3/28/2024
Today from Hiiraan Online:  _
Wararka Maanta- Arbaco, Dec 4 , 2013
MADAXWEYNE XASAN: “Dowladdu Waxay Hirgelin doontaa Isbitaal gaar ah oo lagula tacaalo haweenka la kufsado” (SAWIRRO)


Arbaco, December 04, 2013 (HOL) — Madaxweynaha Soomaaliya, Xasan Sh. Maxamuud ayaa maanta ka qayb-galay kulankan lagu soo gaba-gabeynayay xarunta AMISOM ee Muqdisho, kaasoo looga hadlayay doorka haweenku ay ku leeyihiin ka hortagga tacadiyada ka dhanka ah haweenka iyo kaalinta ay ku leeyihiin horumarka dalka, iyadoo xiritaanka kulankan ay goob-joog ka ahaayeen, wasiirka horumarinta adeegga bulshadda, Maryan Qaasim, dajire Nicholas Kay, danjirayaasha dalalka Talyaaniga, Sweden u jooga Somalia iyo mas’uuliyiin kale.

Haweenkii kulanka ka qaybgalayay oo hadlay ayaa hoosta ka xariiqay inay wax badan ka faa’iideysteen kulanka, ayna taageerayaan in haweenka lagu gacan siiyo ka shaqeynta horumarka dalka.

Wakiilka Qaramada Midoobay ee Soomaaliya, Nicholas Key oo xafiiskiisa uu soo qabanqaabiyay kulanka ayaa u mahadceliyay dhammaan haweenkii ka qaybgalay kulanka, isagoo sheegay in kulankan uu yahay mid horumarineed.

“Dhibaatada haweenka loo geysto waxaa looga gudbi karaa oo keliya inay gacmaha is-qabsadaan oo ay dhinac uga soo jeestaan kuwa dhibaatada u geysanaya,” ayay tiri Drs. Maryan Qaasim Axmed oo kulanka ka hadashay.

Madaxweynaha Soomaaliya, Xasan Sheekh oo isaguna hadal dheer xafladda xiritaanka kulanka ka jeediyay ayaa sheegay in dowladda Soomaaliya ay diyaarinayso qorshe lagu daryeelayo haweenka Soomaaliya, gaar  ahaan kuwa ay dhibatadu haysato.

HALKAN KA DAAWO SAWIRRO BADAN:

“Dowladda Soomaaliya waxay hirgelin doontaa isbitaal gaar ah oo lagula tacaalo haweenka la kufsado ee dhibbanaha ah, tallaabo ayaana laga qaadayaa ciddii fal kufsi ah lagu helo,” ayuu yiri madaxweynaha Soomaaliya.

Madaxweynaha oo sii hadlayay ayaa yiri: “Kaddib 22-sano oo ay colaado iyo fowdo ay ka jirta dalka, dowladdu waxay isku diyaarinaysaa sidii ay u dajin lahayd shuruuc iyo siyaasado aan horay uga jirin Soomaaliya, si loo ilaaliyo xuquuqda dadka jilicsan ee bulshada ka midka ah.”

Sidoo kale, madaxweynuhu wuxuu hoosta ka xariiqay in halkii sano ee ay jirtay xukuumaddu ay ku guuleysatay inay qaaddo tallaabooyin lagu difaacayo dumarka Soomaaliyeed, isagoo tusaale u soo qaatay in la dajiyay sharciga qabyada ah ee siyaasadda jinsiga Soomaaliya, wuxuuna intaas ku daray in la dhisay hay’ado baara xad-gudubyada lagula kaco haweenka.

“Haweenku waxay kaalin muhiim ah uga jiraan bulshada, haddii ay si dhab ah u midoobaanna waxay ku guuleysan karaan hadafyadooda. Waxaana ugu hambalyeynayaa sida ay ugu dadadaalayaan inay xuquuqdooda difaacdaan,” ayuu yiri madaxweyne Xasan.

Ugu dambeyn, madaxweynuhu wuxuu sheegay inuu ballanqaadayo inay ka heli doonaan haweenka xukuumaddiisa darajooyin sar-sare, isagoo xusay in dowladdu ay mar walba u taagan tahay adkeynta nabadgalyada haweenka Soomaaliyeed.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
12/4/2013 1:13 PM EST
Arbaco, December 04, 2013 (HOL) —Xulka kubadda cagta Soomaaliya ayaa galabta gabi ahaanba isaga haray koobka bartamaha iyo bariga Africa oo sanadkan ka soconaya wadanka Kenya,waxaana ciyaartoyda Soomaaliya ay ku guul-daraysteen in Group B ay dhibco ka heleen,iyadoo ciyaaro adag horey ula soo yeeshay xulalka kala ah Tanzania iyo Burundi.

12/4/2013 11:37 AM EST
Arbaco, December 04, 2013 (HOL) — Madaxweynaha Puntland, C/raxmaan Maxamed Maxamuud (Faroole) ayaa markii ugu horreysay ka jawaab celiyay diidmo ay kala horyimaadeen guddi uu magacaabay musharraxiinta Puntland oo iyagu madaxweyne Faroole kula tartamaya doorashada soo socota ee dhici doonta bisha Koowaad ee sannadka soo socda 2014-ka.

12/4/2013 11:25 AM EST
Arbaco, December 04, 2013 (HOL) — Magaalada Baydhabo ayaa waxaa ku soo badanaya iskuullada ama dugsiyada wax lagu barto sida dugsiga hoose, dhexe iyo kuwa sare kuwaas oo ay furayaan hay’ado caalimi ah, iyadoo ay iskuul degmada ka furtay dhawaan hay’adda ZAMZAM oo maxalli ah.

12/4/2013 11:01 AM EST
Arbaco, December 04, 2013 (HOL) — Wafdi uu hogaaminayo murrashaxa madaxweynaha Xisbiga UCID Jamaal Cali Xuseen ayaa maanta laga horjoogsaday inay galaan Gobolka Gabilay.

12/4/2013 7:02 AM EST
Arbaco, December 04, 2013 (HOL) — Ciidamada nabad-sugidda Qaranka ayaa maanta is-hortaag ku sameeyay dibadbax lagu taageerayay go’aankii uu baarlamaanka Soomaaliya kalsoonida kala laabtay xukuumadda ra’iisul wasaare Saacid oo Muqdisho ka dhici lahaa.

12/4/2013 6:50 AM EST
Arbaco, December 04, 2013 (HOL) — Maamulka gobolka Banaadir ayaa maanta sheegay inay la wareegi doonaan guryaha burbursan ee Muqdisho ku yaalla haddii milkiilayaasha iska leh ay ku dhisi waayaan muddo saddex bilood gudahood ah.

12/4/2013 6:30 AM EST
Arbaco, December 04, 2013 (HOL) — Xulka kubadda cagta Soomaaliya ayaa maanta kulankii seddexaad ee Group-ka B la yeelanaya xulka kubadda cagta Zambia ciyaar ka tirsan koobka bartamaha iyo bariga Afrika, iyadoo ciyaartan ay maanta afarta galabnimo ka dhacayso garoonka Nyanyo National Stadium ee Kenya.

12/4/2013 5:34 AM EST
Maxkamad ku taalla dalka Kenya ayaa go'aamisay inaan damaanad lagu sii dayn karin wiilal Soomaali ah oo lagu eedeeyay inay ku lug lahaayeen weeraradii lagu qaaday xarunta ganacsiga ee Westgate oo ay ku dhinteen dad kor u dhaafay 67 ruux.

12/4/2013 1:41 AM EST
Arbaco, December 04, 2013 (HOL) — Ugu yaraan saddex qof ayaa ku dhintay toddoba kalena way ku dhaawacmeen qaraxyo is-xigay oo xalay ka dhacay maqaahi ku taalla degmada Ceel-waaq ee gobolka Gedo.

12/4/2013 1:29 AM EST
Arbaco, December 04, 2013 (HOL) — Ugu yaraan laba ruux ayaa ku dhintay tiro intaas ka bandanna way ku dhaawacmeen iska-horimaad culus oo xalay ku dhexmaray degmada Huriwaa ciidamada dowladda Soomaaliya iyo kuwa Al-shabaab.