10/14/2019
Today from Hiiraan Online:  _
Wararka Maanta- Arbaco, Sept 25, 2013
Xukuumadda federaalka Soomaaliya oo guddi heer wasiir ah u Magacawday Qaban-qaabada Shirka dib-u-heshiisiinta ee Jubba



Arbaco, September 25, 2013 (HOL) — Xukuumadda Soomaaliya ayaa guddi heer wasiir ah u magacowday qabanqaabada shirka dib-u-heshiisiinta Jubba, kaasoo lagu qaban doono magaalada Muqdisho.

Warsaxafadeed kasoo baxay xukuumadda ayaa lagu sheegay in heshiiskii 27-kii August 2013 ku dhex maray Addis Ababa dowladda Soomaaliya iyo maamulka KMG ah ee Jubba uu ahaa tallaabo horumar leh oo loo qaaday dhinaca federaaleynta, xasilinta dalka iyo kalsooni-dhisidda Shacabka.

Ku-simaha ra’iisul wasaaraha Soomaaliya, ahna wasiirka khayraadka dalka, Cabdirisaaq Maxamed Cumar ayaa magacaabay guddigan heerka wasiir ah oo qaban-qaabin doona wejiga koobaad ee shirka dib-u-heshiisiinta oo lagu qaban doono Muqdisho 5-ta bisha Oktoobar 2013, iyadoo qaybta labaad oo ah mid nabad-dhisid ahna lagu qaban doono magaalada Kismaayo.

Magacyada Xubnaha guddiga ayaa waxay kala yihiin:

  1. Wasiirka Arrimaha Gudaha iyo  Amniga Qaranka, Mudane Cabdikariim Xuseen Guuleed oo guddoomiyaha guddiga ah
  2. Wasiirka Warfaafinta, boostada, isgaarsiinta iyo gaadiidka, Cabdullaahi Ciilmooge Xirsi.
  3. Wasiirka Gaashaandhigga, Cabdixakiin Maxamuud Xaaji Faqi
  4. Wasiiru-dawlaha Madaxtooyada, Mudane Faarax Sheekh Cabdulqaadir
  5. Wasiir ku-xigeenka Warfaafinta,  Boostada, Isgaarsiinta iyo Gaadiidka, Cabdishakuur Cali Mire
  6. Wasiir ku-xigeenka Gaashaandhigga, Cabdiraxmaan Kulmiye Xirsi
  7. Danjiraha Soomaaliya u Fadhiya dalka Itoobiya, Axmad Cabdisalaam Xaaji Aadan
  8. La-taliyaha Ra'iisal Wasaaraha Dhinaca Siyaasadda, Aadan Ibraahim Aw-Xirsi oo ah xoghayaha guud ee guddiga

Warsaxaafadeedkan ayaa waxaa lagu sheegay in xukuumadda Soomaaliya ay u mahad-celineyso dhammaan dhinacyadii ka qayb qaatay fududeynta heshiiskii Addis Ababa ee 27, August 2013, gaar ahaan guddoonka golaha wasiirrada arrimaha dibadda ee IGAD.

Sidoo kale, Xukuumaddu waxay ugu baaqday shacabka Soomaaliyeed inay af iyo addinba ku taageeraan dhaqan-galka heshiiskan taariikhiga ah. Iyadoo lagu yiri qoraalka in xubnaha guddiga la farayo inay si hawl-karnimo leh uga soo dhalaalaan hawshan muhiimadda weyn qaranka u leh ee fulinteeda loo igmaday.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
9/25/2013 1:51 PM EST
Arbaco, September 25, 2013 (HOL) — Madaxweynaha Soomaaliya, Xasan Sheekh Maxamuud oo ku sugan dalka Mareykanka ayaa sheegay in kooxda Al-shabaab aysan khatar ku ahayn Soomaaliya iyo Afrika oo keliya, balse ay khatar ku tahay caalamka oo dhan.

9/25/2013 12:12 PM EST
Arbaco, September 25, 2013 (HOL) — Wafdi uu hoggaaminayo wasiirka warfaafinta, boostada, is-gaarsiinta iyo gaadiidka ee jamhuuriyadda federaalka Soomaaliya, Mudane C/laahi Ciil-mooge Xirsi, ayaa ku sugan magaalada Montreal ee dalka Canada.

9/25/2013 8:56 AM EST
Arbaco, September 25, 2013 (HOL) — Ergayga Qaramada Midoobay ee Soomaaliya, dajire Nicholas Kay ayaa ku baaqay in la xoojiyo dagaalka lagula jiro Al-shabaab laguna kordhiyo ciidamada AMISOM ee ku sugan Soomaaliya 5,000 oo askari oo dheeraad ah.

9/25/2013 8:40 AM EST
Arbaco, September 25, 2013 (HOL) — Wareegto kasoo baxday xafiiska madaxweeyne ku xigeenka maamulka Jubba Jen. C/laahi Sheekh Ismaaciil Fartaag ayaa mudo laba bilood ah lagu mamnuucay dhismaha dhulalka bannaan iyo kuwa laysku heysto.

9/25/2013 4:52 AM EST
Arbaco, September 25, 2013 (HOL) — Kal-fadhigii 24-aad ee golaha xuquuqul insaanka Qaramada Midoobay oo maanta ka dhacay magaalada Geneve - Switzerland kaasoo diiradda lagu saaray xuquuqda aadanaha Soomaaliya ayaa lagu ammaanay dadaalka xukuumadda Soomaaliya ugu jirto taabbo-galinta dhawrista iyo horumarinta xuquuqda aadanaha, iyadoo 22-kii sano ee lasoo dhaafay ay dalka ka dhacayeen xad-gudubyo liddi ku ah xuquuqda Aadanaha.

9/25/2013 4:50 AM EST
Arbaco, September 25, 2013 (HOL) —Qurba jooga deegaanka Jir-jir ee gobolka Awdal ayaa waxay fasallo wax lagu barto ku kordhiyeen dugsiga hoose iyo dhexe ee deegaankaas, iyadoo munaasabaddii lagu furayay ay ka soo qaybgaleen cuqaasha, waxgaradka, xildhibaannada golaha deegaanka Boorama iyo haween qurba-joog ah oo kasoo jeeda deegaankan.

9/25/2013 4:02 AM EST
Arbaco, September 25, 2013 (HOL)- Biyo la'aan xooggan ayaa ka jirta degmada Qandala ee gobolka Bari, kaddib markii aysan halkaas muddo dhowr sano wax roobab ahi ka di'in.

9/25/2013 3:07 AM EST
Baarlamaanka Kenya ayaa shalay galinkii dambe yeeshay kulan looga hadlayay ammaanka dalka kadib markii Alshabaab ay qaaday weerar khasaare badan dhaliyay oo lala beegsaday xarun ganacsi oo ku taalla xaafada Westlands oo kamid ahayd meelaha ugu ammaanka fiican ee magaalada Nairobi.