7/18/2019
Today from Hiiraan Online:  _
Wararka Maanta- Isniin, Apr 15, 2013
Britain oo Cambaareysay Weerarradii shalay ka dhacay Muqdisho sheegtayna inay Caawinayso Dowladda Soomaaliya



Isniin, Abriil 15, 2013 (HOL) — Xukuumadda Britain ayaa cambaareysay weerarradii ismiidaamin ah ee Axaddii shalay ahayd ka dhacay magaalada Muqdisho oo salfaday nolosha in ka badan 33 qof, iyadoo sheegtay inay horay uga digtay weerarradan.

Birtain ayaa horraantii bishan sheegtay in Muqdisho ay ka dhici karaan falal argagaxiso oo ay geystaan Al-shabaab iyo kooxo kale oo kasoo horjeeda dowladda Soomaaliya, iyadoo uga digtay muwaadiniinteeda inay tagaan Muqdisho.

“Waxaan si adag u cambaareynayaa qaraxii ka dhacay Muqdisho,” ayuu yiri wasiirka arrimaha dibadda ee William Hague oo warsaxaafadeed soo saaray. Isagoo hadalkiisa raaciyay: “Falalkan argagaxiso waxay sii dheereynayaan dhibaatooyinka haysta shacabka Soomaaliya.”

Hague oo si hadalaya ayaa yiri: “Boqortooyada Britain iyo beesha caalamka waxay sii wadayaan go’aankoodii ay ku sheegeen inay gacan ka geysanayaan sidii shacabka Soomaaliyeed ay ku heli lahaayeen nabad, deggenaasho iyo horumar.”

Sidoo kale, wasiirka arrimaah dibadda Britian wuxuu ku baaqay in sharciga la horkeeno kooxihii argagaxisada ahaa ee ka dambeeyay falkaas, wuxuuna intaas ku daray in dowladda Soomaaliya ay aad uga feejignaato dhibaatoyin nooca oo kale oo dhaca.

Dowladda Soomaaliya ayaa sheegtay in sagaal qof oo hubeysan ay fuliyeen weerarkan, kaasoo ay ku dhinteen dad badan 30-qof, waxaana weerarradan ay ahaayeen laba weerar kaasoo midkooda lagu qaaday maxkamadda gobolka iyo qarax loo geystay shaqaale samafal oo Turki ah.

Balse Al-shabaab oo sheegatay mas’uuliyadda weerarradan ayaa sheegtay in shan ka mid ah ciidamadooda sida gaarka ah u tababaran ay fuliyeen weerarkii lagu qaaday xarunta maxkamadda gobolka Banaadir, kaasoo dadkii ku dhintay ay ku jireen garyaqaanno iyo dad maxkamadda u joogay dacwado kala duwan.

Axaddii shalay ayaa ahayd maalin ay Muqdisho ka dhaceen rabshadihii ugu xumaa ee soo mara muddo sannado ah, iyadoo weerarradu ay saameyn ku yeesheen isku socodka degmooyinka gobolka iyo ganacsiga.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
4/15/2013 2:55 PM EST
Isniin, Abriil 15, 2013 (HOL) — Madaxweynaha Puntland, Cabdiramxaan Sheekh Maxamed Faroole ayaa maanta xariga ka jaray dhismaha cusub ee madaxtooyada Puntland oo laga dhisay duleedka magaalada Garoowe ee xarunta Punland, kaasoo noqonaya madaxtooyadii ugu horreysay ee laga dhiso Garoowe.

4/15/2013 10:36 AM EST
Isniin, Abriil 15, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) iyo xubno ka tirsan golaha wasiirrada xukuumadda iyo taliyayaasha ciidamada ayaa maanta booqday maxkamadda gobolka oo uu ka dhacay shalay u weerarkii ugu xumaa ee soo mara Muqdisho. Isagoo sheegay inay ku dhinteen 29-qof ayna ku dhaawacmeen 58-qof oo kale.

4/15/2013 8:48 AM EST
Isniin, Abriil 15, 2013 (HOL) — Mas’uuliyiinta dawladda hoose ee degmada Laascaanood ayaa shaaca ka qaaday inay billaabayaan olole biyaha fadhiista badhtamaha magaalada lagaga hagaajinayo labada maalmood ee soo socda.

4/15/2013 7:45 AM EST
Isniin, Abriil 15, 2013 (HOL) — Maamulka Puntland ayaa canbaareeyey weerarkii khasaaraha badan dhaliyey ee shalay lagu qaaday xarunta maxkamadda gobolka Banaadir ee magaalada Muqdisho.

4/15/2013 7:31 AM EST
Isniin, Abriil 15, 2013 (HOL) — GolahagGuurtidda Somaliland, ayaa maanta muddo laba sanno ah ku kordhiyey golaha Wakiiladda Somaliland kaddib markii ay muddo dhaaftay, isla markaana ay ka dhamaatay muddo ay hore ugu kordhiyeen.

4/15/2013 7:13 AM EST
Isniin, Abriil 15, 2013 (HOL) —Guddiga kumeel gaarka ah ee doorashooyinka Puntland ayaa maanta shaaciyey wakhtiga ay qabsoomi doonta doorashada goleyaasha deegaanka ee Puntland.

4/15/2013 6:49 AM EST
Isniin, Abriil 15, 2013 (HOL) — Waxaa dib loo furay labo buundo oo ku yaal jidka soo gala magaalada Boosaaso ee xarunta gobolka Bari kaddib markii dayactir xooggan lagu sameeyey.

4/15/2013 6:45 AM EST
Isniin, Abriil 15, 2013 (HOL) — Miinooyin kuwa lidka taangiyada ah, oo muddo 30-sano ka badan ku xabaalnaa miyiga degmada Gal-dogob ee gobolka Mudug ayaa lagu guuleystey in la saaro. Qorshaha miinooyinkan lagu saaray oo ah mid todobaadyadii ugu danbeeyey lagu howlanaa, waxaa iska kaashaday maamulka iyo waxgaradka Goldogob.

4/15/2013 2:28 AM EST
Isniin, Abriil 15, 2013 (HOL) — Madaxweynaha Soomaaliya, Xasan Sheekh Maxmauud ayaa ku dhawaaqay dagaal cusub oo ka dhan ah Xarakada Al-shabaab, kaddib kulan deg-deg ah oo xalay ay guddiga ammaanka Qaranka ku yeesheen xarunta madaxtooyada Soomaaliya.

4/15/2013 2:26 AM EST
Isniin, Abriil 15, 2013 (HOL) — Ra’iisul wasaarihii hore Al-Soomaaliya, Prpf. Cali Maxamed Geeddi oo ka hadlay dagaalkii shalay ka dhacay Muqdisho ayaa sheegay inuu ku yimid habacsanaan dhinaca ammaanka iyo dowladda oo aan qaadan digniinihii ka imaanaya caalamka.

4/15/2013 2:25 AM EST
Isniin, Abriil 15, 2013 (HOL) — Afhayeenka Al-shabaab Sheekh Cali Maxamuud Raage (Sheekh Cali Dheere) ayaa sheegay in weerarkii lagu dilay samafalayaasha Turkiga ah ee ka dhacay Muqdisho ay iyagu ka dambeeyeen uuna farriin u yahay shisheeyaha ku sugan dalka Soomaailya.

4/15/2013 2:22 AM EST
Isniin, Abriil 15, 2013 (HOL) — Warar dheeraad ah ayaa kasoo baxay khasaarihii ka dhashay weeraradii shalay ka dhacay Muqdisho, waxaana wararkii ugu dambeeyay ay sheegayaan in 33-qof oo isugu jira kooxihii weerarka qaaday, ciidamada dowladda, shaqaale iyo dad shacab ah ay ku dhinteen weerarradaas.