Wasiirka Qorsheynta Somaliland oo Golaha Wakiiladda uga Warbixiyay Xeerka Diiwaan-gelinta Muwaadiniinta oo goor dhow billaabanysa
Isniin, Jannaayo 14, 2013 (HOL) — Golaha Wakiiladda Somaliland, ayaa maanta Wasiirka Qorsheynta Qaranka, Sacad Cali Shire ka dhagaystay xeerka tirokoobka dadweynaha reer Somaliland oo xukuumaddu doonayso inay dalka ka hirgaliso Diiwaangelin madani.
Xildhibaanadda golaha Wakiilada ayaa su’aalo ka waydiiyey wasiirka Qorshaynta qaabka ay doonayaan inay u bilaabaan iyo cidda ka caawinaysa tirokoobka dadweynaha, isla markana waxay usoo jeediyeen talooyin ay ku kordhinayaan qaabka hawshaa loo hirgalin karo.
Wasiirka Qorsheynta iyo horumarinta Qaranka Dr: Sacad Cali Shire ayaa faah-faahin ka bixiyey xeerkan tirokoobka dadweynaha iyo faa’iidada ugu jirta shacabka, waxaanu tilmaamay in loo baahan yahay in la ogaado dadka dhalanaya iyo inta dhimanaysaba, inta waxbarashadda u baahan, xaalada kala duwan ee dadku ku sugan yihiin iyo inta dhallinyaro ah, taas oo ah xog balaadhan oo lagu hawlgali karo laguna xisaabtami karo.
Wasiirku waxa kale oo uu intaas ku daray in wadamadu aanay ka maarmin inay ogaadaan dadka ku nool wadankoodda, inta muwaadiniinta ah iyo dadka aan u dhalan dalka iyo waliba qof waliba sifaha uu dalka ku jooga, waxa kale oo uu xusay in miisaaniyada sanadkan lagu soo daray lacagta lagu diiwaangelinayo dadweynaha, isla markaana meelo kalana laga filanayo inay kharashkaas wax inaga caawiyaan.
Xildhibaanadda golaha Wakiiladda, ayaa iyaguna waydiiyey siday ugu suurtogali karto maadaama oo dadweynuhu aanay jecleen inay xog bixiyaan, taasina ay ku adkaan karto dadka diiwaangelinta samaynaya, sidoo kale waxay waydiiyeen maadaama oo lacag badani ku baxayso hawshan cida ka caawinaysa, waxa kale oo ay waydiiyeen dadka loo xil saarayo inay hawshaa galaan waa dad noocee ah.
Wasiirka Qorsheynta oo su’aalihii la waydiiyey uga jawaabay,ayaa sheegay in hawshan ay wadi doonaan dhalinyaro loo tobabarayo, kuwaas oo iskugu jira dumar iyo rag ka soo kala jeedda goboladda oo dhan, isla markaana aad loo hubin doono diiwaangelinta si aanay wax khalad ahi uga iman, waxa kale oo uu xusay in dawladu ku darsatay qorshaha sanadkan la qaban doono diiwaangelinta muwaadiniinta si looga fogaado khaladaadka ka yimaada doorashooyinka iyo in la kala saaro muwaadiniinta iyo dadka kale, waxaanu sheegay inay noqon doonto mashruuc balaadhan oo dalka ka hirgali doona .
Dhinaca kale, Wasiirka Dhallinyarada, Ciyaaraha iyo dhaqanka Mr: Cali Siciid Raygal ayaa sheegay in dib loo dhigay tartankii ciyaaraha gobolada Somaliland oo bishan 15 keedda la doonayey in magaalada Hargeysa ka qabsoonto, balse ay tartankaasi la qaban doono bisha juun labadeedda ee sanadkan.
Wasiirka Ciyaaraha ayaa sabab uga dhigay inay dib u dhacdo tartankaas talooyin loo soo jeediyey oo ay ka helaan qurbo jooga oo codsaday in wakhtiga xagaga loogu beego si ay uga soo qaybgalaan Ciyaaraha, iyo in ardaydii dugsiyada iyo jaamacadaha oo tartankaasi ka qaybgala fasaxu ku yar yahay, qaarkoodna maqan yihiin oo aanay u suurtogaleen inay ka qaybgalaan, waxa kale oo uu sheegay in xaga diyaargarowga ciyaartoyda oo iyana wakhti fiican haysan, sidaa darted arrimaha jira awgeed ay dhawr bilood dib loogu dhigay.
Barkhad-Ladiif M. Cumar, Hiiraan Online
[email protected]
Hargeysa, Somaliland
