3/19/2024
Today from Hiiraan Online:  _
Wararka Maanta- Arbaco, Jan 16, 2013
Ururada Bulshada Rayidka Soomaaliyeed oo soo dhaweeyey Xubno dhawaan ka tanaasulay falalka Burcad-badeednimo


Arbaco, Jannaayo 16, 2013 (HOL) — Ururrada bulshada rayidka Somalia ayaa munaasabad ay soo qabanqaabiyeen oo ay ka qaybgaleen waxgarad fara badan oo matalayay qaybaha bulshada Soomaaliyeed iyo qaar ka mid ah fanaaniinta ayaa lagu soo dhaweeyay dhallinyaro dhawaan ku dhawaaqay inay ka tanaasuleen falalka burcadbadeednimada.

Munaasabadda ayaa waxaa ka hadlay mas’uuliyiin dhawr ah kuwaasoo ku dheeradaay dhibatooyinka ay dhallinta Soomaliyeed ka dhaxleen colaaddii dalka ka dhacday iyo waxyaabaha ku kalifay falalka foosha xun oo ay ka mid tahay burcad-badednimada.

Batuulo Sheekh Axmed Gabale oo ah guddoomiyaha garab ka mid ah labada garab ee uu qaybsamay ururka haweenka Qaranka Soomaliyeed oo halkaas ka hadashay ayaa soo dhaweysay dhallinyaradii ka tanaalay falalka burcad-badeednimada iyadoo dhanka kale sheegtay in dhibaato walba oo xubnahaas ay geysteen ay tahay mid lagu kallifay maadaama ay waayeen xuquuqdii ay lahaayeen iyo howl ay nolohsooda ku debberaan.


Cabdi Imaan Sharmaarke oo isna hadal ka jeediyay munasabadda ayaa ku baaqay in maraakiibta shisheeye laga saaro xeebaha Soomaaliya isagoo ka codsaday beesha caalamka inay gacan ka geystaan sidii badda Soomaaliya ay ku noqon lahayd mid madaxbannaan, isagoo ku hanjabay inay dadka in badan oo ka mid ah oo uu isagu ku jiro ay hub qaadan doonaan si ay badda uga difaacaan maraakiibta shisheeye, wuxuuna xusay in maraakiib ka badan 200 ay boob joogto ah ku hayaan kheyraadka badda Soomaaliya taasoo uu sheegay inaan loo dul-qaadan karin.

Nabadoon Maxamed Xasan Xaad oo ah guddomiyaha golaha dhaqanka ee beelaha Muqdisho oo gabagabadii munasabada hadallo ka jeediyay ayaa taageero ugu baaqay dhamaman dhallinyarada Somaliyeed inay u istaagaan dib u soo-celinta sumcaddii luntay ee Soomaaliya iyo dib ay dhiska dalkooda.

“Laabtankii sano ee aan soo dhaafnay waxaan arkaynay dhallinyaro ka qayb-qaadata burburka dalkooda iyo dagaallada, hase ahaatee dhalinyarada kasoo laabtay burcadbadeednimada waa kuwii ugu horreeyay ee gartay inay qaladkooda kasoo laabtaan; kuwa kale ee weli aan garannaa waxaan ugu baaqeynaa inay ku deydaan,” ayuu Nabaddoon Xaad hadalkiisa ku daray.


Nabadoon Axmed Diiriye Cali oo isaguna ka mid ah golaha odayaasha Muqdisho ayaa sheegay inuu u mahadcelinayo intii kasoo shaqeysay in dhallinyaradaas ay ka tanaasulaan burcad-badeednimada oo uu ugu horreeyo maamulka Ximan iyo Xeeb.

Sidoo kale, waxaa ka hadlay kulankaas xubno badan oo uu ka mida ahaa C/qaadir Ibraahim Gacal (Abkow) oo ah guddoomiyaha ururrada bulshada rayidka ah ee Soomaaliyeed, kuwasoo uu sheegay inay ku faraxsan yihiin tallaabada ay qaadeen dhallinyarada ka tanaasulay burcad-badeednimada.

Dhawaan ayay ahayd markii hoggaamiye ka tirsanaa burcad-badeednimada Soomaalida iyo koox uu horkacayay ay ka shaaciyeen degmada Cadaado in ay ka tanaasuleen falalka burcad badeednimada ee ay ku jireen mar kalena aysan dib ugu laaban doonin.








Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
1/16/2013 1:18 PM EST
Arbaco, Jannaayo 16, 2013 (HOL) — Guddoomiyaha baarlamaanka Soomaaliya, Prof. Maxamed Sheekh Cismaan (Jawaari) ayaa sheegay in dowladda Soomaaliya ay soo dhaweynayso wadahadallo walba oo nabadeed, isagoo ugu baaqay dhammaan dhinacyada Soomaalida inay kusoo biiraan qorshaha nabadeed ee dalka.

1/16/2013 8:33 AM EST
Arbaco, Jannaayo 16, 2013 (HOL) —Ciidamada maamulka KMG ee degmada Kismaayo ayaa xalay toogasho ku dilay mid kamid ah dadka rayidka, waxaana ilaa imika la garanayn sababta ka danbeeysay dilkiisa.

1/16/2013 8:24 AM EST
Arbaco, Jannaayo 16, 2013 (HOL) —Taliyaha ciidamada Booliska Soomaaliyeed Shariif Sheekhunaa Maye ayaa shir jaraa’id oo uu maanta ku qabtay xafiiskiisa magaalada Muqdisho uga warbixiyay sababaha loo xiray wariye C/casiis Cabdinuur Ibraahim Koronto oo maalmihii ugu danbeeyay ay isa soo tareeysay cambaareynta ku aadan xarigiisa.

1/16/2013 8:18 AM EST
Arbaco, Jannaayo 16, 2013 (HOL) — Xarakada Al-Shabaab ayaa bayaan ay soo saartay ku sheegtay in go'aan kama dambeys ah ay ku gaareen in dil toogasho ah ay ku fulinayso sarkaalka Faransiiska ee Dennis Allex kaasoo gacanta ay ku hayeen saddexdii sano ee ugu dambeeyay.

1/16/2013 7:57 AM EST
Arbaco, Jannaayo 16, 2013 (HOL) — Ciidamada Midowga Afrika ee AMISOM ayaa sheegay inay baaritaanno ku sameyn doonaan dhacdo dad rayid ay ku dhinteen oo shalay ka dhacday deegaanka Leego ee gobolka Shabeellada Hoose.

1/16/2013 7:39 AM EST
Arbaco, Jannaayo 16, 2013 (HOL) — Maxkamadda ciidamada dowladda qalabka sida ee dowladda Soomaaliya ayaa maanta xukunno dil ah ku fulisay laba askari oo ka tirsanaa ciidamada dowladda Soomaaliya kuwaasoo ku kala eedeysnaa dil iyo kufsi.

1/16/2013 7:38 AM EST
Arbaco, Jannaayo 16, 2013 (HOL) — Xarunta hay'adda wadahadalka bulshada ee CCD ayaa maanta lagu soo gaba-gabeeyay kulan wadatashi ahaa oo looga hadlayay qorshe-howleedka hay'adda ee sannadka 2013, kaasoo laga soo saaray qodobbo la xiriira yoolka hay'adda ay hiigsaneyso sannadkan.

1/16/2013 7:14 AM EST
Arbaco, Jannaayo 16, 2013 (HOL) — Wareegto kasoo baxday xafiiska madaxweynaha Soomaaliya, Xasan Sheekh Maxamuud ayaa wuxuu guddoomiyaha bankiga dhexe ee Qaranka u magacaabay, C/salaan Cumar Hadliye.

1/16/2013 6:40 AM EST
Arbaco, Jannaayo 16, 2013 (HOL) — Madaxweynaha Puntland iyo wefdi uu horkacayo oo maanta ka dhoofay garoonka diyaaradaha magaalada Boosaaso ee xarunta gobolka Bari, ayaa u kicitimay dalka Jabuuti.

1/16/2013 6:39 AM EST
Arbaco, Jannaayo 16, 2013 (HOL) — Madaxweyne ku-xigeenka Puntland Gen. C/samed Cali Shire ayaa maanta si rasmi ah u dhagax dhigay dhisme cusub oo ay yeelan doonto wasaaradda duulista hawada iyo garoomada ee Puntland.

1/16/2013 2:41 AM EST
Arbaco, Jannaayo 16, 2013 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo oo booqasho ku jooga dalka Mareykanka ayaa la kulmay 20 xubnood oo ka tirsan Congress-ka dalka Mareykanka oo uu ku jiray mudane keliya ee muslimka ah ee laga soo doorto gobolka Minnesota ee dalka Mareykanka, Keith Ellison.

1/16/2013 2:39 AM EST
Arbaco, Jannaayo 16, 2013 (HOL) — Qaylo-dhaan aad u xooggan ayaa bilihii u danbeeyey kasoo yeereysey kaluumaysatada Puntland, gaar ahaan kuwa gobolka Bari, waxayna la xiriirtaa maraakiibta shisheeyaha ee sida aan sharciga ahayn uga kaluumaysta xeebaha Soomaaliya.