3/28/2024
Today from Hiiraan Online:  _
Wararka Maanta- Jimco, Sept 20, 2013
Dowladda Somalia oo Markii ugu Horreysay Haweeney u Magacowday inay noqonto Guddoomiyaha bangiga dhexe ee Dalka


Jimco, September 20, 2013 (HOL) — Dowladda Soomaaliya ayaa markii ugu horreysay u magacowday guddoomiyaha bankiga dhexe ee dalka haweeney Soomaaliyeed oo lagu magacaabo Yusur Abraar, iyadoo bedelaysa C/salaam Cumar Hadliye oo horay xilkaas u hayay.

C/salaan Hadliye ayaa is casilay kaddib markii uu sheegay in madaxweyne Xasan Sheekh uu bartamihii bishan u sheegay in isbedel lagu sameynayo maamulka bankiga dhexe, kaddib markii warbixin ay soo saareen guddi gaar ah oo ka tirsan Qaramada Midoobay ay Hadliye la xiriiriyeen lacago bankiga lagala baxay, balse guddoomiyihii hore ee bankiga ayaa beeniyay warkaas.

Yusur Abraar ayaa la sheegay inay ka shaqeyn jirtay 30-kii sano ee aynu soo dhaafnay bankiyo caalami ah iyo shirado ka shaqeeya caymiska. Iyadoo mid ka mid ah saraakiisha xafiiska warfaafinta ee madaxtooyada Soomaaliya uu u sheegay warbaahinta in haweeneydan loo magacaabay xilka, laakiinse la sugayo oo keliya inay xilka la wareegto.

Sarkaalkan ma uusan sheegin xilliga ay xilka kala wareegi doono Yusur oo noqonaysa haweeneydii ugu horreysay oo xilkan oo kale loo magacaabo, iyadoo tani ay kusoo beegmayso xilli madaxda dowladda Somalia ay horay u sheegeen in isbedel lagu sameynayo hay’adaha maaliyadda dalka.

“Markii madaxweynaha Soomaaliya uu ii sheegay in isbedel lagu sameynayo ha’yadaha maaliyadda dalka oo uu Bankigu ka mid yahay ayaan go’aan ku gaaray inaan u gudbiyo warqaddayda is-casilaadda,” ayuu Hadliye u sheegay wakaaladda wararka Reuters isagoo ku sugan magaalada Nairobi ee xarunta dalka Kenya.

Dowladda Soomaaliya ayaa sheegtay lixdii bishan September in baaritaanno lagu sameeyay warbixintii guddiga la socodka cunno-qabteynta Soomaaliya iyo Eritrea ay ahayd mid been ah, taasoo uu madaxweynuhu ku sheegay in ay tahay mid ay dunida ay ugu caddeeyaan in warkaas uusan jirin.

Eedeynta guddigu soo saaray ayaa waxay ku sheegeen in $12-milyan oo ka mid ahaa 16.9 milyan oo doollar laga waayay bankiga kaddib markii si aan sax ahayn looga saaray, iyagoo mas’uuliyiin dowladda ka tirsan ku eedeeyay inay lacagtaas kala baxeen bankiga guddoomiyaha bangiguna uu fududeeyay sidii lacagtaas looga saari lahaa bankiga.

Tallaabooyinka ayaa waxay kusoo beegmaysaa xilli ay dowladda Soomaaliya ay sheegtay inay isbedel weyn ku sameyn doonto hay’adaha kala duwan ee dowladda Soomaaliya, kuwaasoo ay ka mid yihiin maaliyadda iyo caadalada.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
9/20/2013 3:55 PM EST
Jimco, 20 September 2013(HOL)—Agaasimaha Hay’adda Cilmi baarista iyo wadatashiga CRD Jabriil Ibraahim Cabdulle oo ka mid ah aqoonyahannadii ka qeybgalay shirkii New Deal ee Soomaaliya loogu qabtay xarunta Midowga Yurub uu leeyahay Magaalada Brussels ee dalka Belgium ayaa wareysi ku saabsan shirkaas waxaa uu siiyay TV-ga Somali Channel, wuxuuna wareysiga uga warramay mirihii shirka ka soo baxay...

9/20/2013 1:08 PM EST
Jimco, September 20, 2013 (HOL) — Ra'iisul wasaare ku xigeenka Suuriya, Qadri Jamiil ayaa sheegay in dagaallada sokeeye ee dalkiisa ka socda ay gaareen heer aan la kala adkaan Karin, wuxuuna sababta ku sheegay in kooxaha dagaalamaya aysan xoog isku muquunin karin.

9/20/2013 10:18 AM EST
Taleefishinka CBS ee laga leeyahay dalka Maraykanka ayaa tabiyay in kooxda Alshabaab ee Soomaaliya ka dagaallanta ay samaynayso hub kiimikiil ah taasoo ay kasoo xigteen dukumiinti Maxkamadeed oo la helay oo muujinaya in Al Shabaab oo ah koox xiriir la leh Ururka Al Qacidda ay ku howlantahay horumarinta hub Kiimikaal ah oo ay samaysato.

9/20/2013 8:54 AM EST
Jimco, September 20, 2013 (HOL) — Ugaas C/raxmaan Ugaas Khaliif iyo boqolaal dadweynaha oo isaga kala yimid xaafaddaha magaalada Beledweyne ayaa maanta si wada jir ah uga qeyb-qaatay shubka qeybtii koowaad dhismaha masjidka Bardaha ee magaalada Beledweyne.

9/20/2013 8:39 AM EST
Jimco, September 20, 2013 (HOL) — Dowladda Mareykanka ayaa daboolka ka qaadday inay 69-milyan oo doollar ku bixinayso dib u dhiska Soomaaliya, sida kobcinta dhaqaalaha, waxbarasahada, horumarinta dimuqraadiyadda, xukuumadda iyo shuruucda kala duwan ee dalka.

9/20/2013 8:13 AM EST
Jimco, September 20, 2013 (HOL) — Madaxweynaha Somalia, Xasan Sheekh Maxamuud oo dhawaan booqday magaalada Roma ee dalka Talyaaniga ayaa sheegay in dhallinyarada Soomaaliyeed ee Taliyaaniga ku nool ay qaarkood haysato nolo xumo aad u daran.

9/20/2013 8:10 AM EST
Jimco, September 20, 2013 (HOL) — Illaa shan qof ayaa la sheegay inay ku dhaawacmeen mudaharaadyo rabshado wata oo xalay ka dhacay magaalada Ceerigaabo ee xarunta gobolka Sanaag, kaasoo keenay in la boobo dukaamo ku yaalla magaaladaas.

9/20/2013 2:13 AM EST
Jimco, September 20, 2013 (HOL) —Soomaalida ee ku nool magaalada Columbus, Ohio ee dalka Mareykanka ayaa waxay diyaar-garow xooggan ugu jiraan sidii ay ku soo dhaweyn lahaayeen madaxweynaha Soomaaliya Xasan Sheekh Maxamud iyo wafdi uu hoggaaminay, kuwaasoo la filayo inay gaaraan Columbus maalinta Axadda ah oo ay bishan ku beegan tahay 22-ka.

9/20/2013 1:59 AM EST
Jimco, September 20, 2013 (HOL) — Madaxweynaha Soomaaliya, Xasan Sheekh Maxamuud oo ay wehliyaan wasiiradda arrimaha dibadda Somalia, Fowsiyo Yuusuf Xaaji Aadan, wasiirka maaliyadda, Maxamuud Xassan Suleyman, wasiir-u-dowlaha madaxtooyada, Faarax Cabduqaadir iyo la-taliyeyaal qaas ah ayaa maanta gaaray magaalada Washington DC ee dalka Maraykanka, halkaasoo ay kula kulmi doonaan madax sare ee dalkaas.

9/20/2013 1:53 AM EST
Jimco, September 20, 2013 (HOL) — Ugu yaraan 11-qof oo ka mid ah dadka ka xoogsada jabinta kaawooyinka dhagaxa ayaa ku dhintay shan kalena way ku dhaawacmeen kaddib markii shalay kaawo ay qodayeen ay kula duntay duleedka degmada Kaaraan ee gobolka Banaadir.