3/19/2024
Today from Hiiraan Online:  _
Wararka Maanta- Talaado, May 21, 2013
Hay’adda Shaqada Adduunka ILO oo Muqdisho ka furtay kulan lagu hadlayo Ganacsiga Haweenka Soomaaliyeed (SAWIRRO)


Talaado, May 21, 2013 (HOL) — Hay’adda shaqada adduunka ee ILO ayaa maanta ka furtay magaalada Muqdihso kallan looga hadlayo horumarinta ganacisga Haweenka Soomaaliyeed, kaasoo dib loogu eegayo horumarada laga sameeyay ganacsiyo yar-yar oo horay loogu furay haween danyar ah oo Soomaaliyeed.

Kulankan oo socon doona muddo laba maalmood ah ayaa furitaankiisa waxaa goobjoog ka ahaa mas’uuliyiinta ka socday hay’adda ILO iyo ururka Midowga Yurub oo maalgelinayay tababarradii loo sameeyay haweenka ganacsatada Soomaaliyeed.

Madaxa hay’adda samafalka ee HRD, C/llaahi Yuusuf oo ka mid ah hay’adihii horay u fuliyay tababarrada haweenka ganacsatada ah iyo maalgelintooda oo furtay tababarkan ayaa sheegay in kulankan uu ku saabsan yahay sidii loo oglaan lahaa waxyaabihii u qabsoomay haweenkii ganacsiga loo furay iyo kuwii la tababaray.

Sidoo kale, furitaankii kulanka waxaa ka hadlay C/llaahi Axmed Garuun oo ka mid ah culummada Soomaaliyeed, isagoo ka sheekeeyay diinta Islaamka iyo ganacsiga haweenka, wuxuuna xusay in haweenku ay tiir dhexaad u yihiin qoyska iyo bulshada caalamka.

Maryan Maxamed Cilmi oo ka socotay ururka ganacsatada haweenka Soomaaliyeed oo hadal ka jeedisay kulanka ayaa sheegay in ururkooda uu xarumo kala duwan ku leeyahay dalka oo dhan, ayna maalgeliyaan haweenka aan shaqooyinka haysan, si ay u hesho shaqo ay ka hesho nolol maalmeedka qoyskeeda.

 

Agaasimaha waaxda haweenka iyo caruurta ee wasaaradda horumarinta adeegga bulshada, Maxamed Cumar Nuur oo isaguna goobta ka hadlay ayaa sheegay in wasaaraddu ay soo dhaweynayso dadaal walba oo lagu xoojinayo horumarinta haweenka Soomaaliyeed, isagoo sheegay in baritaan dhawaan la sameeyay lagu ogaaday in 61% ay bulshada Soomaaliyeed yihiin haween.

“Maadaama bulshada ay inteeda badan noqdeen haween waa lagu qasban yahay in la xoojiyo awoodda haweenka ee dhinacyada waxbarashada iyo ganacsiga, si dalkan uu u noqdo mid horumar dhaqso ah sameeya,” ayuu yiri agaasimaha oo hadalkiisa ku daray in wasaaradda haweenku ay bisha December ee sannadkan ka sameyn doono degmooyinka Muqdisho xarumo lagu xanaaneeyo dadka bulshada ugu jilicsan sida caruurta, haweenka iyo dadka xanuunsan.

Intaas kaddib waxaa kulanka ka hadlay wakiillo ka socday Midowga Yurub iyo ILO, kuwaasoo ka koobnaa afar ruux oo kala ahaa laba dumar ah iyo laba rag ah, waxayna sheegeen inay aad ugu faraxsan yihiin inay kluanka kasoo qaybgalaan ayan arkaan barnaamij ku saabsan xoojinta haweenka Soomaaliyeed.

Emily Gallaway oo ka socotay ILO ayaa sheegtay in hay’adooda ay ka go’an tahay inay qayb weyn ka qaadato sidii lagu xoojin lahaa ganacsiga haweenka Soomaaliyeed, iyadoo sheegtay in ururkooda uu lasii shaqeyn doono ganacsatada haweenka Soomaalida.

Dhanka kale, Francesca Pawarini oo iyaduna ka socday Midowga Yurub oo ka hadashay kulanka ayaa sheegay in ururkeedu uu la shaqeeyo ururro badan oo Soomaaliyeed, ayna ka go’an tahay inay qaataan talooyinka kasoo baxa kulammada noocan oo kale ah, ayna ka dhabeyn doonaan ballanqaayada ay sameeyaan oo dhan.










 

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
5/21/2013 3:21 PM EST
Talaado, May 21, 2013 (HOL) — Degmada Buurhakabo ee gobolka Bay yaa maanta loo doortay guddoomiye cusub kaasoo lagu magacaabo, Axmed Maxamed Yuusuf oo loo yaqaano (Axmed Layaab), doorashada ayaa waxaa kasoo goobjoog ka ahaa wafuud ka socatay wasaaradda arrimaha gudaha iyo Amniga Qaranka ee dowladda Soomaaliya iyo madaxda maamulka Bay, waxaa kaloo goob-joog ka ahaa ahaa madxda AMISOM iyo ugaasyada Digil iyo Mirifle.

5/21/2013 12:14 PM EST
Talaado, May 21, 2013 (HOL) — Madaxweynaha Somaliland Mudane Axmed Maxamed Maxamuud (Siilaanyo), ayaa maanta xafiiskiisa ku qaabilay Safiirka midowga Yurub u qaabilsan Soomaaliya Michele Cervone d’Urso.

5/21/2013 12:07 PM EST
Talaado, May 21, 2013 (HOL) — Kulan ay salaadiinta Soomaaliyeed maanta ku yeesheen Muqdisho ayaa lagu furay xarun cusub, iyadoo sidoo kalena ay goluhu taageero u muujiyeen xukuumadda Soomaaliya ee uu hoggaaminayo ra’iisul wasaare Cabdi Faarax Shirdoon (Saacid) oo mooshin laga geeyay baarlamaanka Soomaaliya.

5/21/2013 9:44 AM EST
Talaado, May 21, 2013 (HOL) — Bannaanbax lagu taageerayay xukuumadda Soomaaliya laguna dalbanayay in la joojiyo mooshinka ay xildhibaanno ka tirsan baarlamaanka ka gudbiyeen xukuumadda ayaa maanta ka dhacay Magaalada Muqdisho.

5/21/2013 9:00 AM EST
Xaflad lagu soo bandhigay hidihii iyo dhaqankii soo jireenka ahaa ee Soomaaliyeed ayaa lagu qabtay hotelka Liaco Regecny ee magaalada Nairobi ee dalka Kenya.

5/21/2013 8:07 AM EST
Talaado, May 21, 2013 (HOL) — Afhayeenka ciidamada AMISOM ayaa ka hadlay maanta howlgallo ay booliiska dowladda Soomaaliya iyo kuwa AMISOM ka wadaan Muqdisho, kuwaasoo lagu soo qabqabtay boqollaal qof oo u badan dhallinyaro.

5/21/2013 7:04 AM EST
Talaado, May 21, 2013 (HOL) — Marka laga soo tago howlgalka ciidamada maamulka gobollka Hiiraan ay ka wadaan xaafaddaha magaalada Baladweyne, dhinaca waxaa soconaya kulamo kula duwan oo ay leeyihiin mas'uuliyiinta maamulka gobollka, saraakiisha ciidamada Jabuuti iyo odayaasha beellaha dega gobollka Hiiraan kuwaasoo qeyb ka ah dadaal ballaaran oo maamulka iyo saraakiisha AMISOM ugu jiraan 22 sano kadib in bulshadu kaalin ku yeellato sugida amniga.

5/21/2013 7:01 AM EST
Talaado, May 21, 2013 (HOL) — Gudoomiyaha Golaha Wakiiladda C/raxmaan Maxamed Cabdilaahi Cirro, ayaa sheegay inuu madaxweynaha Soomaaliya dhaawacay qodobadii Somaliland iyo Soomaaliya ku heshiiyeen shirkii Ankara ee Turkiga.

5/21/2013 2:04 AM EST
Talaado, May 21, 2013 (HOL) — Xildhibaanno ka mid ah kuwii mooshinka ka geeyay xukuumadda Soomaaliya ayaa qaarkood sheegay inay ka laabteen go’aankaas, iyagoo xusay inay u tanaasuleen danta dalka, dadka iyo diinta Islaamka oo ay u dhaarteen inay ilaalinayaan.