4/16/2021
Today from Hiiraan Online:  _
Wararka Maanta- Axad, Oct 13, 2013
Wasiirka Warfaafinta Somalia oo Baarlamaanka uga War-bixiyay Heshiis ay Xukuumadu la gashay Shirkadda Maamusha Garoonka



Axad, Oktoobar 13, 2013 (HOL) — Wasiirka warfaafinta, isgaarsiinta iyo gaadiidka xukuumadda Soomaaliya, C/llaahi Ciilmooge Xirsi ayaa maanta hortagay xildhibaannada baarlamaanka Soomaaliya isagoo uga warbixiyay heshiiskii ay xukuumaddu la gashay shirkadda FAVOR LLC oo dhawaan lagu wareejiyay maamulka garoonka diyaaradaha ee Muqdisho.

Mudane Ciilmooge ayaa xildhibaannada sharraxaad ka siiyay heshiiskaas iyo qodobbada uu ku fadhiyo, isagoo sheegay in shirkaddan ay garoonka Aadan Cadde ku sameynayso dib u habeyn casri ah muddo sideed bilood gudahood ah.

“Wasaaraddu waxay awood u leedahay inay ka shaqeyso horumarinta ilaha dhaqalaaha dalka oo uu garoonku ka mid yahay, waxaana shirkadda FAVORI LLC kula heshiinay inay muddo kooban ku horumariso garoonka diyaaradaha ee Muqdisho, innagoo ku dabo-galayna howlaha ay qabanayso,” ayuu ku yiri hadal uu wasiirku ka jeediyay baarlamaanka.

Sidoo kale, wasiirka ayaa sheegay in ujeeddada ugu muhiisan ee heshiiskan uu yahay sidii ay shirkaddan ballaarin ugu sameyn lahayd waddooyinka ay soo cago-dhigtaan diyaaradaha, cusboonaysiinta dhismaha garoonka, dib u dhiska qaybaha garoonka ee waxyeelladu gaartay, iftiiminta iridaha laga soo galo garoonka, dhismaha goobaha ganacsiga dowladda leedahay oo laga hir-gelin doono kasoo horjeedka garoonka diyaaradaha.

“Dhaqaalaha garoonka kasoo xarooda waxaa saddex meelood meel loo dhigi doonaa garaoonka, si loogu maareeyo howlaha garoonka, waxaana heshiiska uu dhigayaa in shirkaddan ay 45% dhaqalaaha garoonka ay si toos ah ugu soo wareejiso dowladda, halka shirkaddii hore ay 35% soo wareejin jirtay,” ayuu wasiirku hadalkiisa ku daray.

Wasiirka ayaa xildhibaanada u soo bandhigay naqshadda cusub ee garoonka lagu horumarinayo, iyadoo naqshaddu ay ahayd mid muujinaysa in garoonka uu yeelanayo muuqaal ka casrisan sida uu hadda u dhisan yahay.

“Haddii ay kasoo bixi waydo shirkadda FAVORI heshiiska ay lala galay 90-maalmood gudahood, xukuumaddu waxay awood u leedahay inay digniin siiso ayna u sheegto inay qolo kale garoonka ku wareejin doonto,” ayuu ku daray wasiirku hadalkiisa.

Xildhibaannada baarlamaanka ayaa soo dhaweeyay hadalka wasiirka iyagoo mar kale uu wasiirku hortegi doono xildhibaannada baarlamaanka inta aysan dhammaan bishan, si uu heshiiskan sharraxaad kale uga bixiyo.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
10/13/2013 2:19 PM EST
Axad, Oktoobar 13, 2013 (HOL) — Madaxweynaha Somalia, Xasan Sheekh Maxamuud oo maanta dib ugu soo laabtay Muqdisho kaddib shir uu kaga soo qaybgalay magaalada Addis Ababa ee dalka Itoobiya ayaa soo dhaweeyay go’aanka ay madaxda Afrika ku gaareen in la kordhiyo ciidamada AMISOM.

10/13/2013 1:56 PM EST
Axad, Oktoobar 13, 2013 (HOL) — Iskahorimaad u dhexeeyay ciidammada ka tirsan kuwa dowladda Soomaaliya iyo kooxo hubeysan ayaa galabta ka duleedka magaalada Muqdisho, gaar ahaan deegaanka Siinka dhee kaddib markii uu ciidamada iyo kooxaha hubeysan soo dhexgalay muran.

10/13/2013 1:34 PM EST
Axad, Oktoobar 13, 2013 (HOL) — Maxkamadda gobolka Sool ayaa xukunno kala duwan ku ridday maanta dad la sheegay inay ahaayeen kuwo dilal iyo dhaawacyo geystay, kuwaas oo ay ku jireen kuwii dilay weriye Axmed Saakin oo 23-kii Oktobar ee sannadkii hore lagu dilay magaalada Laascaanood.

10/13/2013 10:42 AM EST
Sheekh Maxamed Yaasiin oo ah maalqabeen Soomaaliyeed ayaa shaaciyay inuu isu soo taagayo tartanka doorashada madaxtinnimo ee la filayo in bisha Janaury ay ka dhacdo magaalada Garoowe ee xarunta u ah Puntland.

10/13/2013 9:14 AM EST
Axad, Oktoobar 13, 2013 (HOL) — Haweenka Puntland ayaa walaac ka muujiyay ka qayb galka xubnaha ka mid noqonaya baarlamaanka cusub ee Puntlad, iyagoo sheegay in shacabka Puntland ay weli ku dhagan yihiin dhaqanka ah in haweenka aysan ka mid noqon hay’adaha xukuumadda.

10/13/2013 8:51 AM EST
Axad, Oktoobar 13, 2013 (HOL) — Hay’adaha ammaanka Kenya iyo kuwa reer galbeedka ayaa walaac xooggan ka muujinaya in Al-shabaab ay mar kale weerarro argagaxiso ka geysato gudaha dalka Kenya, sida uu qoray maanta Wargeyska Daily Nation ee kasoo baxa Kenya.

10/13/2013 8:17 AM EST
Axad, Oktoobar 13, 2013 (HOL) — Ra’iisul wasaaraha Somalia, Cabdi Faarax Shirdoon (Saacid) ayaa war-saxaafadeed uu maanta soo saaray ku sheegay in xukuumaddu ay xaqiijinayso in ammaanka Muqdisho uu yahay mid la isku halleyn karo oo wanaagsan.

10/13/2013 7:32 AM EST
Axad, October 13, 2013(HOL)—Xaflad si weyn loo soo agaasimay oo lagu soo dhaweynayay siyaasiga Maxamed Cumar Waayeel oo booqasho ku jooga dalka Sweden ayaa xalay lagu qabtay Magaalada Katrineholm ee dalka Sweden, iyadoo xafladdana ay ka soo qeybgalay dad badan oo ka kala yimid magaalooyin kala duwan oo dalka Sweden ka tirsan.

10/13/2013 7:11 AM EST
Axad, Oktoobar 13, 2013 (HOL) — Dowladda Suudaan ayaa muujisay sida ay uga xun tahay go’aankii madaxda ururka Midowga Afrika ay ka qaateen maxkamadda dambiyada dagaalka ee ICC, iyadoo ku tilmaantay inuu yahay go’aan jilicsan.

10/13/2013 3:31 AM EST
Axad, Oktoobar 13, 2013 (HOL) — Wasiirka ganacsiga iyo warshadaha dowladda Somalia, Maxamuud Xasan Axmed ayaa sheegay in wasaaraddu ay sameysay guddi baaritaanno ku sameynaya raashinka iyo dawooyinka dalka kasoo gelinayo si ganacsiga dalka la keenayo uu u noqdo mid tayo ahaan aad u wanaagsan.

10/13/2013 3:06 AM EST
Axad, Oktoobar 13, 2013 (HOL) — Kooxo bastoolado ku hubeysan ayaa xalay ku dilay degmada Yaaqshiid ee magaalada Muqdisho saddex wiil oo dhallinyaro ah, kuwaasoo lagu dhex-toogtay dawaar ay ku lahaayeen xaafadda Carafaat.

10/13/2013 2:45 AM EST
Axad, Oktoobar 13, 2013 (HOL) — Kulan looga hadlayay ammaanka dalka ayaa xalay lagu qabtay Muqdisho, kaasoo ay ka qaybgaleen ra’iisul wasaare Saacid, saraakiisha ciidamada ammaanka iyo taliyeyaal.