4/20/2019
Today from Hiiraan Online:  _
Wararka Maanta- Isniin, Apr 15, 2013
Ra’iisul Wasaaraha Somalia oo sheegay in 29-ruux ay ku dhinteen Weerarradii shalay ka dhacay Muqdisho (SAWIRRO)



Isniin, Abriil 15, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) iyo xubno ka tirsan golaha wasiirrada xukuumadda iyo taliyayaasha ciidamada ayaa maanta booqday maxkamadda gobolka oo uu ka dhacay shalay u weerarkii ugu xumaa ee soo mara Muqdisho. Isagoo sheegay inay ku dhinteen 29-qof ayna ku dhaawacmeen 58-qof oo kale.

Wafdiga ra’iisul wasaaraha ayaa sidoo kale booqday isbitaalka Madiina oo la dhigay dadkii ku dhaawacmay weerarradii ka dhacay Muqdisho, kuwaasoo ay sheegatay Al-shabaab.

Ra’iisul wasaaraha ayaa saxaafadda kula hadlay xafiiskiisa kaddib markii uu soo dhamaystay booqashooyinka iyo shirarkii is-daba-jooga ahaa oo uu la qaatay xubno ka tirsan golaha wasiirrada iyo taliyeyaasha ciidamada dowladda.

“Qaraxyadii ismiidaaminta ahaa ee shalay ka dhacay Muqdisho oo mas’uul ay ka ahayd Al-shabaab waa mid calaamad u ah cadowtinimada baahsan ee ay u hayaan shacabka Soomaaliyeed, waxaana tacsi u dirayaa dadkii shalay ku geeriyooday weerarkii waxashnimada ahaa, waxaana Alle weydiisanayaa inuu caafimaad siiyo kuwii ku dhaawacmay,” ayuu yiri ra’iisul wasaaraha oo dhanka kale xusay sida ay dowladda uga go’an tahay sidii looga horjoogsan lahaa weerarrada noocan oo kale ah.

Sidoo kale, ra’iisul wasaaruhu wuxuu u mahad-celiyay ciidamadii goobta ka soo saaray qaar badan oo ka tirsan dadkii meesha ku sugnaa markii ay mashaqadu ka dhacday.

“Dowladdu waxay hambalyo u diraysaa ciidammadi ka hortagay inay dhacdo khasaaro intaas ka badan, dowladduna waxay guddoonsiin doontaa abaal-marin ciidamadaas oo si geesinimo leh ku galay goobta iyadoo ay ka socotay xilligaas qaraxyo iyo tacshiirado is-daba-joog ahaa. Dowladduna baaritaanno ayay ku sameyn doontaa sidii ay ku suurogashay in kooxaha argagaxisadu si fudud u soo galaan maxakamadda gobolka Banaadir,”  ayuu Saacid ku yiri shirkiisa jaraa’id.

Ra’iisul wasaaraha ayaa sidoo kale sheegay in dhaawacyada oo gaaraya 58-qof ay toddobo ka mid ah xaaladdoodu liidato dowladduna ay dadaal ku bixin doonto sidii ay u heli lahaayeen kaalmo caafimaad oo dibadda ah, wuxuuna intaas ku daray in dowalddu ka xun tahay wixii ka dhacay maxkamadda gobolka, iyadoo la ogyahay in dhibaatooyin intaa ka badan ay ka gaystaan kooxaha argagaxisadu waddamo ciidan ahaan iyo qalab ahaanba ka horreeya Soomaaliya.

Ugu danabayntii ra’iisul wasaare Saacid wuxuu shacabka Soomaaliyeed ugu baaqay inay meel uga soo wada-jeestaan kooxda Al-shabaab, si looga hor-tago inay falal noocan oo kale ah mar kale geystaan.













Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
4/15/2013 2:55 PM EST
Isniin, Abriil 15, 2013 (HOL) — Madaxweynaha Puntland, Cabdiramxaan Sheekh Maxamed Faroole ayaa maanta xariga ka jaray dhismaha cusub ee madaxtooyada Puntland oo laga dhisay duleedka magaalada Garoowe ee xarunta Punland, kaasoo noqonaya madaxtooyadii ugu horreysay ee laga dhiso Garoowe.

4/15/2013 8:48 AM EST
Isniin, Abriil 15, 2013 (HOL) — Mas’uuliyiinta dawladda hoose ee degmada Laascaanood ayaa shaaca ka qaaday inay billaabayaan olole biyaha fadhiista badhtamaha magaalada lagaga hagaajinayo labada maalmood ee soo socda.

4/15/2013 8:17 AM EST
Isniin, Abriil 15, 2013 (HOL) — Xukuumadda Britain ayaa cambaareysay weerarradii ismiidaamin ah ee Axaddii shalay ahayd ka dhacay magaalada Muqdisho oo salfaday nolosha in ka badan 33 qof, iyadoo sheegtay inay horay uga digtay weerarradan.

4/15/2013 7:45 AM EST
Isniin, Abriil 15, 2013 (HOL) — Maamulka Puntland ayaa canbaareeyey weerarkii khasaaraha badan dhaliyey ee shalay lagu qaaday xarunta maxkamadda gobolka Banaadir ee magaalada Muqdisho.

4/15/2013 7:31 AM EST
Isniin, Abriil 15, 2013 (HOL) — GolahagGuurtidda Somaliland, ayaa maanta muddo laba sanno ah ku kordhiyey golaha Wakiiladda Somaliland kaddib markii ay muddo dhaaftay, isla markaana ay ka dhamaatay muddo ay hore ugu kordhiyeen.

4/15/2013 7:13 AM EST
Isniin, Abriil 15, 2013 (HOL) —Guddiga kumeel gaarka ah ee doorashooyinka Puntland ayaa maanta shaaciyey wakhtiga ay qabsoomi doonta doorashada goleyaasha deegaanka ee Puntland.

4/15/2013 6:49 AM EST
Isniin, Abriil 15, 2013 (HOL) — Waxaa dib loo furay labo buundo oo ku yaal jidka soo gala magaalada Boosaaso ee xarunta gobolka Bari kaddib markii dayactir xooggan lagu sameeyey.

4/15/2013 6:45 AM EST
Isniin, Abriil 15, 2013 (HOL) — Miinooyin kuwa lidka taangiyada ah, oo muddo 30-sano ka badan ku xabaalnaa miyiga degmada Gal-dogob ee gobolka Mudug ayaa lagu guuleystey in la saaro. Qorshaha miinooyinkan lagu saaray oo ah mid todobaadyadii ugu danbeeyey lagu howlanaa, waxaa iska kaashaday maamulka iyo waxgaradka Goldogob.

4/15/2013 2:28 AM EST
Isniin, Abriil 15, 2013 (HOL) — Madaxweynaha Soomaaliya, Xasan Sheekh Maxmauud ayaa ku dhawaaqay dagaal cusub oo ka dhan ah Xarakada Al-shabaab, kaddib kulan deg-deg ah oo xalay ay guddiga ammaanka Qaranka ku yeesheen xarunta madaxtooyada Soomaaliya.

4/15/2013 2:26 AM EST
Isniin, Abriil 15, 2013 (HOL) — Ra’iisul wasaarihii hore Al-Soomaaliya, Prpf. Cali Maxamed Geeddi oo ka hadlay dagaalkii shalay ka dhacay Muqdisho ayaa sheegay inuu ku yimid habacsanaan dhinaca ammaanka iyo dowladda oo aan qaadan digniinihii ka imaanaya caalamka.

4/15/2013 2:25 AM EST
Isniin, Abriil 15, 2013 (HOL) — Afhayeenka Al-shabaab Sheekh Cali Maxamuud Raage (Sheekh Cali Dheere) ayaa sheegay in weerarkii lagu dilay samafalayaasha Turkiga ah ee ka dhacay Muqdisho ay iyagu ka dambeeyeen uuna farriin u yahay shisheeyaha ku sugan dalka Soomaailya.

4/15/2013 2:22 AM EST
Isniin, Abriil 15, 2013 (HOL) — Warar dheeraad ah ayaa kasoo baxay khasaarihii ka dhashay weeraradii shalay ka dhacay Muqdisho, waxaana wararkii ugu dambeeyay ay sheegayaan in 33-qof oo isugu jira kooxihii weerarka qaaday, ciidamada dowladda, shaqaale iyo dad shacab ah ay ku dhinteen weerarradaas.