3/28/2024
Today from Hiiraan Online:  _
Wararka Maanta- Sabti, Apr 27, 2013
Madaxweynaha Soomaaliya oo Furitaanka Safaaradda Britain ee Muqdisho ku tilmaamay mid Muujinaysa horumarka la gaaray


Sabti, Abriil 27, 2013 (HOL) — Iyadoo dowladda Britain ay dib Muqdsiho uga furtay safaaraddeedii kaddib 22-sano oo ay xirnayd ayaa madaxweynaha Soomaaliya wuxuu ku tilmaamay furitaanka safaaraddan tallaabo dhiirigelin u ah in Soomaaliya ay ka baxday colaadihii muddada dheer ay kusoo jirtay ayna u diyaarsan tahay dib u soo celinta Qarannadimii iyo kala dambeyntii.

Xoghayaha arrimaha dibadda ee dalka Britain, William Hague oo safaaradda furay ayaa ku sheegay furintaanka safaaradda inay calaamad cad u tahay horumarka ka muuqda Soomaaliya.

“Tani waxay caddeyn ama calaamad u tahay horumarka ay Soomaaliya ku tallaabsatay,” ayuu Hague u sheegay wariyeyaal uu la hadlay kadidb markii uu safaaradda xarigga ka jaray.

Dalal badan oo reer galbeed ah ayaa dajireyaal u soo diray Soomaaliya si ay uga furtaan Muqdisho safaarado, kuwaasoo aan weli ku dhiirran inay furaan safaaradahooda, balse Hague ayaa yiri: “Waxaan in tani ay tusaale u noqoto dalalka kale ee caalamka.”

Madaxweyne Xasan Sheekh Maxamuud oo furintaankii safaaradda Britain ee Soomaaliya ayaa ku tilmaamay inay tallaabo geesinimo oo ay Britain horay u qaadday, wuxuuna dalalka kale ee safaaradahoodu ay ku shaqeeyaan Nairobi ugu baaqay inay tallaabadaas oo kale qaadaan.

“Waxaan rajeynaynaa in si dhaqso ah ay calammo kala duwan ay ka babadaan qaybo badan oo Muqdisho ka tirsan,” ayuu yiri Xasan Sheekh oo intaas ku daray: “Tani waxay muujinaysaa aragtida dunida ee ku aaddan is-bedelka Soomaaliya ka dhacay… Waayo Soomaaliya waxaa ka socda dib u dhis iyo horumar la taaban karo.”

Dowladda Britain ayaa noqonaysa dowladdii ugu horreysay oo reer galbeed ah oo dib uga furta Muqdisho safaaraddeedii kaddib 22-sano oo colaado ay ku jirtay Soomaaliya, waxaana Britain ay rajo weyn ka muujisay dib u soo laabashada deggenaashihii horay uga jiray Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
4/27/2013 1:16 PM EST
Sabti, Abriil 27, 2013 (HOL) — Madaxweynaha Soomaaliya, Xasan Sheekh Maxamuud ayaa maanta safar kooban oo shaqo ku tagay magaalada Mombasa ee dalka Kenya; halkaasoo uu kula kulmay Madaxweynaha Kenya, Uhuru Kenyatta.

4/27/2013 1:07 PM EST
Sabti, Abriil 27, 2013 (HOL) — Madaxweynaha dalka Kenya, Uhuru Kenyatta ayaa sheegay in danta ay Kenya ka leedahay Soomaaliya ay tahay sidii ay ugu soo celin lahayd ammaan iyo deggenaasho kaddib in ka badan 20-sano oo colaado ay ka jireen dalka ay dariska yihiin.

4/27/2013 12:50 PM EST
Sabti, Abriil 27, 2013 (HOL) — Dowladda Britain ayaa sheegtay inay Somalia siinayso lacag gaaraysa 80-milyan oo gini oo u dhiganta 120-milyan oo dollarka Mareykanka ah, si xal loogu helo deggenaasho la‘aanta muddada labaatanka sano ah ka jirtay.

4/27/2013 12:42 PM EST
Sabti, Abriil 27, 2013 (HOL)-- Iyadoo ay muddo koobani ka harsan tahay xilliga la shaaciyey in doorashada goleyaasha deegaanku ay ka qabsoomi doonto –markii ugu horeysey- deegaannada Puntland, ayaa waxaa sii kordheysa tirada urur-siyaasadeedyada qaadacay ka qayb-galka doorashada.

4/27/2013 12:39 PM EST
Sabti, Abriil 27, 2013 (HOL) — Kaddib markii Al-shabaab ay habeen ka hor ku dishay Muqdisho, ku-xigeenkii garyaqaanka guud ee dalka ayaa farriin ay kooxdan soo saartay waxay ku sheegtay inay mid-mid u ugaarsan doonto oo ay dili doonto dhammaan shaqaalaha maxkamadaha dalka.

4/27/2013 8:05 AM EST
Sabti, Abriil 27, 2013 (HOL) — Guddoonka baarlamaanka Soomaaliya ayaa diiday mooshin laga keenay heshiiskii dhexmaray dowladda Soomaaliya iyo maamulka Somaliland, iyagoo sheegay in mooshinkaas uu ka horimaanayo dastuurka dalka, sidaa daraadeedna aan laga doodayn.

4/27/2013 1:17 AM EST
Sabti, Abriil 27, 2013 (HOL) — Madaxweynaha Soomaaliya iyo wafdi uu hoggaaminayo ayaa saakay u amabaxay magaalada Mombassa ee dalka Kenya, halkaasoo la sheegay inuu kula kulmi doono madaxweynaha dalka Kenya, Uhuru Kenyatta.

4/27/2013 12:56 AM EST
Sabti, Abriil 27, 2013 (HOL) — Madaxweyne ku xigeenka dalka Kenya, William Rutu ayaa ka dalbaday maxkamadda caalamiga ah ee dambiyada dagaalka ICC inay dib u dhigto dacwaddiisa oo billaaban lahayd bisha soo socota illaa dhamaadka sannadkan.