5/10/2021
Today from Hiiraan Online:  _
Wararka Maanta- Axad, Oct 13, 2013
Madaxweynaha Soomaaliya oo soo dhaweeyay go’aankii ay Madaxda Afrika ku gaareen in la kordhiyo Ciidamada AMISOM



Axad, Oktoobar 13, 2013 (HOL) — Madaxweynaha Somalia, Xasan Sheekh Maxamuud oo maanta dib ugu soo laabtay Muqdisho kaddib shir uu kaga soo qaybgalay magaalada Addis Ababa ee dalka Itoobiya ayaa soo dhaweeyay go’aanka ay madaxda Afrika ku gaareen in la kordhiyo ciidamada AMISOM.

Xasan Sheekh ayaa sidoo kale soo dhaweeyay go’aan ay hoggaamiyeyaasha qaarada Afrika ku gaareen in la xoojiyo ciidamada ammaanka Somalia iyo in si wadajir ah loola dagaalamo Xarakada Al-shabaab oo dowladda Soomaaliya iyo ciidamada AMISOM kula jirta dagaal.

“Madaxda Afrika waxay isku raaceen inay taageeraan qorshaha ammaanka dalka lagu sugayo iyo horumarka laga gaaray dib u heshiisiinta siyaasadeed. Waxayna muujiyeen sida ay uga go’an tahay in la taageero xoojinta amniga Soomaaliya, iyagoo beesha calaamka ugu baaqay inay taageero muuqata ka geystaan dhismaha ciidamada amniga Soomaaliya. Waxana ku baaqeen in la kordhiyo ciidamada AMISOM iyagoo dalbaday in Qaramada Midoobay nabad kusoo dabaalidda Soomaaliya,” ayuu madaxweynuhu yiri.

Ururka Midowga Afrika ayaa ku baaqay in ciidamada AMISOM lagu kordhiyo 6,235 askari, taasoo ah 35%, si loo xoojiyo dadaallada loogu jiro sidii nabad loogu soo dabaali lahaa Soomaaliya, iyadoo tirada ciidamada AMISOM ay ka dhigayaan ciidamadan cusub 24,000 oo askari.

“Waxaan si aad ah ugu faraxsanahay taageerada ay hoggaamiyeyasha Afirka i tuseen, waxaana naga go’an in qaranka aan dib u dhisno sidoo kalena aan dib u habeyn ugu sameyno ciidamada ammaanka,” ayuu yiri madaxweynaha oo wariyeyaasha la hadlay.

Isagoo intaas ku daray inuu dhammaan madaxda Afirka uga mahadcelinayo sida ay uga go’an tahay inay ciidamadooda u keenaan Soomaaliya. Taasina waa mid muujinaysa buu yiri sida ay walaalaha Afrika uga go’an tahay inay ka qaybqaataan xal raadinta Soomaaliya.

Kordhinta ciidamada AMISOM ayuu ku sheegay in ay gacan ka geysanayso dagaalka lagula jiro Al-shabaab iyo Al-Qaacida oo uu ku sheegay inay yihiin kooxo argagaxiso ah. Isagoo sheegay in Afrika ay hadda diyaar u tahay in la isku kaashado dagaalka Al-shabaab, taasoo uu xusay inay horseedayso inay dowladda Soomaaliay ka adkaato Al-shabaab.

Ugu dambeyn, madaxweyne Xasan wuxuu xusay inuu soo dhaweynayo halkii mowqif ee ay madaxda Afrika ka qaateen maxkamadda dambiyada dagaalka ee ICC, isagoo sheegay in go’aankaas uu yahay tallaabo ay madaxda Afrika horay u qaadeen.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
10/13/2013 1:56 PM EST
Axad, Oktoobar 13, 2013 (HOL) — Iskahorimaad u dhexeeyay ciidammada ka tirsan kuwa dowladda Soomaaliya iyo kooxo hubeysan ayaa galabta ka duleedka magaalada Muqdisho, gaar ahaan deegaanka Siinka dhee kaddib markii uu ciidamada iyo kooxaha hubeysan soo dhexgalay muran.

10/13/2013 1:34 PM EST
Axad, Oktoobar 13, 2013 (HOL) — Maxkamadda gobolka Sool ayaa xukunno kala duwan ku ridday maanta dad la sheegay inay ahaayeen kuwo dilal iyo dhaawacyo geystay, kuwaas oo ay ku jireen kuwii dilay weriye Axmed Saakin oo 23-kii Oktobar ee sannadkii hore lagu dilay magaalada Laascaanood.

10/13/2013 10:42 AM EST
Sheekh Maxamed Yaasiin oo ah maalqabeen Soomaaliyeed ayaa shaaciyay inuu isu soo taagayo tartanka doorashada madaxtinnimo ee la filayo in bisha Janaury ay ka dhacdo magaalada Garoowe ee xarunta u ah Puntland.

10/13/2013 9:14 AM EST
Axad, Oktoobar 13, 2013 (HOL) — Haweenka Puntland ayaa walaac ka muujiyay ka qayb galka xubnaha ka mid noqonaya baarlamaanka cusub ee Puntlad, iyagoo sheegay in shacabka Puntland ay weli ku dhagan yihiin dhaqanka ah in haweenka aysan ka mid noqon hay’adaha xukuumadda.

10/13/2013 8:51 AM EST
Axad, Oktoobar 13, 2013 (HOL) — Hay’adaha ammaanka Kenya iyo kuwa reer galbeedka ayaa walaac xooggan ka muujinaya in Al-shabaab ay mar kale weerarro argagaxiso ka geysato gudaha dalka Kenya, sida uu qoray maanta Wargeyska Daily Nation ee kasoo baxa Kenya.

10/13/2013 8:17 AM EST
Axad, Oktoobar 13, 2013 (HOL) — Ra’iisul wasaaraha Somalia, Cabdi Faarax Shirdoon (Saacid) ayaa war-saxaafadeed uu maanta soo saaray ku sheegay in xukuumaddu ay xaqiijinayso in ammaanka Muqdisho uu yahay mid la isku halleyn karo oo wanaagsan.

10/13/2013 7:57 AM EST
Axad, Oktoobar 13, 2013 (HOL) — Wasiirka warfaafinta, isgaarsiinta iyo gaadiidka xukuumadda Soomaaliya, C/llaahi Ciilmooge Xirsi ayaa maanta hortagay xildhibaannada baarlamaanka Soomaaliya isagoo uga warbixiyay heshiiskii ay xukuumaddu la gashay shirkadda FAVOR LLC oo dhawaan lagu wareejiyay maamulka garoonka diyaaradaha ee Muqdisho.

10/13/2013 7:32 AM EST
Axad, October 13, 2013(HOL)—Xaflad si weyn loo soo agaasimay oo lagu soo dhaweynayay siyaasiga Maxamed Cumar Waayeel oo booqasho ku jooga dalka Sweden ayaa xalay lagu qabtay Magaalada Katrineholm ee dalka Sweden, iyadoo xafladdana ay ka soo qeybgalay dad badan oo ka kala yimid magaalooyin kala duwan oo dalka Sweden ka tirsan.

10/13/2013 7:11 AM EST
Axad, Oktoobar 13, 2013 (HOL) — Dowladda Suudaan ayaa muujisay sida ay uga xun tahay go’aankii madaxda ururka Midowga Afrika ay ka qaateen maxkamadda dambiyada dagaalka ee ICC, iyadoo ku tilmaantay inuu yahay go’aan jilicsan.

10/13/2013 3:31 AM EST
Axad, Oktoobar 13, 2013 (HOL) — Wasiirka ganacsiga iyo warshadaha dowladda Somalia, Maxamuud Xasan Axmed ayaa sheegay in wasaaraddu ay sameysay guddi baaritaanno ku sameynaya raashinka iyo dawooyinka dalka kasoo gelinayo si ganacsiga dalka la keenayo uu u noqdo mid tayo ahaan aad u wanaagsan.

10/13/2013 3:06 AM EST
Axad, Oktoobar 13, 2013 (HOL) — Kooxo bastoolado ku hubeysan ayaa xalay ku dilay degmada Yaaqshiid ee magaalada Muqdisho saddex wiil oo dhallinyaro ah, kuwaasoo lagu dhex-toogtay dawaar ay ku lahaayeen xaafadda Carafaat.

10/13/2013 2:45 AM EST
Axad, Oktoobar 13, 2013 (HOL) — Kulan looga hadlayay ammaanka dalka ayaa xalay lagu qabtay Muqdisho, kaasoo ay ka qaybgaleen ra’iisul wasaare Saacid, saraakiisha ciidamada ammaanka iyo taliyeyaal.