3/28/2024
Today from Hiiraan Online:  _
Wararka Maanta- Axad, Oct 6 , 2013
RA’IISUL WASAARE SAACID: “Golaha wasiirada waxaan ku sameyn doonnaa isku shaandheyn, waana ballaarin doonnaa”


Axad, Oktoobar 06, 2013 (HOL) — Ra’iisul wasaaraha Somalia, Cabdi Faarax Shirdoon (Saacid) oo ka hadlayay waxqabadka xukuumaddiisa tan iyo markii la magacaaba oo ku beegnayd 06-da Oktoobar 2012 oo maanta ku beegan ayaa wuxuu sheegay in isku shaandheyn uu ku sameyn doono wasiirradiisa, isagoo xusay in la ballaarin doono.

Mudane Saacid ayaa sheegay in qorshaha isku-shaandheynta xukuumadda uusan ahayn mid lagu eryayo wasiirrada hadda shaqeynaya, balse qorshuhu uu yahay in la kordhiyo golaha si howsha xukuumadda hortaalla saddexda sano ee soo socota ay wax uga qabtaan.

“Isku shaandheynta lagu sameynayo wasiirrada xukuumadda Soomaaliya macnihiisu ma ahan in la kala eryo wasiirrada, balse waa mid howsha lagu ballaarinayo, waayo waxaa na horyaalla howlo badan oo ay ka mid tahay dib u dhiska dalka iyo caalamka oo na leh sideen idiin la shaqeynaa,” ayuu yiri ra’iisul wasaaraha Soomaaliya.

Ra’iisul wasaaraha Soomaaliya ma uusan sheegin goorta isku shaandheynta lagu sameyn doono golaha wasiirrada iyo tirada golaha laga dhigayo midna, balse wuxuu sheegay in dhawaan ay howshaan qaban doonaan iyagoo ka dhiganaya tusaale sannadkii ay howsha soo hayeen.

Sidoo kale, ra’iisul wasaaraha Soomaaliya wuxuu ka hadlay howsha amniga lagu sugayo, isagoo sheegay in xukuumaddiisa halkii sano ee ay howsha soo haysay inay xoogga saartay sidii amaanka loo sugi lahaa.

“Xukuumaddu waxay ku dadaashay sidii ay ciidamada dowladdu tababarro u heli lahaayeen, waxayna tababarka ciidamada u soo wareejisay Soomnaaliya gudaheed, halkii horay looga  tababari jiray dibadda. Dunidana waxaanu ku qancinnay in cunno-qabteynta hubka nagala qaado si aan uga soo iibsanno caalamka hubkii aan u baahannahay,“ ayuu yiri Saacid.

Dhanka kale, ra’iisul wasaaraha oo sii hadlaya ayaa sheegay in awooddii Al-shabaab ay wiiqeen, wuxuuna xusay in Al-shabaab aysan caqabad ku ahayn Soomaaliya oo keliya, balse ay muujisay dhawaan inay caalamka oo dhan ku tahay caqabad buuxda.

“Weerarkii Al-shabaab ay ku qaadday dalka Kenya wuxuu caddeyn u yahay inay khatar ku tahay dunida oo dhan, waxaana dunida weydiisanyanaa inay ka geystaan gacan sidii kooxdan loo cirib-tiri lahaa,” ayuu ra’iisul wasaaruhu ku sheegay khudbadda uu kaga hadlayay waxqabadka xukuumaddiisa.

Siyaasadda oo uu ka hadlay ayuu sheegay in xukuumaddiisu ay guulo cad ka gaartay dhinaca siyaasadda, isagoo xusay inay u qorsheysan tahay in wax walba oo khilaaf ah oo yimaada aan lagu xallin awood; balse lagu xalliyo hab nabadeed iyo wadahadal.

Ra’iisul wasaaraha ayaa tusaale u soo qaatay heshiis ay dowladdu horay ula gashay ururka Ahlusunna Waljamaaca iyo maamulka KMG ah ee Jubba oo uu ku tilmaamay inay xukuumaddu u martay hab nabadeed aan awood lug ku lahayn.

Ugu dambeyn, wuxuu ka hadlay kobcinta dhaqaalaha dalka, isagoo xusay in markii ay xukunka la wareegayeen dhaqaalaha soo xarooda uu bishii ahaa 2.5 milyan oo doollar, balse ay hadda gaarsiiyeen ingta u dhexeysa 09 illaa 10 milyan oo doollar.

Bankiga dhexe ayuu sheegay in markii ay xilka la wareegayeen ay ku jirtay lacag aan ka yar 60,000 oo doollar. Maanta ay ku jirto lacago fara badan oo ay dowladdu soo xareyso, isagoo sheegay in taasi ay ku timid dadaal badan oo la sameeyay iyo shaqaalaha aamin ah oo howsha loo dhiibay.

Ra’iisul wasaaraha Soomaalia ayaa xilka loo magacaabay bishii Oktoobar ee sannadkii hore, waxaana tan iyo xilligaas ay dowladdu dadaallo ugu jirtay sidii ay u kasban lahayd shacabka iyo sidii ay u qaban lahayd howlo badan oo aasaas u ah nolosha shacabka Soomaaliyeed.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
10/6/2013 11:05 AM EST
Axad, Oktoobar 06, 2013 (HOL) — Waaxda haweenka iyo arrimaha bulshada ee wasaaradda horumarinta adeegga bulshada dowladda Somalia oo gacan ka helaysa hay'ada caalamiga ah ee Qaramada Midoobay u qaabilsan qoyska ee UNFPA ayaa maanta Muqdisho kusoo gaba-gabeysay siminnaar looga hadlayay tacadiyada loo geysto haweenka Soomaaliyeed.

10/6/2013 9:13 AM EST
Axad, Oktoobar 06, 2013 (HOL) — Xildhibaanno ka tirsan baarlamaanka Soomaaliya ayaa duhurnimadii maanta ka degay garoonka diyaaradaha magaalada Beledweyne, halkaa oo ay ku soo dhaweeyeen mas'uuliyiinta maamulka gobolka Hiiraan oo uu hogaminayay guddoomiyaha gobolka iyo xubno ka socday wasaarrada arrimaha gudaha oo horay u sii joogay magaalada.

10/6/2013 9:08 AM EST
Axad, October 06, 2013(HOL) :- Wafdi uu horkacayo hogaamiyaha maamulka KMG ee Jubba Sheekh Axmed Max’ed Islaam (Axmed Madoobe) ayaa maanta dib ugu soo laabtay dalka, kadib safarro kala duwan oo uu kusoo maray dalal kala duwan.

10/6/2013 8:52 AM EST
Axad, Oktoobar 06, 2013 (HOL) — Xoghayaha arrimaha dibadda Mareykanka John Kerry ayaa sheegay inay sii wadayaan howlgallada ay ku baacsanayno kooxaha mas’uulka ka ah weerarrada argagaxisada ah ee ka dhaca Somalia iyo Liibiya.

10/6/2013 7:16 AM EST
Axad, Oktoobar 06, 2013 (HOL) — Fannaanada weyn ee Hibo Maxamed Hudoon (Hibo Nuura) oo bishii hore dib ugu soo laabatay Muqdisho ayaa rajo weyn ka muujiyay in Muqdisho ay dib ugu laabanaso Muqdishadii hore.

10/6/2013 4:25 AM EST
Axad, Oktoobar 06, 2013 (HOL) — Sheekh Maxamed Cabdi Umal oo ka mid ah culumada Islaamka ee dalka Kenya ayaa sheegay in loogu hanjabay in la dili doono, balse aysan taasi wax cabsii ah gelin doonin oo uu sii wadi doono wacyi-gelinnada diiniga ah.

10/6/2013 3:52 AM EST
Axad, Oktoobar 06, 2013 (HOL) — Ergyga Midowga Afrika ee arrimaha Soomaaliya, Maxamed Saalax Anaadiif iyo wafdi uu hoggaaminayo oo ka socda AMISOM ayaa kulan kula yeeshay magaalada Minneapolis jaaliyadda Soomaaliyeed ee gobolka Minnesota ku nool.

10/6/2013 3:35 AM EST
Axad, October 06, 2013(HOL) :- Qaraxan oo ahaa mid xooggan islamarkaana siweyn looga maqlayay guud ahaan xaafadaha kala duwan ee magaalada Kismaayo ayaa saaka aroortii ka dhacay xaafadda Faanoole ee magaalada Kismaayo.

10/6/2013 3:09 AM EST
Axad, Oktoobar 06, 2013 (HOL) — Dowlada Mareykanka ayaa sheegtay inay ka dambeysay weerarkii habeen hore lagu qaaday degmada Baraawe ee gobolka Shabeellada hoose oo ah saldhigga ugu weyn ee Al-shabaab ay ku leedahay Koonfurta Soomaaliya.

10/6/2013 2:48 AM EST
Axad, Oktoobar 06, 2013 (HOL) — Wasiirka arrimaha gudaha iyo ammaanka Qaranka, C/kariin Xuseen Guuleed oo ka hadlayay tababar loo furayey qaar ka mid ah saraakiisha booliiska Somalia ayaa sheegay in booliiska Somalia uu ka tayo wanaagsan yahay booliiska dalka Ciraaq.