3/28/2024
Today from Hiiraan Online:  _
Wararka Maanta- Khamiis, Oct 3 , 2013
Maydadka sagaal qof oo laga soo saaray burburka Dhismaha Westgate Mall ee Magaalada Nairobi iyo Guddi baaraya Weerara

Khamiis, Oktoobar 03, 2013 (HOL) — Maydadka sagaal qof oo cusub oo ka mid ah dadkii maqnaa ayaa laga soo saaray burburka suuqa ganacsiga Westgate Mall ee magaalada Nairobi, kaasoo toddobaadkii hore ay weerareen kooxo ka tirsan Xarakada Al-shabaab ee Soomaaliya.

Qaar ka mid ah maydadkan ayaa ku gubtay gudaha dhismahaas oo uu dab ka kacay maalintii ugu dambeysay afartii maalmood oo dhismahaa ay ku hayeen gacanta xoogagga Al-shabaab.

Dadkan ayaa la sheegay inay ku duntay qayb ka mid ah saqafka sare ee suuqaas kaddib markii qaraxyo waaweyn ay ka dhaceen gudaha suuqaas intii uu socday iskahorimaadka u dhexeeyay ciidamada Kenya iyo kooxihii weerarka geystay, waxaana weli maqan sida la sheegay tiro dad ah oo aan la hayn nolol iyo geeri.

Madaxweynaha Kenya, Uhuru Kenyatta ayaa Taladaadii amar ku bixiyay in la saaro guddi xeer-beegti ah oo soo baara weerarkii suuqa Westgate Mall iyo haddii ay jiraan dal-daloolooyin dhinaca ammaanka ah.

Guddiga ayaa baari doona bal inay jireen digniino kasoo horreeyay weerarka lagu qaaday suuqaas iyo in jawaabta ciidamada ammaanku ay ahayd mid si wanaagsanna u agaasiman.

Kenyatta oo ka hadlayay duco golaha diimaha dalka Kenya ay u sameeyeen dadkii ku dhintay weerarkii Westgate ayaa sheegay in dalkiisu uu iska difaaci doono weerarrada kaga imaanaya xoogaga Al-shabaab ee Soomaaliya oo ku goodiyay mar kale inay weerarro isda-bajoog ah ku qaadayaan dalkaas hadii aysan ciidamadooda kala bixin Soomaaliya.

“Ciidamadeennu way sii joogayaan Soomaaliya, waxayna dagaal adag kula geli doonaan Al-shabaab si looga adkaado, mana baxayaan cidamadeennu inta Soomaaliya ay nabad ka noqonayso,” ayuu Kenyatta ku yiri hadal aad u kululaa oo uu ka jeediyay ducadaas.

Madaxweynuhu wuxuu sheegay in dhibaatadii Westgate Mall ka dhacday ay ahayd mid ay sameeyeen argagaxiso, aysanna mas’uul ka ahayn Islaamka iyo cid kale, isagoo sheegay in kooxaha argagaxisada ay dhibaato weyn ku hayaan shucuubta Geeska Afrika oo dhan.

Al-shabaab ayaa soo cusboonaysiisay hanjabaadda ku aaddan inay weerarro ku qaadi doonto dalka Kenya shalay oo Arbaco ahayd, iyadoo sheegtay inay sii joogitaanka ciidamada Kenya horseedayso dhibaato kale oo waddankaas ka dhacda.

"Waxaan ka weerari doonnaa Kenya halka ugu xanuunka badan, waxaanu u beddeli doonnaa magaaloooyinkooda qabuure iyo wabiyo dhiig ah oo Nairobi oo dhan mara," ayaa lagu yiri hadal ay Al-shabaab soo saartay.

Dalka Kenya oo ay ciidammo kaga sugan yihiin Soomaaliya ayaa waxay tan iyo markii ay ciidamadeeda u soo dirtay Soomaaliya bishii Oktoobar ee 2011 oo laba sano laga joogo ka dhacayay gudaha dalkeed dilal qorsheysan oo ay geysanayso Al-shabaab iyo weerarro u badan qaraxyo.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
10/3/2013 2:21 PM EST
Khamiis, Oktoobar 03, 2013 (HOL) — Munaasabad si qurux badan loo soo agaasimay islamarkaana ay ka soo qeyb-galleen mas'uuliyiinta maamulka gobolka Hiiraan, agaasimaha guud ee wasaarrada arrimaha gudaha, xildhibaanno, saraakiisha ciidamada dowladda, kuwa Jabuuti ee howlgalka Midowga Afrika AMISOM iyo marti-sharaf kale ayaa maanta lagu doortay hogaanka ururka dhalinyarrada gobolka Hiiraan.

10/3/2013 12:14 PM EST
Khamiis, Oktoobar 03, 2013 (HOL) — Bisha November ee soo socota ayaa la filayaa in wafdiyo ka socda dowladda Soomaaliya iyo Somaliland ay kalunkii saddexaad ku yeeshaan dalka Turkiga, kaasoo lagu sii wadayo wadahadalka u socda labada dhinac.

10/3/2013 11:56 AM EST
Khamiis, Oktoobar 03, 2013 (HOL) — Allaha u naxariistii waxaa xalay magaalada Hargeysa koox dhallinyaro ahi ku dileen wiil dhalinyaro ah oo afar maalmood ka hor ka qalinjabiyey jaamacadda Hargeysa oo magaciisa la odhan jiray Mustafe Cabdi Xasan.

10/3/2013 11:48 AM EST
Khamiis, Oktoobar 03, 2013 (HOL) — Ugu yaraan 11-qof ayaa geeriyooday kaddib shil diyaaradeed oo maanta ka dhacay garoonka diyaaradaha magaalada Lagos ee dalka Nigeria, iyadoo diyaaraddan oo ahayd nooca yaryar ay soo dhacday wax yar kaddib markii ay duushay.

10/3/2013 10:29 AM EST
Khamiis, Oktoobar 03, 2013 (HOL) — Madaxweynaha Soomaaliya, Xasan Sh. Maxamuud ayaa maanta ka hadlay dagaalkii Somalia ka dhacay 20-sano ka hor kaas oo loogu magac-daray Black Hawk Down, kaasoo ay ku dhinteen dad badan oo isugu jiray Soomaali iyo ciidamadii Soomaaliya u soo gurmaday oo Mareykanku uu hoggaaminayay.

10/3/2013 9:47 AM EST
Khamiis, Oktoobar 03, 2013 (HOL) — Golaha wasiirrada Soomaaliya ayaa kulankoodii caadiga ahaa ee maanta waxay uga doodeen qodobbo muhiim ah oo ay ka mid yihiin shirka dib u heshiisiinta ee Jubba, heshiiskii shirkadda Sahminta shidaalka ee Soma Oil and Gas Exploration iyo warbixinta safarkii ra’iisul wasaaraha ee dalalka Switzerland iyo Turkey.

10/3/2013 9:01 AM EST
Khamiis, Oktoobar 03, 2013 (HOL) — Afhayeenka xisbiga mucaaradka ee dalka Jabuuti, Daahir Axmed Faarax (Deef) ayaa xabsiga la dhigay maalintii koowaad ee bishan Oktoobar, sida barta Twitter-ka ee xisbiga mucaaradka ah ee USN lagu shaaciyay.

10/3/2013 8:35 AM EST
Khamiis, Oktoobar 03, 2013 (HOL) — Afhayeenka ciidamada AMISOM, Col. Cali Aadan Xumad ayaa sheegay in ciidamada Midowga Afrika ay u baahan yihiin taageero caalami ah iyo ciidammo ka yimaada dalalka Afrika ee aan ciidamada ku taageerin si howsha nabad raadinta Soomaaliya loo sii xoojiyo.

10/3/2013 8:13 AM EST
Khamiis, Oktoobar 03, 2013 (HOL) — Ugu yaraan maydadka 94-qof ayaa la helay 250-qof oo kalena way maqan yihiin kaddib markii doonni tahriib ahaan u sidday ay ku gubatay kuna dagtay xeebaha Koonfureed ee dalka Talyaaniga.

10/3/2013 6:59 AM EST
Khamiis, Oktoobar 03, 2013 (HOL) — Maxkamadda ciidamada sare ee ciidamada qalabka sida ee dowladda Soomaaliya ayaa maanta xukun dil ah ku ridday laba askari oo ilaalo u ahaa xildhibaan ka tirsan baarlamaanka Soomaaliya, kuwaasoo lagu helay inay dileen laba askari oo booliis ah.

10/3/2013 6:28 AM EST
Khamiis, Oktoobar 03, 2013 (HOL) — Xildhibaan Nuur Iidoow Beyle oo ka mid ah mudanayaasha baarlamaanka Soomaaliya oo la hadllay HOL ayaa faah faahin dheeraad ah ka bixiyay kulamo maalmihii ugu danbeeyay xubno ka socda wasaarrada arrimaha gudaha kula lahaayeen degmadaBeledweyne maamulka xiligan jira, waxgaradka, odayaasha dhaqanka iyo qeybaha bulshada oo loogu gogol xaarayo dhismaha maamul markii ugu horeysay ay sameysan doonaan bulshada reer Hiiraan.

10/3/2013 2:53 AM EST
Khamiis, Oktoobar 03, 2013 (HOL) — Ra’iisal wasaaraha Somalia, Cabdi Faarax Shirdoon (Saacid) ayaa rajo wanaagsan ka muujiyay in xukuumaddu ay ku guulaaysato ballan-qaadyadii ay horay u sameysay, gaar ahaan in la gaarsiyo dalka doorashooyin xor ah.

10/3/2013 2:49 AM EST
Khamiis, Oktoobar 03, 2013 (HOL) — Qarax bambaano oo xalay ka dhacay magaalada Jowhar ee xarunta gobolka Shabeellada dhexe ayaa shabay inay ku dhaawacmaan laba ruux oo dhallinyaro ah, iyadoo kooxihii weerarkan geystay ay goobta ka baxsadeen.