3/28/2024
Today from Hiiraan Online:  _
Wararka Maanta- Axad, Sept 29, 2013
Waddooyinka Muhimka ah ee Muqdisho oo xiran iyo wafdigii uu Horkacayay Madaxweynaha Somalia oo Muqdisho kusoo laabtay

Axad, September 29, 2013 (HOL) — Waddooyinka muhiimka ah ee Muqdisho ayaa xiran saakay, iyadoo lagu arkayo ciidammo fara badan oo kuwa dowladda Soomaaliya ka tirswan, kuwaasoo u diidaya inay maraan gaadiidka kala duwan.

Sidoo kale, madaxweynaha Soomaaliya, Xasan Sheekh Maxamuud iyo wafdi uu hoggaaminayo ayaa dib ugu soo laabtay Muqdisho saakay aroortii hore, kaddib laba toddobaad oo uu dalka uga maqnaa safar shaqo.

“Isgoyska KM-4, jidka garoonka diyaaradaha iyo jidka Maka Al-mukarama ayaa xiran, waxaana ku sugan ciidammo fara badan oo diidaya inay halkaas gaadiidku maraan, balse shacabku way iska lugeynayaan,” ayuu yiri mid ka mid ah ganacsatada dukaamada ku leh isgoyska KM-4 oo la hadlay HOL.

Ganacsadahan ayaa sheegay in xalay la keenay ciidamadaas, sababta loo xirayna aan la ogeyn, waxaana tani ay kusoo beegmaysaa iyadoo xalay lagu soo bandhigay Muqdisho sideed qof oo lagu soo qabqabtay waxyaabo qarxa oo isugu jira, miinooyin iyo hoobiye.

Madaxweynaha Somalia iyo wafdigiisa oo saakay soo laabtay ayaan waxay soo mareen intii ay safarka ku jireen dalalka Belgium, Talyaaniga iyo sidoo kale Mareykanka, halkaasoo ay kaga qaybgaleen shirar kala duwan.

Dowladda Soomaaliya kama aysan hadlin sababta keentay in la xiro qaar ka mid ah waddooyinka muhiimka ah ee magaalada Muqdisho, iyadoo jidadka la xiray ay yihiin kuwa ugu istimcaalka badan caasimadda Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
9/29/2013 12:37 PM EST
Axad, September 29, 2013 (HOL) —Madaxweynaha Somaliland, Axmed Max'ed Max'uud Siillaanyo ayaa ka qaybgalay qalinjabinta dufcaddii tobnaad ee jaamacadda Hargeysa, kuwaasoo dhamaa 744 arday oo ka qalinjabiyey in ka badan toban kuuliyadood.

9/29/2013 12:34 PM EST
Axad, September 29, 2013 (HOL) — Hay’adda World Vision oo ka mid ahayd hay’adihii ay Al-shabaab horay uga eriday gobollada Koonfurta Soomaaliya ayaa waxay maanta dib uga furatay xafiiskeedii magaalada Baydhabo ee gobolka Bay, halkaasoo ay labadii sano ee ugu dambeysay ka talinaysay dowladda Soomaaliya.

9/29/2013 10:22 AM EST
Axad, Sunday, September 29, 2013 (HOL) - Wakiilka xoghayaha guud ee Qaramada Midoobay u qaabilsan arrimaha Soomaaliya Nicholas Kay ayaa shalay kullan ballaaran la qaatay jaaliyadda Soomaaliyeed ee ku nool magaaladda Minneapolis ee gobolka Minnesota.

9/29/2013 9:16 AM EST
Axad, September 29, 2013 (HOL) —Khamiista lasoo dhaafay waxaa laga furay magaalada Baydhabo ee gobolka bay jaamacaddii afaraad oo loogu magic-daray Jaamacadda Ganaane, iyadoo noqonaysa tii labaad oo inta lagu jiro sannadkan laga furo degmadaas. Haddaba waxaa inoo suurogashay in aan wareysi la yeelanno Gudoomiyaha jaamacaddan, Dr. Sheekh Aadan Sh. Saciid, wargeysigiinna wuxuu u dhacay sidan:

9/29/2013 8:04 AM EST
Axad, Sebtember 29, 2013 (HOL) — Dagaal muddo kooban socdey oo dhex maray ciidamada ammaanka Puntland iyo Al-shabaab, ayaa xalay ka dhacay deegaanno hoos taga tuulada Gal-Gala oo koonfur-galbeed magaalada Boosaaso kaga beegan.

9/29/2013 7:57 AM EST
Axad, September 29, 2013 (HOL) — Xubno ka socda wasaarrada arrimaha gudaha iyo ammiga Qaranka iyo xildhibaanno ka tirsan barlamaanka Soomaaliya oo uu horkacayo agaasimaha guud wasaarrada arrimaha gudaha Cali Abtidoon Xallane ayaa maanta gaaray magaalada Beledweyne ee xarunta gobolka Hiiraan, halkaa oo ay ku soo dhaweeyeen mas'uuliyiinta maamulka heer gobol iyo degmo.

9/29/2013 7:45 AM EST
Axad, September 29, 2013 (HOL) — Madaxweynaha Somalia, Xasan Sheekh Maxamuud oo saakay dib ugu soo laabtay Muqdisho ayaa sheegay in kooxda Al-shabaab ay doonayaan inay dhibaatooyin ka geystaan Muqdisho isagoo ku baaqay in la iska ilaaliyo, isagoo sidoo kale wuxuu ka hadlay safarro uu dalal kala duwan kusoo maray.

9/29/2013 7:23 AM EST
Axad, September 29, 2013 (HOL) — Ciidamada dowladda Soomaaliy ayaa howlgal ay xalay ka sameeyeen Muqdisho waxay kusoo qabqabteen toddoba qof oo ay ku jirto haweenay iyo mas’uul ka tirsan maamulka gobolka Banaadir, kuwaasoo la sheegay in guryahooda laga helay waxyaabaha qarxa oo ay ku jiraan hoobiyeyaal iyo miinooyin.

9/29/2013 4:01 AM EST
Axad, September 29, 2013 (HOL) — Telefishinka Channel 4 ayaa sheegay in la ogaaday in weerarkii xarunta ganacsiga ee Westgate Mall uu hoggaamiye ka ahaa nin u dhashay dalka Kenya oo horay uga tirsanaa ciidamada gaarka ah ee dalkaas.