4/16/2021
Today from Hiiraan Online:  _
Wararka Maanta- Jimco, Oct 11, 2013
Markab Ganacsi oo badbaadiyay Tahriibayaal Soomaali u badan oo doomihii waday ay dul-sabbeynayeen badda Mediterranean-ka


Jimco, Oktoobar 11, 2013 (HOL) — Markab ganacsi ayaa badbaadiyay dad tahriibayaal ah oo u badan Soomaali, kuwaasoo la socday laba doomood oo saddexdii maalmood ee lasoo dhaafay ay doomihii siday dul sabbeynayeen biyaha u dhexeeya Talyaaniga iyo Liibiya.

Ciidamada badda Talyaaniga ayaa waxay sheegay Khamiistii shalay ahayd in tahriibayaashu ay u soo direen farriin ay ku dalbanayaan in la badbaadiyo, balse aysan awood u lahayn ciidamadooda inay u tallaabaan dhinaca biyaha Liibiya oo ay doomuhu ku jireen.

Maanta ayaa markabkan ganacsi wuxuu soo badbaadiyay dhammaan dadkii tahriibayaasha ahaa ee la socday doomahan, isagoo u qaaday dhinaca dalka Talyaaniga, halkaasoo ahayd meeshii ay ku socdeen.

Doomahan ayaa la sheegay inay mid ka mid ah la socdeen 109 qof halka ay midda kalena la socdeen 101 qof, kuwaasoo ay ku jireen haween iyo caruur aad u da’yar, waxaana markabka ganacsi uu ku wareejinayaa ciidamada badda Talyaaniga.

Tahriibayaashan ayaa dhammaadkood ka badbaaday musiibo ku qabsata badda u dhexeysa Talyaaniga iyo Liibiya oo toddobaadkii lasoo dhaafay ay ku dhinteen 300 qof oo tahriibayaal ah, kuwaasoo u badnaa Eriteriyaan.

Muhaajiriintan la badbaadiyay ayaa waxay isugu jireen Soomaali iyo Eriteriyaan, waxayna saddex maalmood ka hor kasoo ambabaxeen xeebaha dalka Talyaaniga, iyagoo tan iyo xilligaas ku jiray biyaha u dhexeeya labada dal.

Haween qaarkood ay uur leeyihiin iyo caruur aad u da’yar ayaa dadkan laga badbaadiyay biyaha u dhexeeya Talyaaniga iyo Liibiya ku jiray, iyadoo tani ay sii kicinayso walaaca ay dunidu ka qabto qulqulka qoxootiga Afrikaanka ah ee ku socda Yurub.

Dalka Talyaaniga ayaa waxaa sannad walba gaara kumannaan kun oo qof oo qoxooti ah, kuwaasoo u badan Afrikaan, iyadoo bilihii ugu dambeeyay ay ku soo kordhayeen tahriibayaasha kuwo u dhashay dalalka Masar iyo Suuriya oo ay xiisado iyo dagaallo ka jiraan.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
10/11/2013 2:01 PM EST
Jimco, Oktoobar 11, 2013 (HOL) — Madaxweynaha Somalia, Xasan Sheekh Maxamuud iyo wafdi uu hoggaaminayo oo ay ka mid ahaayeen wasiirrada arrimaha dibadda iyo difaaca ayaa u ambabaxay maanta magaalada Addis Ababa, iyadoo madaxweynuhu uu sheegay intii uusan dhoofin in la xoojiyo dagaallada lagula jiro Al-shabaab.

10/11/2013 1:57 PM EST
Jimco, Oktoobar 11, 2013 (HOL) — Guddoomiyaha gobolka Bay, Cabdi Aadan Hoosow ayaa maanta dib guu laabtay Muqdihso isgaoo ka warbixiyay safarro uu kusoo maray dalalka caalamka qaarkood, isagoo ka mid ahaa xubnihii ka qaybgalay shirkii Brussels.

10/11/2013 10:22 AM EST
Jimco, October 11, 2013 (HOL) - Taliyaha ciidamada booliska Soomaaliya Gen. C/xakiim Daahir Siciid (Saacid) ayaa dhagax dhigay xarunta kulleejka gabdhaha agoonta booliska Soomaaliyeed isagoo sidoo kalana kormeeray xarunta oo ay hadda ka socoto dhib u dhis balaaran.

10/11/2013 9:01 AM EST
Jimco, Oktoobar 11, 2013 (HOL) — Wasiirka warfaafinta Somalia, Cabdullaahi Ciilmooge Xirsi ayaa maanta sheegay in sababihii shirkadda SKA & Logistic ee maamuli jirtay garoonka diyaaradaha Muqdisho shaqada looga joojiyay ay tahay waxqabad la’aan, isagoo xusay inay muddo badan ka fikirayeen sidii ay u heli lahaayeen shirkad bedesha.

10/11/2013 9:01 AM EST
Jimco, Oktoobar 11, 2013 (HOL) — Danjiraha Somalia u fadhiya dalka Kenya, Maxamed Cali Ameerika ayaa ka hadlay xujey Soomaaliyeed oo lagu qabtay garoonka diyaaradaha Nairobi ee Jommo Kenyatta, kuwaasoo haatan ku xiran magaalada Nairobi.

10/11/2013 8:24 AM EST
Jimco, Oktoobar 11, 2013 (HOL) — Kaddib shir jaraa'id oo guddoomiyaha maamulka gobolka Hiiraan, Cabdi Faarax Laqanyo uu maanta ku qabtay magaalada Baladweyne ayuu ku sheegay inuu kasoo horjeedo kulamo shirar maalmihii ugu danbeeyayba ka socday magaalada Muqdisho oo sida uu sheegay la doonayo in lagu dhiso maamul lagu magacaabo Gal-Hiiraan.

10/11/2013 3:10 AM EST
Jimco, Oktoobar 11, 2013 (HOL) — Madaxweynaha Somaliland, Axmed Maxamed Maxamuud (Siilaanyo) oo dalka dib ugu soo noqday, ayaa sheegay inay Turkiga u sharaxeen inay Somaliland iyo Soomaaliya laba dal kala tahay, isla markaana loo baahan yahay inay laba dal ula kala dhaqmaan.

10/11/2013 2:52 AM EST
Jimco, Oktoobar 11, 2013 (HOL) — Doomo ay saaran yihiin in ka badan 200 oo ruux oo tahriibayaal ah ayaa ku dhawaaday xeebaha Talyaaniga, sida ay sheegeen ciidmada badda Talyaaniga. iyadoo la sheegayo in doomahan oo labada ay weli ku jiraan biyaha dalka Liibiya.

10/11/2013 2:51 AM EST
Jimco, Oktoobar 11, 2013 (HOL) — Wasiirka Boosaha iyo Isgaadhsiinta Somaliland, Maxamed Jaamac Abgaal, ayaa markii ugu horeysay sheegay in inta aanu sanadkani dhamaanuu dalka ka hirgalin doono Boos ay yeelato Somaliland.

10/11/2013 2:09 AM EST
Jimco, Oktoobar 11, 2013 (HOL) — Xarakada Al-shabaab ayaa ku goodisay inay weerarro ka geysan doono dalalka Uganda iyo Kenya oo ay ciidammo kaga sugan yihiin Soomaaliya.

10/11/2013 2:07 AM EST
Jimco, Oktoobar 11, 2013 (HOL) — Qaraxyo ayaa xalay siyaabo kala duwan uga dhacay qaar ka mid ah degmooyinka magaalada Muqdisho, iyadoo qof rayid ah lagu dilay degmada Marko ee gobolka Shabeellada hoose.

10/11/2013 2:06 AM EST
Jimco, Oktoobar 11, 2013 (HOL) — Ra’iisul wasaaraha Somalia, Cabdi Faarax Shirdoon (Saacid) ayaa hay’adaha ammaanka ee dowladda Somalia ugu baaqay inay adkeeyaan ammaanka deegaannada ay dowladdu gacanta ku hayso.