5/16/2021
Today from Hiiraan Online:  _
Wararka Maanta- Sabti, Oct 5 , 2013
Al-shabaab oo ka warbixisay weerar lala beegsaday guri ku yaalla degmada Baraawe ee Gobolka Shabeellada Hoose


Sabti, Oktoobar 05, 2013 (HOL) — Xarakada Al-shabaab ayaa ka hadashay weerar ay ciidammo ajnabi ah ku qaadeen xalay gellinkii dambe guri ku yaalla degmada Baraawe ee gobolka Shabeellada Hoose.

Afhayeenka howlgallada ee Al-shabaab, Sheekh C/casiis Abuu-Muscab ayaa u sheegay warbaahinta in weerarkaas ay soo qaadeen dagaalyahanno reer galbeed ah, balse ay ku fashilmeen, isagoo sheegay in dhankooda hal ruux uu kaga dhintay.

“Xalay 2:00 habeennimo ayaa ciidammo ajnabi ah oo doon yar watay waxay soo gaareen xeebta degmada Baraawe, waxayna doonayeen inay weeraraan guri ku dhow xeebta oo ay ku sugnaayeen rag mujaahidiin ah, balse markii ay xubnihii guriga ku sugnaa arkeen ayaa waxaa billowday dagaal muddo socday,” ayuu yiri Sheekh Abuu-muscab.

Sidoo kale, afhayeenku wuxuu xusay in dagaalkaas ay ciidamadii weerarka soo qaaday ay khasaare ku gaarsiiyeen, balse ma uusan sheegin tirade inta ay tahay. Isagoo sheegay in Al-shabaab uu ruux ka dhintay khasaare kalena aysan soo gaarin.

“Ciidamadii weerarka soo qaaday markii ay arkeen in qorshahooda uusan u suuro-galayn ayay dib ugu laabteen doonidii ay wateen iyagoo aaday halkii ay ka yimaadeen oo markab dushiis ahaa, wayna ku fashilmeen weerarkii ay soo qaadeen,” ayuu yiri afhayeenka howlgallada Al-shabaab.

Wararka ayaa waxay sheegayaan in gurigaas la duqeeyay ay ku sugnaayeen xubno ka tirsan Al-shabaab, kuwaasoo ay ku jireen hoggaamiyeyaasha ugu sarreeya kooxdan, inkastoo uusan sheegin afhayeenku magacyada xubnaha ku sugnaa guriga la weeraray.

Illaa iyo hadda ma jirto cid sheegatay inay weerarkaas ka dambeysay, balse wuxuu noqonayaa weerarkii labaad oo ciidammo ajnabi ah ay ku qaadaan deegaannada Koonfurta Soomaaliya ee ay Al-shabaab gacanta ku hayso tan iyo markii uu sannadkan billowday.

Xaaladda degmada Baraawe oo 200-km dhinaca Koonfureed kaga beegan Muqdisho ayaa daggan, inkastoo goobjoogayaal ku sugan degmadaas ay shegayaan in ciidammo badan oo Al-shabaab ay dhinac walba u marayaan degmada.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
10/5/2013 8:57 AM EST
Sabti, October 05, 2013(HOL) -Wasiirka warfaafinta, Boostada iyo gaadiidka Soomaaliya C/laahi Ceelmooge Xirsi ayaa oo dhawaantan kasoo qaybgalay shirweynaha 38aad ee wadamada xubnaha ka ah hay’ada caalamiga ah ee duulimaadyada iyo saadaasha hawada ee (ICAO) oo gaaraya 191 dal ayaa sheegay in Soomaaliya dib loogu soo celinayo lacag malaayiin ah oo hawada Soomaaliya canshuur ahaan looga aruuriyay 22-kii sano ee Soomaaliya ay burbursanayd.

10/5/2013 8:51 AM EST
Sabti, Oktoobar 05, 2013 (HOL) — Xukuumadda Itoobiya ayaa shaacisay in aysan u qorsheynayn xilligan inay ciidamadeeda kala baxdo Soomaaliya, kaddib markii Al-shabaab ay ku hanjabtay inay weerarro la beegsanayso dalalka ay ciidamadu ka joogaan Soomaaliya.

10/5/2013 8:37 AM EST
Sabti, Oktoobar 05, 2013 (HOL) — Madaxweynaha Somalia, Xasan Sheekh Maxamuud oo maanta tababar u furay boqolaal sakaal oo ka tirsan ciidamada booliiska Somaalia ayaa ka dalbaday ciidamada booliiska inay la yimaadaan anshax suuban.

10/5/2013 8:12 AM EST
Sabti, Oktoobar 05, 2013 (HOL) — Munaasabad siweyn loo soo agaasimay islamarkaana shahaado lagu guddoon siinayay 75 ardey oo ka qalin-jabisay dugsiga Universal ayaa lagu qabtay magaalada Beledweyne ee xarunta gobolka Hiiraan.

10/5/2013 7:51 AM EST
Sabti, October 05, 2013(HOL) Wafdi uu horkacayo abaanduulaha ciidamada xoogga dalka Soomaaliya Jen. C/risaaq Qaliif Cilmi ayaa shalay kasoo dagay garoonka diyaaradaha magaalada Kismaayo, iyadoona wafdigan ay qeyb ka yihiin saraakiil ka tirsan ciidamada AMISOM.

10/5/2013 7:22 AM EST
Sabti, Oktoobar 05, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa ka tacsiyeeyay tahriibayaal Soomaali ah oo ku geeriyooday xeebaha jasiirada Lampedusa ee dalka Talyaaniga.

10/5/2013 3:26 AM EST
Sabti, Oktoobar 05, 2013 (HOL) —Weerar ay geysteen ciidamo ajanebi ah oo aan ilaa iyo hadda haybtooda la aqoonsan ayaa goor hore oo saaka ah ka dhacay degmada Baraawe ee gobolka Shabeellada Hoose.

10/5/2013 2:48 AM EST
Sabti, Oktoobar 05, 2013 (HOL) —Wafdi ballaaran oo uu hoggaaminayay madaxweyne ku-xigeenka Puntland C/samed Cali Shire, oo muddo 5 todobaad ka badan booqasho ku joogey degmada Taleex ee gobolka Sool, ayaa shalay dib ugu soo laabtay magaalada Garoowe ee xarunta maamulka Puntland.