8/22/2019
Today from Hiiraan Online:  _
Wararka Maanta- Sabti, May 18, 2013
Wafdi ka socda IGAD oo Magaalada Muqdisho ku sugnaa oo lagu wado inay Maanta Gaaraan Magaalada Kismaayo


Sabti, May 18, 2013 (HOL) — Wafdigii ka socday urur-goboleedka ee ku sugnaa Muqdisho ayaa lagu wadaa inay maanta gaaraan magaalada Kismaayo ee xarunta gobolka Jubbada Hoose, halkaasoo ay ka billaabi doonaan howl ay ku indho-indheynayaan xaaladda ka jirta magaaladaas.

Wafdigan oo ah guddi xaqiiqo-raadin ayaa waxaa hoggaaminaya xoghayaha guud ee IGAD, Inj. Maxbuub Macallin, waxayna Muqdisho kulammo kula qaateen madaxweynaha Soomaaliya, Xasan Sheekh Maxamuud iyo ra'iisul wasaaraha, Cabdi Faarax Shirdoon (Saacid).

Xubnaha wafdigan ayaa la sheegay in marka ay Kismaayo tagaan ay kula kulmi doonaan waxgarada deegaanka, iyagoo sidoo kalena kulammo la yeelan doona siyaasiyiinta degmadaas.

Guddigan oo looga dhawaaqay shirkii horraantii bishan ay madaxda IGAD ku yeesheen Addis Ababa ayaa waxay si aad ah ugu kuurgeli doonaan xaaladda siyaasadeed iyo midda amni ee ka jirta Soomaaliya si ay warbixin ugu gudbiyaan madaxda IGAD oo bishan dhammaadkeeda mar kale ku kulmi doona Addis Ababa.

Booqashada wafdigan ay ku tagayaan magaalo xebeedda Kismaayo ayaa waxay kusoo beegmaysaa iyadoo magaaladaas looga dhawaaqay laba maamul oo iska soo horjeeda, kuwaasoo ay kala hoggaaminayaan Col. Barre Hiiraale iyo Sheekh Axmed Madoobe oo mid walba uu sheeagnayo inuu isagu yahay madaxweynaha maamulka Jubaland.

Magaalada Kismaayo ayaa waxaa hadda ku sugan wafdi ka socda dowladda Soomaaliya oo isugu jira xubno ka socda labada gole ee dowladda Soomaaliya, kuwaasoo isku dayay inay xal u heleen arrimaha siyaasadeed ee magaalada Kismaayo.

Dowladda Soomaaliya ayaa horay ugu dhawaaqday inaysan raalli ka ahayn maamul laga sameeyo Kisamayo oo aysan dowladdu hormuud u ahayn, waxayna dowladdu ku tilmaantay shirkii lagu dhisay Jubaland mid aan waafaqsanayn dastuurka dalka.

Maxamed Xaaji Xuseen, Hiiraan Online
[email protected]
Muqdisho, Soomaaliya









Click here
5/18/2013 10:18 AM EST
Sabti, May 18, 2013 (HOL) — Xubno ka tirsan maamulka gobollka Hiiraan uu horkacayo guddoomiyaha maamulka gobollka Cabdi Faarax Laqanyo ayaa saacadihii aynu soo dhaafnay kormeer ku tagay deegaanno ka baxsan magaalada Baladweyne iyaga oo u kuur-galaya xaalada nabad-galyo iyo tan nolalleed deegaannada gobollku ka kooban yahay.

5/18/2013 9:13 AM EST
Sabti, May 18, 2013 (HOL) — Madaxweynaha Somalia, Xasan Sheekh Maxamuud ayaa markii ugu horreysay ka hadlay arrimaha ka taagan Jubbooyinka, isagoo sheegay in waxyaabaha ka taagan ay qayb ka yihiin waxyaabihii ay muddada ka digaysay dowladda.

5/18/2013 8:42 AM EST
Sabti, May 18, 2013 (HOL) — Dadweynaha Somaliland ayaa maanta u dareeray dabaaldega maalinta madaxbanaanidda Somaliland ee 18 May, kaas oo sanad walba laga xuso dalka gudihiisa iyo dibadiisa. Kumanaankun oo shacabka magaaladda Hargeysa, ayaa saaka hiirtii waaberi ku soo kalahay wadada badhtamaha magaladda Hargeysa oo ay socod ku marayeen ciidamada kala duwan ee Somailand, ardayda jamaacadaha, dugsiyada iyo ururada bulshadda oo ay hor socdaan madax dhaqameedka gobolka Maroodi jeex.

5/18/2013 8:36 AM EST
Sabti, May 18, 2013 (HOL) — Munaasibado iska soo horjeeda ayaa maanta ka dhacay gobolka Sool iyo deegaanka Cayn ee Buuhoodle, kuwaasoo dhamaantood ahaa kuwo lagu xusayay 18-ka May.

5/18/2013 3:55 AM EST
Sabti, May 18, 2013 (HOL) — AMISOM ayaa muujisay mowqifka ay ka taagan yihiin maamullada looga dhawaaqay magaalada Kismaayo ee xarunta gobolka Jubbada Hoose, kuwaasoo u muuqda inay iska soo horjeedaan.