaanka guud ee magaalooyinka Puntland, gaar ahaana Garoowe oo ah xarunta Puntland,
waxaana la arkayey ciidammo fara badan oo heegan la galiyey si ay uga hortagaan
dhacdooyinka wax u dhimi kara ammaanka.
Xarumaha dowladda sida madaxtooyada oo ku taalla duleedka
Garoowe ayaa u muuqanaysay in la kordhiyay tirada ciidamada ilaalada ka ah, waxaana
socda baaritaanno kala duwan oo lagu sameeynayo gaadiidka galaya madaxtooyada.
Arrintan waxaa la sheegay inay daba-socoto weerarkii ka dhacay
madaxtooyada Soomaaliya, kaaso si toos ah ay u qaadeen ciidamo ka tirsan ururka
Al-Shabaab ee dowladda dagaalka xooggan kula jira, waxaana Puntland ay ka
digeen saamaynta falalka amni-darro ee Koonfurta Soomaaliya ka jira.
"Waxaa bilaabanaya howlgallo guri-guri ah ciidamadu waxay
tagayaan goob walba oo ka mid ah Garoowe, waxaan farraynaa shacabka Puntland
gaar ahaana kuwa ku nool caasimadda inay kala shaqeeyaan adkaynta ammaanka
magaalo madaxda ciidamada howlgallada wada," sidaa waxaa yiri guddoomiyaha
gobolka Nugaal, Cabdi Cali Xirsi Qarjab.
Qarjab waxaa kalo uu xaqiijiyay in heegan sare la galiyay
ciidamada ammaanka kuwaasoo amar ku qaba baariytaanka goob kasta oo ay ka
shakiyaan, wuxuuna ku daray in wadayaasha gaadiidka shacabka ay ka firsadan
cida ay qaadayan, halka sidoo kale uu shacabka ugu yeeray inay la soo xiriiran
laamaha ammaanka haddii ay arkaan cid ay uga shaki qabaan wax yeelidda amniga
caasimadda.
Madaxweynaha Puntland C/wali Maxamed Cali Gaas ayaa dhawaan
soo saaray war uu ku sheegay in Puntland ay il gaar ah ku eegayso dagaalka uu madaxweynaha
Soomaaliya Xasan Sheekh Maxamuud ku baaqay ee dhanka ka ah Al-shabaab.
Weerarkii Jimcihii lagu qaaday madaxtooyada Soomaaliya wuxuu
noqday mid ku yeeshay saameyn dhammaan maamullada dalka ka jira, kuwaasoo muujiyay
cabsi ah suuro-galnimada in Al-shabaab ay ka geystan gudaha magaaloyinkooda mid
la mid ah weerarkii ay ka fuliyeen madaxtooyada Soomaaliya ee Muqdisho.
Iimaan Maxamed, Hiiraan Online
[email protected]
Gaalkacyo, Soomaaliya
