3/29/2024
Today from Hiiraan Online:  _
Wararka Maanta- Talaado, Apr 2 , 2013
Ururka Ahlusunna Waljamaaca oo Sheegay in aan lagu Casuumin Shirka looga hadlayo dib u habeynta Garsoorka Dalka

Talaado, Abriil 02, 2013 (HOL) — Culummaa’uddiinka Ahlusunna Waljamaaca oo ka mid ah maamullada uu xiriirka wanaagsan kala dhexeeyo dowladda Soomaaliya ayaa sheegay inaan lagu casuumin shirka looga tashanayo dib u habeynta garsoorka dalka.

Guddoomiyaha golaha talada ee Ahlusunna, Sheekh Cumar C/qaadir Cali oo u warramayya warbaahinta ayaa sheegay inuusan jirin xubin ka tirsan ururkooda oo shirkaas ka qaybgalaya iyo casuumaad loo fidiyay ururkooda midna.

“Shirka looga tashanayo dib u habeynta garsoorka dalka laguma casuumin Ahlusunna, mana jiro mas’uul nooga qaybgalaya oo halkaas ku sugan,” ayuu yiri Sheekh Cumar C/qaadir oo intaas ku daray inaysan garanayn sababta keentay inay dowladdu ka dul-booddo.

Magaalada Muqdisho ayaa waxaa shalay ka furmay shir socon doona shan maalmood oo looga tashanayo sidii dib u habeyn loogu sameyn lahaa garsoorka si dadku ay ugu kalsoonaadaan cadaaladda dalka.

Kulankan oo uu furya madaxweyne, Xasan Sheekh ayna soo qabanqaabisay dowladda Soomaaliya ayaa waxaa ka qaybgalaya 150-ergo oo ka kala socda maamullo ka jira dalka oo ay ka mid tahay Puntlnad iyo aqoonyahanno ka yimid dibadda iyo kuwo horay ugu sugnaa dalka.

“Dowladda iyo Ahusunna waxaa ka dhexeeya xiriir adag naloogumana yeerin shirkan, waayo Ahlusunna waa la yaqaanaa waa maamul cadaaladda si weyn u yaqaanna,” ayuu yiri Sheekh Cumar C/qaadir.

Madaxweyne Xasan Sheekh ayaa sheegay in qorshahoodu uu yahay in shirka uu noqdo mid ay qodobbada kasoo baxa lagu dhaqmo, isla markaana uu noqdo mid ay Soomaalida oo dhan ka qaybqaadatay dejintiisa.

Xukuumadda Soomaaliya ayaan la ogeyn waxay kaga jawaabi doonto hadalka kasoo baxay culummaa’uddiinka Ahlusunna ee ku saabsan inaan lagu casuumin shirka, iyadoo la xusuusto inay xulufo wey ku yihiin dagaalka lagula jiro Al-shabaab.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
4/2/2013 11:03 AM EST
Talaado, 2 April, 2013(HOL) :- Ergadii ka qeybqaadaneysay shirka la doonayo in maamul goboleed loogu dhiso sedexda gobo lee J/hoose J/dhexe iyo Gedo ayaa maanta ansixisay Axdi KMG ah oo ay ku shaqeyn doonto dowlad goboleedka loogu magic daray Jubbaland ee la filayo in loo dhiso gobollada Jubooyinka.

4/2/2013 8:56 AM EST
Talaado, Abriil 02, 2013 (HOL) — Shirweynaha Qaran ee wadatashiga garsoorka Soomaaliya oo maalintii laabad si toos ah uga socda magaalada Muqdisho, kaasoo ay ka qaybgaleen guddoomiyaha Baarlamanaka, Prof. Maxamed Sheekh Cusmaan Jawaari, guddoomiyaha maxkamadda sare, Avv. Ceydiid Ilkaxanaf, xeer ilaaliyaha guud ee Qaranka iyo dhammaan rrgada mataleysa dadka Soomaaliyeed ee shirka lagu casuumay.

4/2/2013 8:23 AM EST
Talaado, Abriil 02, 2013 (HOL) — Ururka Qareenadda Somaliland, ayaa ugu baaqay golaha Wakiiladda inay sameeyaan xeerka mihnadda qareenimo lagu nidaamiyo oo tayo leh si loo helo cadaalad iyo xeer madax banaan oo waafaqsan xeerarka caalamka.

4/2/2013 8:14 AM EST
Talaado, Abriil 02, 2013 (HOL) — Taliyaha ciidamada AMSIOM, Jen. Andrew Gutti ayaa sheegay in ciidamadooda iyo kuwa dowladda Soomaaliya oo is-garabsanaya ay ku guuleysteen inay furaan waddada isku xirta Muqdisho iyo Baydhabo oo dhirirkeedu yahay 241-km.

4/2/2013 7:55 AM EST
Talaado, Abriil 02, 2013 (HOL) — Kooxo hubeysan ayaa ku toogtay gudaha degmada Gaarisa ee gobolka Waqooyi-bari ee dalka Kenya lab aka mid ah ciidamada dharka cad ee booliiska Kenya, iyagoo isla weerarkaas dhaawac ugu geystay mid kale.

4/2/2013 6:27 AM EST
Talaado, Abriil 02, 2013 (HOL) — Maalintii Axadda ahayd ee lasoo dhaafay ayaa waxaa (31 Maarso, 2013), waxaa lagu soo gaba-gaboobay tartankii 13- aad ciyaaraha kubadda cagta ee Indoor Soccer Cup magaalada Columbus ee gobolka Ohio.

4/2/2013 1:54 AM EST
Talaado, Abriil 02, 2013 (HOL) — Ciidammo ka tirsan kuwa AMISOM oo aad u fara badan ayaa shalay gallinkii dambe illaa xalay gaarayay magaaalada Baydhabo ee xarunta gobolka Bay, kuwaasoo maray dhinaca dhulka waxayna fariisimo ka sameysteen gudaha iyo duleedyada Baydhabo.