5/18/2021
Today from Hiiraan Online:  _
Wararka Maanta- Axad, Oct 6 , 2013
Xildhibaanno ka tirsan Baarlamaanka Somalia oo Maanta gaaray Magaalada Beledweyne ee Xarunta Gobolka Hiiraan (SAWIRRO)



Axad, Oktoobar 06, 2013 (HOL) — Xildhibaanno ka tirsan baarlamaanka Soomaaliya ayaa duhurnimadii maanta ka degay garoonka diyaaradaha magaalada Beledweyne, halkaa oo ay ku soo dhaweeyeen mas'uuliyiinta maamulka gobolka Hiiraan oo uu hogaminayay guddoomiyaha gobolka iyo xubno ka socday wasaarrada arrimaha gudaha oo horay u sii joogay magaalada.

Xildhibaannada ka tirsan baarlamaanka  oo maalmaha soo socda ku sii sugnaan doona magaalada ayaa ujeedada socdaalkkooda ku sheegay ugu horeyn dhameynta khilaaf u dhaxeeya beello wada dega qeybo ka mid ah gobolka Hiiraan gaar ahaan deegaannka Deefoow oo bilihii ugu danbeeyayba uu ka dhax jiray muran dhinaca deegaannka ah oo in badan sababay gacan ka hadal.

''Marka hore ujeedada socdaalka aan u soo gaarnay magaalada Beledweyne waa dhameynta khilaafka u dhaxeeya beellaha walaalaha ah, waad og-tihiin colaada beellahaas  mudo ayeey soo jiitameysay, intaas oo dhanna dadaalo nabadeed ayaa socday, annagana waxaan rabnaa in xoojinno dadaalada nabadeed ee horay loo waday,'' ayuu yiri xildhibaan Nuur Iidoow Beyle oo HOL la hadllay.

Xildhibaanka ayaa uga mahad celiyay maamulka gobolka Hiiraan, odayaasha dhaqanka, iyo saraakiisha ciidamada Jabuuti ee AMISOM dadaalka ay u galleen sidii wax looga qaban lahaa colaada beellaha khilaafku soo kala dhax-gallay, isaga oo intaa raaciyay in ay qaadan doonaan dhinacooda kaalinta arintaa uga aadan.

''Howshaa nabadeynta markii horeba waa ay soctay oo gacan weyn waxaa ka geystay maamulka halkan ka jira, odayaasha dhaqanka beellaha iyo saraakiisha ciidamada aynu walaalaha nahay ee Jabuuti oo runtii aan siweyn ugu mahad celiynayo, annagana waxaan qaadan doonaa kaalinta arinta nooga aadan oo ah in aynu dhameystirno dadaaladaas markii horeba socday,'' ayuu hadalkiis sii raaciyay xildhibaan Nuur.

Xildhibannada maanta gaaray Beledweyne ayaa kala ah xildhibaan C/llaahi Goodax Barre, xidlhibaan Max'ed Cumar Max'uud, xildhibaan C/naasir Gaarane Cumar, xildhibaan Nuur Iidoow Beyle iyo xildhibaan Duniyo Max'ed Cali.

Dhinaca kale, xildhibaan Nuur Iidoow ayaa HOL u sheegay in marka laga soo tago xilinta khilaafka u dhaxeeya beelaha walaalaha ee wada dega gobolka, in ay guda galli doonaan wadatashidii ku aadan dhismaha maamulka gobolka oo ay horey u wadeen xubno ka socday wasaarrada arrimaha gudaha xukuumada Soomaaliya.

''Sidoo kale, waxaan guda-galli doonaan wadatashiyadii horay u socday ee dhismaha maamulka gobolka, waxaan rabaa in aan mar kale ku celiyo ma jiro maamul bulshada kor looga keenayo, iyaga ayaa dhisanaya maamulkooda, sidaa daraadeed waxaan qeyb ka noqon doonaan wada tashiyada socda si bulshada gobolka gacan loogu siiyo in ay maamulkooda sameystaan,'' ayuu yiri xildhibaan Nuur.

Mudanayaasha baarlamaanka Soomaaliya ee maanta gaaray magaalada Beledweyne ayaa ku biiray xubno socda dowladda oo horay u sii joogay Beledweyne, isla markaana la tashiyo iyo kulamo intaba la lahaa qeybaha bulshada.




C/raxmaan Diini, Hiiraan Online
[email protected]
Beledweyne, Soomaaliya












Click here
10/6/2013 11:05 AM EST
Axad, Oktoobar 06, 2013 (HOL) — Waaxda haweenka iyo arrimaha bulshada ee wasaaradda horumarinta adeegga bulshada dowladda Somalia oo gacan ka helaysa hay'ada caalamiga ah ee Qaramada Midoobay u qaabilsan qoyska ee UNFPA ayaa maanta Muqdisho kusoo gaba-gabeysay siminnaar looga hadlayay tacadiyada loo geysto haweenka Soomaaliyeed.

10/6/2013 9:08 AM EST
Axad, October 06, 2013(HOL) :- Wafdi uu horkacayo hogaamiyaha maamulka KMG ee Jubba Sheekh Axmed Max’ed Islaam (Axmed Madoobe) ayaa maanta dib ugu soo laabtay dalka, kadib safarro kala duwan oo uu kusoo maray dalal kala duwan.

10/6/2013 8:52 AM EST
Axad, Oktoobar 06, 2013 (HOL) — Xoghayaha arrimaha dibadda Mareykanka John Kerry ayaa sheegay inay sii wadayaan howlgallada ay ku baacsanayno kooxaha mas’uulka ka ah weerarrada argagaxisada ah ee ka dhaca Somalia iyo Liibiya.

10/6/2013 8:29 AM EST
Axad, Oktoobar 06, 2013 (HOL) — Ra’iisul wasaaraha Somalia, Cabdi Faarax Shirdoon (Saacid) oo ka hadlayay waxqabadka xukuumaddiisa tan iyo markii la magacaaba oo ku beegnayd 06-da Oktoobar 2012 oo maanta ku beegan ayaa wuxuu sheegay in isku shaandheyn uu ku sameyn doono wasiirradiisa, isagoo xusay in la ballaarin doono.

10/6/2013 7:16 AM EST
Axad, Oktoobar 06, 2013 (HOL) — Fannaanada weyn ee Hibo Maxamed Hudoon (Hibo Nuura) oo bishii hore dib ugu soo laabatay Muqdisho ayaa rajo weyn ka muujiyay in Muqdisho ay dib ugu laabanaso Muqdishadii hore.

10/6/2013 4:25 AM EST
Axad, Oktoobar 06, 2013 (HOL) — Sheekh Maxamed Cabdi Umal oo ka mid ah culumada Islaamka ee dalka Kenya ayaa sheegay in loogu hanjabay in la dili doono, balse aysan taasi wax cabsii ah gelin doonin oo uu sii wadi doono wacyi-gelinnada diiniga ah.

10/6/2013 3:52 AM EST
Axad, Oktoobar 06, 2013 (HOL) — Ergyga Midowga Afrika ee arrimaha Soomaaliya, Maxamed Saalax Anaadiif iyo wafdi uu hoggaaminayo oo ka socda AMISOM ayaa kulan kula yeeshay magaalada Minneapolis jaaliyadda Soomaaliyeed ee gobolka Minnesota ku nool.

10/6/2013 3:35 AM EST
Axad, October 06, 2013(HOL) :- Qaraxan oo ahaa mid xooggan islamarkaana siweyn looga maqlayay guud ahaan xaafadaha kala duwan ee magaalada Kismaayo ayaa saaka aroortii ka dhacay xaafadda Faanoole ee magaalada Kismaayo.

10/6/2013 3:09 AM EST
Axad, Oktoobar 06, 2013 (HOL) — Dowlada Mareykanka ayaa sheegtay inay ka dambeysay weerarkii habeen hore lagu qaaday degmada Baraawe ee gobolka Shabeellada hoose oo ah saldhigga ugu weyn ee Al-shabaab ay ku leedahay Koonfurta Soomaaliya.

10/6/2013 2:48 AM EST
Axad, Oktoobar 06, 2013 (HOL) — Wasiirka arrimaha gudaha iyo ammaanka Qaranka, C/kariin Xuseen Guuleed oo ka hadlayay tababar loo furayey qaar ka mid ah saraakiisha booliiska Somalia ayaa sheegay in booliiska Somalia uu ka tayo wanaagsan yahay booliiska dalka Ciraaq.