4/17/2021
Today from Hiiraan Online:  _
Wararka Maanta- Isniin, Aug 26, 2013
Madaxweyne ku xigeenka Puntland oo gaarey Degmada Taleex ee Gobolka Sool, halkaasoo si weyn loogu soo dhaweeyay


Isniin, August 26, 2013 (HOL) — Degmada Taleex ee gobolka Sool waxaa maanta gaarey wefdi ballaaran oo uu horkacayo madaxweyne ku-xigeenka Puntland Jen. C/samed Cali Shire.

Wefdiga madaxweyne ku-xigeenka oo ay ku jiraan mas'uuliyiin ka tirsan goleyaasha wasiirrada iyo baarlamaanka ee Puntland waxaa Taleex loogu soo dhoweeyey si diirran.

Gen. C/samed oo goob fagaare ah kula hadlayey dadweyne boqollaal gaaraya oo soo dhoweeyey, kuwaasoo isugu jirey odayaal dhaqameed, dumar iyo dhalinyaro ayaa sheegay in uu ku faraxsan in muddo sanado ah kaddib uu soo gaaro degmada Taleex oo uu ku dhashay deegaan ahaanna kasoo jeedo.

Mar uu ka hadlayey ujeedada booqashadiisa degmada Taleex, wuxuu tilmaamay inay tahay mid lagu xoojinayo midnimada bulshada gobolka, looguna gogol xaarayo soo celinta deegaannada Puntland ee uu ka arrimiyo maamulka Somaliland.

Madaxweyne ku-xigeenka Puntland ayaa sidoo kale mar la weydiiyey mudda ay qaadan doonto booqashadiisa gobolka Sool, wuxuu sheegay in ay qorshaysan tahay inuu booqdo deegaano badan oo gobolka ka tirsan.

Dhinaca kale wuxuu sheegay inuu ka qayb gelayo shir-weyne ballaaran oo madaxda dhaqanka iyo waxgaradka gobolkaasi ay ku baaqeen, shirkaas ayaa ah mid looga arrinsan doono midnimada beelaha gobolka.

Gabagabadii wuxuu madaxweyne ku-xigeenka Puntland sheegay in midnimada Puntland ay tahay muqaddas, isagoo carrabka ku adkeeyey in sida uu dastuurka Puntalnd dhigayo ay waajib tahay in lasoo celiyo deegaanada Puntland ee xilligan uu ka taliyo maamulka Somaliland.

Socdaalka uu madaxweyne ku-xigeenka Puntland ugu baxay gobolka Sool, wuxuu kusoo aadayaa xilli sidoo kale isla maanta madaxweynaha Puntland iyo wefdi uu horkacayaa ay iyaguna u dhoofeen xarunta dalka Kenya ee Nairobi.

Maxamed Salaad Xaaji Dirir, Hiiraan Online
[email protected]
Boosaaso, Puntland












Click here
8/26/2013 1:38 PM EST
Isniin, August 26, 2013 (HOL) — Ciidammo Itoobiyaan ah oo Khamiistii lasoo dhaafay gaarya degmada Balad-xaawo ee gobolka Gedo oo ku dhow xadka u dhexeeya Soomaaliya iyo Kenya ayaa halkaas ka billaabay dhaqdhaqaaq ciidan.

8/26/2013 1:37 PM EST
Isniin, August 26, 2013 (HOL) — Howlgallo lagu soo qab-qabtay xubno Al-shabaab ka tirsan iyo hub fara badan ayaa waxaa maanta ciidamada dowladdu ay ka sameeyeen degmada Baydhabo ee xarunta gobolka Bay.

8/26/2013 1:36 PM EST
Isniin, August 26, 2013 (HOL) — Xoogag taabacsan Xarakada Al-shabaab ayaa maanta si nabadgalyo ah kula wareegay gacan ku haynta deegaanka Qurac-joome oo ka tirsan gobolka Bakool, halkaasoo uu ka jiray maamul hoos-taga dowladda Soomaaliya.

8/26/2013 1:34 PM EST
Isniin, August 26, 2013 (HOL) — Guddoonka baarlamaanka federaalka Soomaaliya ayaa si rasmi ah ugu dhawaaqay xiliga uu furmayo kal-fadhigga saddexaad ee golaha shacabka, kaasoo socon doona afarta bilood ee soo socota.

8/26/2013 12:02 PM EST
Isniin, August 26, 2013 (HOL) — Kulan ay maanta isugu yimaadeen wasiirka amniga, wasiirka howlaha guud iyo gaadiidka iyo taliyaha booliska Puntland ayaa laga soo saaray ammaro la xiriira nabadgelyada waddooyinka Puntland.

8/26/2013 8:39 AM EST
Isniin, August 26, 2013 (HOL) — Wasaaradda arrimaha gudaha iyo amniga ayaa shacabka Soomaaliyeed ugu baaqay inay ka qaybqaataan sugidda ammaanka, horumarinta adeegyada bulshada iyo inay bixiyaan canshuuraha.

8/26/2013 8:16 AM EST
Isniin, August 26, 2013 (HOL) — Madaxweynaha Puntland C/raxmaan Sheekh Maxamed (Faroole) iyo wefdi uu horkacayo ayaa maanta ka dhoofay garoonka diyaaradaha ee magaalada Garoowe. Wefdiga madaxweynaha ayaa ku wajahan magaalada Nairobi ee xarunta dalka Kenya.

8/26/2013 3:32 AM EST
Isniin, August 26, 2013 (HOL) — Abaanduulihii hore ee ciidamada xoogga dalka, Jen. C/kariin Yuusuf Aadan (Dhega-badan) ayaa ugu baaqay taliska ciidamada xooga dalka Soomaaliyeed inay cadaalada horkeennaan cidii ka dambeysay dilka taliyihii guutada labaad ee ciidamada xooga, Col. Cali Guure Afdhuub oo shalay lagu aasay magaalada Muqdisho.

8/26/2013 3:22 AM EST
Isniin, August 26, 2013 (HOL) — Dowladda Soomaaliya ayaa shaacisay inay heshay illaa afar diyaaradood oo ay ku howl-gelineyso shirkadii diyaaradaha Soomaaliyeed ee Somali Airline, kaddib muddo 22-sano ah, taasoo ku tegi doonta dalalka caalamka duulimaadyo kala duwan.

8/26/2013 3:09 AM EST
Isniin, August 26, 2013 (HOL) — Madaxwene ku xigeenka maamulka Puntland, Jen. C/samad Cali Shire ayaa la sheegay inuu u ambabaaxay magaalada Taleex ee gobolka Sool, halkaasoo ay ka taagan yihiin kacdoono laga soo horjeedo imaanshihiisa.

8/26/2013 3:06 AM EST
Isniin, August 26, 2013 (HOL) — Xuseen Samatar, ahaa shaqsigii ugu horreeyey oo Soomaali ah oo loo doorto in uu xubin ka noqdo guddiga maamula iskuullada waxbarashada magaaladda Minneapolis ee gobolka Minnesota, ayaa shalay galinkii dambe geeriyooday, kaddib markii uu muddo la xanuunsanayey cudurka Kansarka oo dhuuxa ka haleelay [leukemia], sida ay HOL u xaqiijiyeen dad ku dhow-dhow.