3/29/2024
Today from Hiiraan Online:  _
Wararka Maanta- Isniin, Oct 7 , 2013
Booliiska Kenya oo Maanta soo bandhigay magacyada iyo sawirada laba nin oo qayb ka qaatay Weerarkii Westgate Mall

Isniin, Oktoobar 07, 2013 (HOL) — Booliiska dalka Kenya ayaa maanta soo bandhigay magacyada iyo sawirrada laba nin oo Soomaali ah oo la sheegay inay qayb ka qaataan weerarkii bishii hore lagu qaaday dhismaha ganacsi ee Westgate Mall ee magaalada Nairobi.

Magacyada labada ruux ee lasoo bandhigay ayaa waxay kala yihiin: C/qaadir Xuseen Maxamed oo loo yaqaan Maxamed Xuseen, kaasoo la sheegay inuu kasoo jeedo degmada Mandheera ee gobolka Waqooyi-bari ee dalka Kenya iyo Aadan Deeq oo loo yaqaaan Xuseen Cabdi oo isaguna Soomaali ah.

Labadan nin ayaa la sheegay inay ahaayeen labadii nin ee goobta weerarku ka dhacay geeyay kooxaha weerarka afarta maalmood qaatay ku qabsaday suuqaas ganacsi, iyadoo booliisku ay dul-dhigeen helista xogtooda lacag gaaraysa 6,000 oo doollarka Mareykanka ah.

Taliyaha booliiska Kenya, David Mwole Kimaiyo ayaa sheegay in labadan shaqsi ay yihiin kuwii fududeeyay howgalka, waxayna sheegeen in cid walba oo soo xogtooda lasoo socodsiisa haya’daha ammaanka Kenya la siin doono lacagta la ballanqaaday.

Sidoo kale, booliisku waxay sheegeen in gaariga ay labadan nin isticmaaleen ay ka iibsadeen ruux u shaqeeya hay’adaha Qaramada Midoobay ayna uga iibsadeen 06-dii bishii September lacag gaaraysa 34,000 oo shillinka Kenya ah.

Ma aysan sheegin booliisku halka ay labadan nin ku sugan yihiin, waxayse sheegeen inay tani qayb ka tahay baaritaannada ay ku raadinayaan sidii uu ku dhacay weerarkii Westgate iyo ciddii gacanta ka geysatay.

Xarakada Al-shabaab ee Soomaaliya ayaa sheegatay inay weerarkaas iyadu mas’uul ka ahayd, iyadoo kooxdan ay sheegtay inay ugu aargudaysay dad badan oo ciidamada Kenya ay ku laayeen gudaha dalka Soomaaliya.

Hay’adaha ammaanka Kenya ayaa lagu eedeeyay inay ka seexdeen inay ka hortagaan weerarkaas, iyadoo madaxweynaha dalkaas uu sheegay inuu si dhaqso ah ku magacaabi doono guddi baaritaan ku sameeya sidii weerarka uu ku dhacay iyo dal-daloollada ammaan ee jira.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
10/7/2013 3:02 PM EST
Isniin, Oktoobar 07, 2013 (HOL) — Wasiirka Arrimaha gudaha Somaliland Cali Maxamed Warancade, ayaa faahfaahin ka bixiyey dilkii laba cisho ka hor ka dhacay magaaladda Hargeysa oo afar dhalinyaro ahi dhagax ku dileen wiil dhalinyaro ah.

10/7/2013 11:59 AM EST
Isniin, Oktoobar 07, 2013 (HOL) — Xildhibaannada labada aqal ee Itoobiya ayaa maanta u doortay madaxweynaha dalkaas, Mulatu Teshome Wirtu oo ahaa wasiirkii hore ee beeraha dalka Itoobiya, kaasoo xilka hayn doona lixda sano ee soo socota.

10/7/2013 10:23 AM EST
Isniin, Oktoobar 07, 2013 (HOL) — Ra’iisul wasaaraha Somalia, Cabdi Faarax Shirdoon (Saacid) ayaa sheegay Axaddii shalay in burburinta Al-shabaab ay la kaashan doonaan dalalka caalamka iyo kuwa dariska la ah Soomaaliya.

10/7/2013 9:41 AM EST
Isniin, Oktoobar 07, 2013 (HOL) — Madaxweynaha Somalia, Xasan Sheekh Maxamuud oo maanta kulan kula yeeshay xarunta madaxtooyada sarakiisha ciidamadda xoogga dalka ayaa amaanay sida ay ciidamadu u shaqeeyaan.

10/7/2013 8:12 AM EST
Isniin, Oktoobar 07, 2013 (HOL) — Baarlamaanka Soomaaliya ayaa dib u celiyay maanta hidise sharciyeed ku saabsan horumarinta bangiga dhexe ee Soomaaliya oo ay soo gudbisay wasaaradda maaliyadda Soomaaliya.

10/7/2013 8:06 AM EST
Isniin, Oktoobar 07, 2013 (HOL) — Hoggaamiyaha maamulka KMG ah ee Jubba Sheekh Axmed Max’ed Islaam Axmed Madoobe oo maanta shir jaraa’id ku qabtay madaxtooyada ee Kismaayo ayaa uga warbixiyay arimo badan oo ay kamid yihiin safarro uu kusoo maray dalal kala duwan, shirka la filayo in uu ka dhaco Muqdisho iyo weliba wafdigii ka socday dowladda Soomaaliya ee dhawaan soo gaaray magaalada Kismaayo.

10/7/2013 7:49 AM EST
Isniin, Oktoobar 07, 2013 (HOL) — Shir looga hadlayo shidaal la baarayo Soomaaliya ayaa maanta ka furmay magaalada London ee xarunta Britain waxaana shirkaas ka qaybgalay wasiirka khayraadka dalka, C/risaaq Cumar Maxamed iyo mas’uuliyiin ka socda shirkadaha shidaalka baara iyo shirkad laga leeyahay dalka Britain oo Soomaaliya ka baaraysa shidaalka.

10/7/2013 4:15 AM EST
Isniin, Oktoobar 07, 2013 (HOL) — Shir ay AMISOM soo qaban-qaabisay oo laba maalmood ka socday ayaa lagu soo gabgabeeyay gobolka Minnesota ee dalka Mareykanka. Kulankan ayaa waxaa kasoo qayb-galay xubno ka kala yimid Waqooyiga Ameerika kana koobnaa aqoon-yahanno, culumaa’uddiin, haween iyo dhallinyaro.

10/7/2013 4:09 AM EST
Isniin, Oktoobar 07, 2013 (HOL) — Ugu yaraan 50-qof ayaa ku dhintay tiro intaas ka badanna way ku dhinteen kaddib mudaaharaadyo rabshado wata oo shalay oo Axad ahayd ku dhexmaray dalka Masar.

10/7/2013 2:21 AM EST
Isniin, Oktoobar 07, 2013 (HOL) — Maamulka Somaliland ayaa sheegay inay albaabbada isugu dhufteen xafiis lagu bixin jiray baasaboorka Soomaaliga ee E-Passport-ka loo yaqaan, iyagoo sheegay inay maxakamad soo taagayaan shaqsiyaadkii ku lugta lahaa howshan.

10/7/2013 2:10 AM EST
Isniin, Oktoobar 07, 2013 (HOL) — Guddoomiyaha gobolka Banaadir ahna duqa Muqdisho, Maxamuud Axmed Nuur (Tarsan) oo ka qaybgalay kulan ka dhacay degmada Howlwadaag ayaa ugu baaqay shacabka Muqdisho inay iska dhiciyaan Al-shabaab oo aysan u ogolaan degmooyinkooda.

10/7/2013 2:09 AM EST
Isniin, Oktoobar 07, 2013 (HOL) — Dowladda Mareykanka ayaa shaaciysay magaca sarkaalkii ay ku weerareen xeebta degmada Baraawe ee gobolka Shabeellada Hoose, halkasoo ah saldhigga ugu weyn ururka Al-shabaab ay ku leeyihiin Koonfurta Soomaaliya.