Tirada dadkii ku dhintay weerarkii Westgate oo la filayo inay sii kororto iyo baroordiiq maalinkii labaad soconaysa (SAWIRRO)
Khamiis, September 26, 2013(HOL) - Inkastoo madaxweynaha dalka Kenya Uhuru Kenyatta uu shaaciyay in 72 qof oo ay ku jiraan 5 kamid
ah kooxihii weerarka qaaday ay ku dhinteen dagaalkii 4-ta maalmood socday, ayaa wararka ay warbaahintu helaysaa waxay
muujinayaan in dhammaan dadkii afduubka loogu haystay gudaha xaruntaas
maydadkoodu ay ku hoos jiraan dhismayaashii burburay.
Wargeyska The Standard oo kamid ah wargeysyada ugu afka
dheer dalka Kenya ayaa sheegay in xalay oo Talaado ahayd tobonnaan kamid ah
dadkii afduubka loo haystay maydadkoodii laga helay burburkii 3 dabaq oo ku
duntay qaraxyadii iyo dabkii ka kacay xarunta Westgate markii ay socdeen
dagaalka lagula jiray kooxdii weerarka fulisay oo gudaha ku haysatay dad aan
tiradooda la xaqiijin Karin.
Warbaahinta dalka Kenya qaarkeed ayaa tabisay in loo
malaynayo 70 qof oo la la’yahay inay kamid yihiin dadka maydadkoodu ay ku hoos
jiraan burburka dhismaha.
Dawlada Kenya oo ku mashquulsan baaritaanka iyo tijaabooyin
laga qaadayo maydadka rag loo malaynayo inay ahaayeen kooxihii hubaysnaa ayaa
ka gaabsatay inay ka hadasho halka ay ku dambeeyeen dadkii afduubka loo haystay
oo ay haatan cadaatay inaan jawaab loo haynin meesha ay mareen.
Waxayna inta badan wargeysyada Kenya qorayaan in aysan
cidina ka badbaadin dadkii adfuubka loo haystay iyadoo lagu mashquulsanyahay
baaritaannada cidii ka dambaysay weerarka oo kaliya.
Baroordiiq
Waxaa soconaya maalintii labaad oo barooqdiiq ah, iyadoo
hoos loo dhigay calanka Kenya, dadkii ay qaraabadoodu dhimatayna ay wadaan
aaska loo samaynayo dadkii ku geeriyooday weeraradan oo ahaa kuwii ugu
khasaaraha badnaa ee Kenya gil-gila tan iyo 1998, xilligaas oo qarax loo gaystay
safaaraddii Maraykanka ay ku dhinteen 250 qof oo isugu jiray Kenyan iyo ajaanib.
Xog-hayaha golaha sare ee Muslimiinta Kenya Aadan Wachu ayaa
shaaciyay in muslimiintu ay ka qayb qaadan doonaan aas qaran oo maanta loo
samaynayo dadkii ku dhintay weerarka, isagoo sheegay in aan diinta Islaamka loo
nisbayn Karin kooxihii weerarka qaaday oo uu ku tilmaamay inay ahaayeen balaayo
aan diin haysan.
Baaritaanka DNA
Khuburo ka kala timid caalamka ayaa ka caawinaya Kenya baaritaanka DNA-da iyo
faro laga qaadayo dad laga soo saaray burburka hoostiisa oo loo malaynayo inay
yihiin kooxihii weerarka gaystay.
Wadamada Israel,Germany, Maraykanka,Britain iyo dalal kale
oo Kenya ay saaxiib yihiin ayaa ka qayb qaadanaya baaritaannada.
Dhimashada
Kooxda Alshabaab ee ka tirsan urur weynaha Alqaacida oo
weerarkan mas'uuliyaddiisa sheegatay ayaa shaacisay dhimashada inay gaarayso
137, inkastoo warkaas aan si rasmi ah loo xaqiijin Karin.
Balse dawlada Kenya oo dhimashada rasmiga ah ku tilmaantay
inay tahay 72 qof oo ay ku jireen 5 kamid ah raggii hubaysnaa ee weerarka
qaaday ayaa culays badan kala kulmaysa warbaahinta gudaha oo doonaysa in
dawladu ay shacabka u iftiimiso khasaaraha dhabta ah ee ka dhashay weerarradii
xarunta ganacsiga ee Westgate.
Axmed C/samad, Hiiraan Online
[email protected]
Nairobi , Kenya