Booliiska Kenya oo Maanta soo bandhigay Wiil Soomaali-British ah oo looga shaki qabo Weerarkii Dhismaha Westgate Mall
Jimco,
September 27, 2013 (HOL) — Booliiska dalka Kenya ayaa maanta soo
bandhigay wiil Soomaali-British ah oo ay sheegeen inay uga baqdin qabaan
in uu ka mid ahaa kooxihii weeraray dhismaha ganacsiga Westgate Mall oo
maalmo ay gacanta ku hayeen kooxo ka tirsan Al-shabaab.
Wiilkan oo
lagu sheegay magaciisa C/risaaq Sheekh Axmed ayaa la qabtay sida ay
booliisku sheegeen isagoo doonayay inuu ka dhoofo garoonka diyaaradaha
Jommo Kenyatta ee magaalada Nairobi.
Mas’uuliyiinta
booliiska ayaa sheegay in baaritaan lagu sameynayo wiilkan iyo dhowr
qof oo kale oo ay booliisku gacanta ku hayaan, inkastoo aysan soo
bandhigin dadka kale ee ay gacanta ku hayaan.
Sidoo kale, khuburada caalamiga ah ee baaraysa Westgate Mall ayaa waxay heleen maanta shan bambo oo
kuwa gacanta ah oo aan weli qarxin, iyagoo sheegay inay baqdin ka
qabaan inay waxyaalo kale oo qarxa ay ku jiraan gudaha xaruntaas.
Westgate
Mall ayaa waxaa muddo afar maalmood ah gacanta ku hayay rag hubeysan oo
ka tirsan Al-shabaab, kuwaasoo la dagaalamayay ciidamada dalka Kenya
tan iyo markii ay xaruntaas qabsadeen Sabtidii lasoo dhaafay.
Hay’adda
xuquuqda aadanaha Human Rights Watch ayaa warbixin ay soo saartay
maanta oo Jimco ah waxay uga digtay dowladda Kenya in ciidanku ay
sameeyaan baaritaanno lagu beegsanayo dadka Soomaalida ah ee ku nool
xaafadda Islii ee magaalada Nairobi.
Hay'adda HRW ayaa warbixinteedan ku sheegtay inay jirto baqdin ay ka qabaan in dhibaatooyin loo geysto dadka Soomaaliyeed -sidii dhacday bishii November ee sannadkii hore-
markaasoo la boobay ganacsi ay Soomaalidu ku leeyihiin magaaladaas,
kaddib qaraxyo khasaare badan geystay oo ka dhacay magaalada Nairobi.
Dhanka
kale, waxaa magaalada Nairobi ee dalka Kenya ka socda aas weyn oo loo
sameynayo qaar ka mid ah dadkii ku dhintay Westgate Mall, kuwaas oo ay
ku jiraan dad ay ehelo yihiin madaxweynaha Kenya, Uhuru Kenyatta.
Isla
maanta ayaa la helay 10-qof oo ka mid ah dadkii la waayay markii uu
dhacay weerarkii Westgate Mall, kuwaasoo qaarkood iyagoo meyd ah laga
dhex helay filinjeerro.
Maxamed Xaaji Xuseen, Hiiraan Online
[email protected]
Muqdisho, Soomaaliya
