12/15/2019
Today from Hiiraan Online:  _
Wararka Maanta- Khamiis, Jun 27, 2013
Dowladda Soomaaliya oo ka Hadashay Joogitaanka uu Sheekh Xasan Daahir joogo Degmada Cadaado ee Gobolka Galguduud



Khamiis, Juun 27, 2013 (HOL) — Dowladda federaalka Soomaaliya ayaa ka hadashay joogitaanka Sheekh Xasan Daahir Aweys oo ka mid ahaa xubnihii sar-sare ee Al-shabaab oo dhawaan kasoo goostay ee degmada Cadaado oo ah xarunta maamulka Ximan iyo Xeeb.

Afhayeenka madaxweynaha Soomaaliya, Inj. C/raxmaan Cumar Cismaan (Yariisow) oo ka hadlay arrintan ayaa sheegay inuusan diyaar u ahay inuu hadda ka hadlo qorshaha dowladda ee ku aaddan Sheekh Xasan, balse uu sheegayo in dowladda Soomaaliya ay soo dhaweynayso cid walba oo Soomaali ah oo ka soo baxda Al-shabaab oo aan ahayn ajaanibta iyo dadka dambiyada waaweyn galay.

“Xasan Daahir Aweys wuxuu hadda la joogaa maamulka Ximan iyo Xeeb oo uu isku soo dhiibay, arrimaha ku saabsan isaga iyo dowladda Soomaaliyana runtii si guud uma siin karno saxaafadda, balse siyaasaddeena guud mar walba waxay ahayd inay soo dhaweynayso ayna la hadlayso cid walba oo dib u heshiisiinta ka qayb-qaadanaysa oo aan doonayn inay dagaal wax ku raadiso,” ayuu yiri Inj. Yariisow.

Sidoo kale, afhayeenku wuxuu sheegay in dowladda Soomaaliya ay ka war-haysay dhaqdhaqaaqyadii ugu dambeeyay ee Sheekh Xasan Daahir Aweys tan iyo markii uu dhacay dagaalkii degmada Baraawe, sidoo kalena ay la socdeen isku dhiibidda uu isku dhiibay maamulka Ximan iyo Xeeb.

“Dowladdu aad bay ula socotay dhaqdhaqaaqa Sheekh Xasan Daahir tan iyo markii ay dagaalladu ka dhacay dheceen degmada Baraawe, isku-dhiibiddii uu isku-dhiibay maamulka Ximan iyo xeebna waan la soconnay, waxaana u aragnaa inay habboon tahay in la qaato nabadda iyo dib u heshiisiinta,” ayuu mar kale yiri Inj. Yariisow.

Warar hoose oo la helayo ayaa sheegaya inay socdaan dadaallo ay dowladdu ku doonayso in loogu soo gacan-geliyo Sheekh Xasan Daahir Aweys, kaasoo u socda maamulka Ximan iyo Xeeb iyo dowladda Soomaaliya, balse arrintan kama uusan hadlin afhayeenka madaxweynaha Soomaaliya.

Dhanka kale, odayaal ay isku hayb yihiin Sheekh Xasan Daahir ayaa shalay gellinkii dambe waxaa la sheegay inay madaxweynaha Soomaaliya u direen codsi ah in dowladdu ay cafis u fidiso Sheekh Xasan Daahir maadaama uu ka baxay fikirkii Al-shabaab uuna dib ugu soo laabtay beeshiisa. Inkastoo aan la ogeyn jawaabta uu arrintaas ka bixiyay bixiyay madaxweynaha Soomaaliya, Xasan Sheekh Maxamuud.

Sheekh Xasan Daahir Aweys iyo toban xubnood oo taageerayaashiisa ah ayaa kasoo goostay Al-shabaab horraantii toddobaadkan, iyagoo xilli habeen ah kaga soo baxday xeebta degmada Baraawe ee gobolka Shabeellada Hoose dooni yar, iyagoo gaaray deegaanno ka tirsan gobolka Galguduud.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
6/27/2013 2:10 PM EST
Khamiis, Juun 27, 2013 (HOL) — Xaflad lagu maamuusaayay 26-ka Juun oo ahayd markii gobollada Waqooyi ee Soomaaliya ay xorriyadooda ka qaateen gumeystihii Ingiriiska ayaa xalay lagu qabtay magalada Ankara ee xarunta dalka Turkiga.

6/27/2013 1:25 PM EST
Khamiis, Juun 27, 2013 (HOL) — Kaaliyaha xoghayaha guud ee Qaramada Midoobay ahna mas’uulka ugu sarreeya ee Qaramada Midoobay ee arrimaha siyaasadda, Jeffrey Feltman ayaa maanta booqasho ku yimid Muqdisho si uu u muujiyo in Qaramada Midoobay ay sii wadayso howlaha ay Soomaaliya ka hayso, kaddib markii dhawaan la weeraray xarunta UNDP ee Muqdisho.

6/27/2013 1:19 PM EST
Khamiis, Juun 27, 2013 (HOL) — Baarlamaanka Puntland oo magaalada Garoowe uu uga socodo kal-fadhigoodii 30-aad ayaa maanta su'aalo weydiiyey Wasiirka Dekedaha iyo Gaadiidka Badda Siciid Maxamed Raage iyo Wasiirka Maaliyadda Faarax Cali Shire.

6/27/2013 10:05 AM EST
Khamiis, Juun 27, 2013 (HOL) — Munaasabad si qurux badan loo soo agaasimay laguna maamuusayay sanad-guuradii 36 ee ka soo wareegtay markii ay shacabka reer Jabuuti ka xorroobeen gumeytihii Faransiiska 27 Juun sanadkii 1977 ayaa maanta lagu qabtay magaalada Baladweyne.

6/27/2013 9:34 AM EST
Khamiis, Juun 27, 2013 (HOL) — Afhyeenka maamulka Ximan iyo Xeeb, Maxamed Cumar Hagafeey ayaa sheegay in Sheekh Xasan Daahir Aweys uu culeys ku yahay deegaankooda iyo deegaannada ku dhow-dhow iyagoo taas ka duulayana ay dowladda Soomaaliya ka dalbadeen inay arrinta Sheekh Xasan Daahir kala hadasho.

6/27/2013 9:11 AM EST
Khamiis, Juun 27, 2013 (HOL) — Munaasibadda loogu dabaaldegayo sanad guuradda 53aad ee ka soo wareegtay markii ay Somaliland xoriyadda ka qaadatay gumaystihii Ingiriiska, ayaa xalay lagu qabtay magaaladda Hargeysa

6/27/2013 8:11 AM EST
Khamiis, Juun 27, 2013 (HOL) — Xarunta Jaamacada Banaadir ee Muqdisho ayaa waxaa lagu qabtay shalay oo Arbaco ahayd kulan aqoon-is-weydaarsi ah oo dhakhaatiir ka socotay isbitaalka Global ee dalka Hindiya ay u qabteen qaar ka mid ah ardayda jaamacaddaas.

6/27/2013 7:38 AM EST
Khamiis, Juun 27, 2013 (HOL) — Madaxweynaha Soomaaliya, Xasan Sheekh Maxamuud ayaa maanta Muqdisho kulan kula yeeshay wafdi ka socday dalka Norway oo uu hoggaaminaay wasiirka horumarinta iyo xiriirka Caalamiga ah ee Norway, Heikki Holmes.

6/27/2013 6:53 AM EST
Khamiis, Juun 27, 2013 (HOL) — Xildhibaanno ka tirsan baarlamaanka dowladda Soomaaliya, odayaal iyo xubno kale oo uu hoggaaminayay Sheekh C/qaadir Cali Cumar oo ah xildhibaan ka tirsan dowladda Soomaaliya ayaa maanta gaaray degmada Cadaado ee xarunta maamulka Ximan iyo Xeeb.

6/27/2013 3:06 AM EST
Khamiis, Juun 27, 2013 (HOL) — Gaari ay wateen ciidamada Sierra Leone ee qaybta ka ah howlgalka AMISOM ayaa qaraxyo miino lagula eegtay maanta magaalada Kismaayo ee xarunta gobolka Jubbada Hoose, iyadoo ay jirto xiisad u dhexeysa dhinacyadii shalay ku dagaalamay magaaladaas.