Xildhibaanada Baarlamaanka oo lagu wado inay ka doodaan Mooshinkii laga keenay Xukuumadda Federaalka Somalia
Arbaco, May 22, 2013 (HOL) — Xildhibaannada baarlamaanka Soomaaliya ayaa lagu
wadaa inay maanta ka doodaan mooshin ka dhan ah xukuumadda Soomaaliya kaasoo
dhawaan la horgeeyay baarlamaanka, inkastoo xubno ka mid ah kuwii saxiixay ay
sheegeen inay ka la laabteen go’aankooda.
Doodda baarlamaanka ayaa waxay u badnaan
doontaa ka hadalka wixii u qabsoomay xukuumadda Soomaaliya muddadii ay jirtay,
iyadoo kulankan maanta uu yahay mid k duwan kulammadii hore ee baarlamaanka.
Mudanayaasha baarlamaanka ayaa u muuqda
kuwo ku qaybsan mooshinka laga keenay xukuumadda iyadoo xildhibaannadii
mooshinka keenay lagu wado inay kulanka ka faahfaahiyaan dhaliilaha ay
xukuumadda u soo jeedinayaa halka, xildhibaannada kasoo horjeeda mooshinkana ay
ka hadli doonaan aragtidooda.
Kulankan ayaa noqon doona kii ugu
xasaasisanaa ee baarlamaanka Soomaaliya uu yeesho, iyadoo aysan jirin wax hadal
ah oo weli kasoo baxay xukuumadda Soomaaliya, kaasoo ku aaddan mooshinka ka
yaalla golaha baarlamaanka.
Inkastoo aan si dhab ah loo ogeyn xilliga
xukuumadda loo qaado codka kalsoonida ah ayaa haddana, waxaa la sheegayaa in dooddu
ay socon doonto maalmaha soo socda, ugu dambeynna xukuumadda cod loo qaadi
doono haddii la isku waafaqo.
Labadii maalmood ee lasoo dhaafay
xildhibaannada baarlamaanku waxay ansixiyeen qodobbo ay soo gudbisay wasaaradda
maaliyadda oo ku saabsan sida loo isticmaalayo daqliga dowladda iyo heshiisyada
shirkadaha shisheeye iyo sidoo kale xisaab-xirkii miisaaniyaddii saddexdii
bilood ee sannadkii hore ugu dambeysay ee ay dowladdu isticmaashay.
Maxamed Xaaji Xuseen, Hiiraan Online
[email protected]
Muqdisho, Soomaaliya