4/13/2021
Today from Hiiraan Online:  _
Wararka Maanta- Isniin, Oct 7 , 2013
Xildhibaannada labada Aqal ee Baarlamaanka Itoobiya oo Maanta u doortay Madaxweynaha cusub ee dalkaas Wasiirkii Beeraha



Isniin, Oktoobar 07, 2013 (HOL) — Xildhibaannada labada aqal ee Itoobiya ayaa maanta u doortay madaxweynaha dalkaas, Mulatu Teshome Wirtu oo ahaa wasiirkii hore ee beeraha dalka Itoobiya, kaasoo xilka hayn doona lixda sano ee soo socota.

Danjire Teshome oo 57-jir ah ayaa siyaasadda ku jiray muddo dheer, isagoo jagooyin kala duwan kasoo qabtay dowladda Itoobiya, isagoo sannadihii ugu dambeeyay ahaa danjiraha dalkiisa u fadhiya dalka Turkiga.

“Baarlamaanka sare iyo midka hoose ee dalka Itoobiya waxay madaxweyne u doorteen maanta oo Isniin ah dajire Malatu Teshome,” ayaa lagu yiri war kasoo baxay wasaaradda arrimaha dibadda Itoobiya.

Doorashada madaxweynaha cusub oo ahayd mid gacan-taag ah ayaa waxaa lagu doortay cod aqlabiyad ah, wuxuu bedeli doonaa madaxweynihii hore ee Itoobiya, Girme Wolde Giorgis oo 88- jir ah oo 12-sano madaxweyne ahaa.

Girme Wolde ayaa xilka madaxweynimo ee dalkaas loo doortay sannadkii 2001, isagoo mar kale xilka loo doortay sannadkii 2007-dii, wuxuuna xilka hayay laba xilli oo min lix sano ah, iyadoo tani ay noqonaysaa markii ugu horreysay oo laga guuleysto.

Madaxweynaha cusub ee dalka Itoobiya ayaa wuxuu kasoo jeeda qowmiyada Oromada oo ka mid ah qowmiyadaha dalka Itoobiya, iyadoo madaxweynihii ka horreeyay uu isaguna ka sooo jeeday isla qowmiyaddan oo ah midda ugu ballaaran qowmiyadaha dalkaas.

Danjire Mulatu Teshome ayaa horay u soo noqday dajiraha Itoobiya ee dalalka Jabbaan iyo Shiinaha, isagoo kale soo qabtay xilka wasiirka beeraha, waxaana ay doorashadiisu ku soo beegmaysaa iyadoo sannadkii hore ee 2012-da uu geeriyooday ra’iisul wasaarihii muddada dheer xukumayay Itoobiya, Meles Zenawi.

Hadalka uu ka jeediyay labada gole dhaarintiisa kaddib ayuu sheegay inuu aad ugu faraxsan yahay xilka madaxweynenimo ee loo doorto, isagoo ballan-qaaday inuu shacabka Itoobiya oo dhan ugu shaqeyn doono si daacad ah.

Itoobiya ayaa waxay kumannaan askari kaga sugan yihiin gudaha Soomaaliya iyadoo aan la ogeyn go'aanka madaxweynaha cusub uu ka qaadan doono, inkastoo ra'iisul wasaaraha oo ka awood badan uu maalmo ka hor sheegay in ciidamadoodu ay sii joogi doonaan gudaha soomaaliya ayna la dagaalami doonaan Al-shabaab.

Nidaamka xukun Itoobiya oo ah madaxweyne awood yar iyo ra’iisul wasaare awood badan ayaa waxaa labadaba soo doorta xubnaha labada aqal ee dalkaas, waxaana madaxweynihan cusub uu ka mid noqonayaa madaxweynayaashii soo mara Itoobiya tan iyo markii xukunka laga tuuray madaxweynihii hore ee dalkaas Col. Mingistu Hailemariam sannadkii 1991-kii.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
10/7/2013 3:02 PM EST
Isniin, Oktoobar 07, 2013 (HOL) — Wasiirka Arrimaha gudaha Somaliland Cali Maxamed Warancade, ayaa faahfaahin ka bixiyey dilkii laba cisho ka hor ka dhacay magaaladda Hargeysa oo afar dhalinyaro ahi dhagax ku dileen wiil dhalinyaro ah.

10/7/2013 10:23 AM EST
Isniin, Oktoobar 07, 2013 (HOL) — Ra’iisul wasaaraha Somalia, Cabdi Faarax Shirdoon (Saacid) ayaa sheegay Axaddii shalay in burburinta Al-shabaab ay la kaashan doonaan dalalka caalamka iyo kuwa dariska la ah Soomaaliya.

10/7/2013 9:41 AM EST
Isniin, Oktoobar 07, 2013 (HOL) — Madaxweynaha Somalia, Xasan Sheekh Maxamuud oo maanta kulan kula yeeshay xarunta madaxtooyada sarakiisha ciidamadda xoogga dalka ayaa amaanay sida ay ciidamadu u shaqeeyaan.

10/7/2013 8:12 AM EST
Isniin, Oktoobar 07, 2013 (HOL) — Baarlamaanka Soomaaliya ayaa dib u celiyay maanta hidise sharciyeed ku saabsan horumarinta bangiga dhexe ee Soomaaliya oo ay soo gudbisay wasaaradda maaliyadda Soomaaliya.

10/7/2013 8:06 AM EST
Isniin, Oktoobar 07, 2013 (HOL) — Hoggaamiyaha maamulka KMG ah ee Jubba Sheekh Axmed Max’ed Islaam Axmed Madoobe oo maanta shir jaraa’id ku qabtay madaxtooyada ee Kismaayo ayaa uga warbixiyay arimo badan oo ay kamid yihiin safarro uu kusoo maray dalal kala duwan, shirka la filayo in uu ka dhaco Muqdisho iyo weliba wafdigii ka socday dowladda Soomaaliya ee dhawaan soo gaaray magaalada Kismaayo.

10/7/2013 7:49 AM EST
Isniin, Oktoobar 07, 2013 (HOL) — Shir looga hadlayo shidaal la baarayo Soomaaliya ayaa maanta ka furmay magaalada London ee xarunta Britain waxaana shirkaas ka qaybgalay wasiirka khayraadka dalka, C/risaaq Cumar Maxamed iyo mas’uuliyiin ka socda shirkadaha shidaalka baara iyo shirkad laga leeyahay dalka Britain oo Soomaaliya ka baaraysa shidaalka.

10/7/2013 7:35 AM EST
Isniin, Oktoobar 07, 2013 (HOL) — Booliiska dalka Kenya ayaa maanta soo bandhigay magacyada iyo sawirrada laba nin oo Soomaali ah oo la sheegay inay qayb ka qaataan weerarkii bishii hore lagu qaaday dhismaha ganacsi ee Westgate Mall ee magaalada Nairobi.

10/7/2013 4:15 AM EST
Isniin, Oktoobar 07, 2013 (HOL) — Shir ay AMISOM soo qaban-qaabisay oo laba maalmood ka socday ayaa lagu soo gabgabeeyay gobolka Minnesota ee dalka Mareykanka. Kulankan ayaa waxaa kasoo qayb-galay xubno ka kala yimid Waqooyiga Ameerika kana koobnaa aqoon-yahanno, culumaa’uddiin, haween iyo dhallinyaro.

10/7/2013 4:09 AM EST
Isniin, Oktoobar 07, 2013 (HOL) — Ugu yaraan 50-qof ayaa ku dhintay tiro intaas ka badanna way ku dhinteen kaddib mudaaharaadyo rabshado wata oo shalay oo Axad ahayd ku dhexmaray dalka Masar.

10/7/2013 2:21 AM EST
Isniin, Oktoobar 07, 2013 (HOL) — Maamulka Somaliland ayaa sheegay inay albaabbada isugu dhufteen xafiis lagu bixin jiray baasaboorka Soomaaliga ee E-Passport-ka loo yaqaan, iyagoo sheegay inay maxakamad soo taagayaan shaqsiyaadkii ku lugta lahaa howshan.

10/7/2013 2:10 AM EST
Isniin, Oktoobar 07, 2013 (HOL) — Guddoomiyaha gobolka Banaadir ahna duqa Muqdisho, Maxamuud Axmed Nuur (Tarsan) oo ka qaybgalay kulan ka dhacay degmada Howlwadaag ayaa ugu baaqay shacabka Muqdisho inay iska dhiciyaan Al-shabaab oo aysan u ogolaan degmooyinkooda.

10/7/2013 2:09 AM EST
Isniin, Oktoobar 07, 2013 (HOL) — Dowladda Mareykanka ayaa shaaciysay magaca sarkaalkii ay ku weerareen xeebta degmada Baraawe ee gobolka Shabeellada Hoose, halkasoo ah saldhigga ugu weyn ururka Al-shabaab ay ku leeyihiin Koonfurta Soomaaliya.