10/22/2019
Today from Hiiraan Online:  _
Wararka Maanta- Talaado, Sept 24, 2013
Madaxweynaha Kenya oo sheegay inay ciidamadiisu soo Afjareen Howlgalkii ka socday Rugta Ganacsiga Westgate Mall



Talaado, September 24, 2013 (HOL) — Madaxweynaha dalka Kenya, Uhuru Kenyatta ayaa sheegay caawa in lasoo soo afjaray howlgalkii ka socday rugta ganacsiga Westgate Mall, kaddib afar maalmood oo ay gacanta ku hayeen koox hubeysan oo ka tirsan Al-shabaab.

Kenyatta oo ka hadlay telefishinka dalka Kenya ayaa sheegay in shan ka mid ah kooxdii weerarka qaadday lagu dilay howlgalka, 11 kale oo laga shakisan yahayna ay gacanta ku dhigeen.

" Howlgalkii ka socday Westgate Mall waa lasoo afjaray, waana la jabiyay kooxdii weerarka qaaday. Weerarkaas waxaa ku dhintay 61-qof oo lix ka mid ahi ay yihiin ciidamadeenna"”Uhuru Kenyatta ayaa yiri.

Madaxweynaha Kenya wuxuu sidoo kale sheegay in saddex maalmood oo baroor-diiq Qaran ah ay billaabanayso Arbacada berri ah, isagoo xusay in saddexaas maalmood loo barooran doono dadkii weerarkaas naftooda ku waayey.

Dhanka kale, Kenyatta wuxuu sheegay in dhismaha dhexdiisa lagu arkay maydad isugu jira kooxdii weerarka ku qaaday iyo qaar kamid ah dadkii la-haystayaasha ahaa.

Weerarka oo ay mas'uuliyaddiisa sheegatay kooxda Al-sbabaab ayaa waxaa ku dhaawacmay 175 qof, kuwaasoo haatan lagu daweynayo isbitaallada kala duwan ee ku yaalla magaalada Nairobi.

"Fulayadii weerarka qaaday waxaa la horgeyn doonaa cadaaladda, sidoo kale waxaan la xisaabtami doonnaa cid walba oo lug ku lahayd, cid walba oo ay yihiin"”ayuu madaxweynuhu hadalkiisa ku daray.

Dadka ku dhintay weerarka ayaa waxaa ku jiray 18 qof oo shisheeye ah oo lix ka mid ah ay ahaayeen Britain, iyadoo kuwa kalena ay u kala dhasheen dalalka: Faransiiska, Kanada, Holland, Australia, Peru, Hindiya, Gaana, Koonfur Afrika iyo Shiinaha.

Xarakada Al-shabaab ee ka dagaalanta Soomaaliya, ayaa ku goodisay mar kale inay weerarro ka geysanayso Kenya, haddii aysan xukuumadda dalkaas si dhaqso ah ciidamadeeda ugala bixin Soomaaliya.

Afhayeen u hadlay Al-shabaab ayaa sheegay in weerarkani uu ahaa mid ay uga jawaabayeen dhibaatooyin uu sheegay in ciidamada Kenya ee AMISOM ka tirsani ay u geysteen dad Soomaaliyeed.

Madaxweynaha Kenya wuxuu sheegay inuusan xaqiijin Karin in weerarkan ay ku lug lahaayeen laba ama saddex qof oo u dhashay dalka Britain, balse waan caddeyn doonnaa ayuu yiri dadkii weerarkaas fuliyay dalalka ay u kala dhasheen.

Laakiise, wasiiradda arrimaha dibadda ee Kenya, Aamina Maxamed ayaa wareysi ay siisay Telefishin Mareykanka laga leeyahay ku sheegtay inay ku jiraan dadka weerarka geystay dhallinyaro u dhashay dalka Mareykanka oo da'doodu u dhexeyso 18-sano illaa 19-sano, asal ahaanna kasoo jeeda Soomaaliya ama dalalka carabta.

Weerarkan ayaa wuxuu noqonayaa kii ugu xumaa oo ay Al-shabaab ka geysato dalka Kenya, kaddib 1998-kii markaasoo la qarxiyey safaaradda uu Mareykanku ku leeyahay magaaladas oo ay ku dhinteen in ka badan dad ka badan 200-qof.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
9/24/2013 12:19 PM EST
Talaado, September 24, 2013 (HOL) — Hay’adda Amnesty International oo u doodda xuquuqda aadanaha ayaa weerarkii ay Al-shabaab ku qaadday suuqa ganacsi ee Westgate ku tilmaantay mid arxan-darro ah oo ay ku beegsatay dad aan waxba galabsan oo ku jiray howl-maalmeedkoodii caadiga ahaa.

9/24/2013 10:39 AM EST
Talaado, September 24, 2013 (HOL) — Kooxda Al-shabaab ee Somalia ayaa ku hanjabtay mar kale inay weerarayso dalka Kenya haddii ciidamadooda aysan ugala bixin Soomaaliya sida ugu dhaqsiyaha badan.

9/24/2013 10:38 AM EST
Talaado, September 24, 2013 (HOL) — Xisbiyada Mucaaridka ee Somaliland ee UCID iyo WADANI ayaa si adag u dhaliilay xildhibaanadda golaha Wakiiladda ee ansixiyey xeerkaasi iyo xukuumadda dabadda ka riixaysayba.

9/24/2013 9:45 AM EST
Talaado, September 24, 2013(HOL) :- Shir ay isugu yimaadeen Isimada iyo waxgaradka qaar kamid ah beelaha dega Jubooyinka islamarkaana socday mudo sedex maalmood ah ayay kasoo saareen bayaan ka koobnaa qodobo dhowr ah.

9/24/2013 9:09 AM EST
Talaado, September 24, 2013 (HOL) — Hay'adda Save The Childaren ayaa in ka badan 300 oo naafo ah oo ku dhaqan magaalada Beledweyne ee xarunta gobolka Hiiraan u qeybisay karar mudo sadex bilood ay ku qaadan doonaan lacag dhan bishiiba $85 doolar.

9/24/2013 9:06 AM EST
Talaado, September 24, 2013 (HOL) — Ciidamada dowladda Soomaaliya oo kaashanaya kuwa AMISOM ayaa maanta dagaal muddo kooban socday kula wareegay deegaanka Biyo-cadde ee gobolka Shabeellada dhexe.

9/24/2013 8:48 AM EST
Talaado, September 24, 2013 (HOL) — Guddoomiyaha degmada Berdaale ee gobolka bay, Cara-cas ayaa waxaa lagu dhaawacay howlgal ay ciidamadu ku soo qabanayeen gacanku dhiigle habeen hore magaalada Baydhabo ku dilay askari ka tirsan ciidamada dowladda Soomaaliya.

9/24/2013 8:48 AM EST
Talaado, September 24, 2013 (HOL) — Golaha Wakiiladda Somaliland, ayaa maanta cod aqlabiyad ah ku meel mariyey xeerka horumarinta wadooyinka oo lagu kordhinayo cashuuro xoolaha iyo gaadiidka, taas oo golaha ku kala aragti duwanaa.

9/24/2013 8:08 AM EST
Talaado, September 24, 2013 (HOL) — Afhayeenka ciidanka Booliiska dalka Soomaaliya, Col.Maxamed Cabdi Madaale ayaa ka warbixiyay maanta falal ammaanka kasoo horjeeda oo 24-kii saac ee ugu dambeeyay ka dhacay degmooyinka gobolka Banaadir ee magaalada Muqdisho.

9/24/2013 7:49 AM EST
Afhayeen u hadlay ciidamada Kenya ayaa xaqiijiyay in 3 kamid ah ciidamadooda ay ku dhinteen dagaallada ay ku doonayaan inay ku soo badbaadiyaan dadka maxaabiista ah ee lagu haysta goobtaas.

9/24/2013 7:35 AM EST
Talaado, September 24, 2013 (HOL) — Madaxweyaha Somalia, Xasan Sheekh Maxamuud ayaa xalay kulan la yeeshay madaxda Jaamacadda Ohio iyo qaar ka mid ah xildhibaanada gobolka Ohio ee dalka Maraykanka.

9/24/2013 7:16 AM EST
Talaado, September 24, 2013 (HOL) — Magaalada Amsterdam ee Holland ayaa waxaa shalay shir saacado badan qaatay ku yeeshay qaar ka mid ah jaaliyadda kasoo jeedda gobolka Galguduud ee ku dhaqan dalkaas iyo wafdi ka socday gobolka Galguduud, kuwaasoo hogaaminayay, Abuukar Daahir Maxamed oo ka qaybgalay shirkii Brussels ahaana wakiilka guddoomiyaha gobolka Galguduud, Xuseen Cali Weheliye (Cirfo).

9/24/2013 7:14 AM EST
Talaado, September 24, 2013 (HOL) — Danjiraha Somalia ee dalka Kenya, Maxamed Cali Nuur (Ameeriko) ayaa sheegay maanta in dhacdadii dhawaan ka dhacday rugta ganacsiga Westagate Mall ee magaalada Nairobi oo ay mas’uuliyadddiisa sheegtay Al-shabaab aysan wax saameyn ah ku yeelan doonin Soomaalida ku nool xaafadda Islii ee magaalada Nairobi.

9/24/2013 6:52 AM EST
Inkastoo dawlada Kenya ay shalay shaacisay inay la wareegeen ciidankoodu dhammaanba dabakhyada uu ka koobanyahay dhismaha xarunta ganacsiga ee Wetsgate ayaa la maqlayaa dhaawaqa rasaasta la is waydaarsanayo oo si teel teel ah u dhacaysa maalintii Afraad..

9/24/2013 6:30 AM EST
Maxkamada caalamiga ah ee dambiyada dagaalka ayaa sheegtay inay Kenya ugu yaboohayso caawimaad ku aadan sidii cadaalada loo horkeeni lahaa kooxaha gaystay weerarka lagu qaaday xarunta ganacsiga ee Westgate.

9/24/2013 6:23 AM EST
Talaado, September 24, 2013 (HOL) — Madaxweyne ku xigeenka Somaliland, C/raxmaan Cabdilaahi Ismaaciil (Saylici), ayaa maanta dalka dib ugu soo laabtay ka dib markii uu soo dhamaystay socdaal caafimaad iyo fasax iskugu jira oo uu ku tagay Imaaraadka Carabta.

9/24/2013 5:42 AM EST
Wasiiradda arrimaha dibada ee Kenya Aamina Maxamed Jibriil ayaa shaacisay in dhalashooyin kala duwan ay haystaan ragga qaaday weerarka xarunta ganacsiga Westgate.

9/24/2013 3:12 AM EST
Talaado, September 24, 2013 (HOL) — Xarakada Al-shabaab ayaa sheegtay inay weerarro la mid ah kii ay Nairobi ku qaadeen ay la beegsan doonaan dhammaan dalalka ay ciidamadu ka joogaan Soomaaliya.

9/24/2013 2:22 AM EST
Talaado, September 24, 2013 (HOL) — Golaha wasiirrada Somalia oo xaaly shir aan caadi ahayn yeeshay magaalada Muqdisho ayaa kaga hadlay arrimo muhiim ah oo ay ka mid yihiin falalka argagaxnimo ee ka dhacay magaalada Nairobi ee dalka Kenya.

9/24/2013 2:10 AM EST
Talaado, September 24, 2013 (HOL) — Ciidamada ammaanka Kenya ayaa sheegay inay toogasho ku dileen lix ka mid ah xoogaggii hubeysnaa ee afar maalmood ka hor la wareegay dhismaha ganacsi ee Westgate Mall.