3/29/2024
Today from Hiiraan Online:  _
Wararka Maanta- Arbaco, Oct 2 , 2013
Hay’adda Xuquuqul Insaanka ee Amnesty oo Dowladda Kenya ugu baaqday inaysan dib u celin Qoxootiga Soomaaliyeed

Kenya hosts almost 500,000 refugees and asylum seekers, the vast majority from Somalia.
Arbaco, Oktoobar 02, 2013 (HOL) — Hay’adda xuquuqda aadanaha ee Amnesty International ayaa uga digtay dowladda Kenya inay kumannaanka qoxootiga Soomaaliyeed ay dib ugu celiso dalkooda oo dalkooda ay weli ka jiraan rabashado iyo khatar dhinaca ammaanka ah.

Warbixin hay’addu ayaa daba-socotay qorshe uu soo jeediyay guddoomiyaha guddiga difaaca ee baarlamaanka Kenya, Ndung’u Gethenji oo dowladda ay uga codsanayaan in dib loo celiyo qoxootiga Soomaaliyeed ee dalkooda ku sugan.

“Qoxootiga Soomaalida dib looguma celin karo dalkooda, waayo weli waxaa ka jiro qaybo dalkooda ka mid ah weerarro ay Al-shabaab la beegsanayso shacabka. Sidaa daraadeed dowladda dowladda waa inay sharciyada dunida ee qoxootiga ay xaq-dhowrto,” ayuu tiri ku xigeenka madaxa Afrika ee hay’adda Amensty, Sarah Jackson.

Baaqa xildhibaanka ayaa daba-socda weerarkii lagu qaaday suuqa ganacsiga  ee Westgate Mall oo mas’uuliyaddiisa ay sheegatay Al-shabaab oo ah koox ka dagaalanta gudaha Soomaaliya.

“Eedeymaha ku saabsan in ammaan-xumada Kenya sida weerarkii Nairobi ay sabab u yihiin xeryaha qoxootiga ee ku yaalla dalkaas, waxay qayb ka tahay faruuqa lagu hayo dadka magan-galyada u soo doontay Kenya,” ayay tiri Jackson.

Iyadoo sii hadlaysa ayay intaas ku dartay: “Kenya waxay qayb ka tahay dalalkii saxiixay qodobbada xuquuqda aadanaha, sidaa daraadeed waa inay soo dhaweyso dadka magan-galyo doonka ah. Tanina waa qayb ka mid ah sharciyada caalamiga ah, waana inay adeecdo.”

Dalka Kenya ayaa waxaa ku nool in ka badan Nus malyuun qof oo qoxooti Soomaaliyeed ah, kuwaasoo ku jira xeryaha Dhadhaab ee gobolka Waqooyi-bari ee Kenya oo ay marto soohdinta u dhexeysa Soomaaliya iyo Kenya.

Hay’adda Amnesty ayaa sidoo kale warbixinteeda ku sheegtay in 1.1 milyan qof oo Soomaaliya ay ku barakacsan yihiin gudaha Soomaaliya, kuwaasoo 80% ku nool deegaannada ay colaadu ka jiraan ee Koonfurta iyo bartamaha Soomaaliya.

Bishii December 2012, xukuumadda Kenya waxay soo saartay amar ay ku dalbatay in dhammaan qoxootiga Soomaalida ah ee ku nool dalkeeda ay ku xaroodaan xeryaha qoxootiga, taasoo muran badan dhalisay.

Maxkamadda sare ee Kenya ayaa 26-kii bishii July ee sannadkan waxay soo saartay go’aan ay ku joojinayso in qoxootiga ku nool magaalooyinka dib loogu celiyo xeryaha qoxootiga Kenya.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
10/2/2013 12:18 PM EST
Arbaco, Oktoobar 02, 2013 (HOL) — Xarakada Al-shabaab ee Somalia ayaa ku goodisay maanta oo Arbaco ah inay kordhinayso weerarrada ay Kenya ka geysanayso, kaddib markii madaxda Kenya ay ku gacan-sayreen inay kala baxaan Soomaaliya ciidamadooda.

10/2/2013 10:59 AM EST
Arbaco, Oktoobar 02, 2013 (HOL) — Guddiga baarlamaanka dalka Kenya u qaabilsan difaaca ayaa la filayaa inay ugu baaqaan dowladda Kenya in la xiro dhammaan xeryaha qaxootiga ee ku yaalla dalka Kenya oo ay ku jiraan dad u badan Soomaali ah sababo dhinaca mmaanka ah awgeed.

10/2/2013 10:45 AM EST
Arbaco, Oktoobar 02, 2013 (HOL) — Maxkamadda dambiyada dagaalka ee ICC aya amar ku bixisay in lasoo xiro wariye u dhashay dalka Kenya oo lagu eedeeyay inuu fara-gelin ku sameeyay dacwadda loo haysto madaxweyne ku xigeenka dalka Kenya, William Ruto.

10/2/2013 9:34 AM EST
Arbaco, Oktoobar 02, 2013 (HOL) — Dowladda Kanada ayaa sheegtay inay ku bixinayso shan milyan oo doollar xoojinta howgalka Midowga Afrika ee Soomaaliya (AMISOM), iyadoo tallaabadan ay kusoo beegmayso xilli weerar ay Al-shabaab ku qaadday dhisme ganacsi oo ku yaalla magaalada Nairobi.

10/2/2013 7:26 AM EST
Arbaco, October 02, 2013(HOL) :- Qaraxan oo la sheegay in uu ahaa nooca miinooyinka dhulka lagu aaso ayaa waxa uu ka dhacay xaafadda Farjanno, gaar ahaan waaxda Siinaay, walow aysan jirin khasaarooyinka ka dhashay qaraxa.

10/2/2013 3:58 AM EST
Arbaco, Oktoobar 02, 2013 (HOL) — Xaflad si wanaagsan loo soo abaabulay laguna soo dhaweynayo ra'iisul wasaare ku xigeenka ahna wasiirka arrimaha dibada iyo iskaashiga caalamiga ah ee dowladda Soomaaliya, Fawzia Yuusuf Xaaji Aadan ayaa lagu qabtay magaalo madaxda dalka Canada ee Ottawa.

10/2/2013 3:58 AM EST
Arbaco, Oktoobar 02, 2013 (HOL) — Dabley aan haybtooda la garanayn ayaa saakay toogasho ku dilay taliye ku xigeenkii saldhigga booliiska degmada Hodan ee gobolka Banaadir, Col. Shariif Aadan Maxamuud (Seefle).

10/2/2013 3:53 AM EST
Arbaco, Oktoobar 02, 2013 (HOL) — Dagaal culus ayaa ciidamada dowladda Soomaaliya iyo kuwa Al-shabaab ku dhexmaray xalay degmada Mahadaay ee gobolka Shabeellada dhexe, waxaana dagaalkaas ka dhashay khasaare kala duwan.

10/2/2013 3:25 AM EST
Arbaco, Oktoobar 02, 2013 (HOL) — Laba ka mid ah suxufiyiinta ka hawlgala magaalada Laascaanood ee xarunta gobolka Sool ayaa maalintii labaad ku xiran saldhigga dhexe ee maaalada kaddib markii lagu eedeeyay inay baahiyeen warar been ah oo ku saabsan hawlgalo ay dowladda hoose ee Laasacaanood ku banneynayso waddooyin.