4/16/2021
Today from Hiiraan Online:  _
Wararka Maanta- Jimco, Oct 11, 2013
MADAXWEYNAHA SOMALILAND: “Waxaan ku Qancinay Turkiga in innaga iyo Soomaaliya aanu nahay laba dal oo Walaalo ah”



Jimco, Oktoobar 11, 2013 (HOL) — Madaxweynaha Somaliland, Axmed Maxamed Maxamuud (Siilaanyo) oo dalka dib ugu soo noqday, ayaa sheegay inay Turkiga u sharaxeen inay Somaliland iyo Soomaaliya laba dal kala tahay, isla markaana loo baahan yahay inay laba dal ula kala dhaqmaan.

Madaxweyne Axmed Siilaanyo oo muddo toban maalmood ku maqnaa dalka Turkiga,ayaa sheegay inuu la kulmay Ra’isal wasaaraha iyo maalqabeenadda dalkaasi,isla markaana ay wax badan ka soo faa’iideen booqashadaasi.

“Dadkii aanu kula kulanay waxa ugu mudnaa Raysal wasaaraha Turkiga, ku xigeenkiisa iyo Wasiirradiisa. Waxaynu nahay labada dal oo taariikhi ka dhaxayso oo arrimo badan wada qabsan kara.”ayuu yidhi madaxweyne Siillaanyo oo shalay galab ku soo guryo noqday magaaladda Hargeysa, waxaanu intaas ku daray  “Waxaanu ku qancinay Turkiga In Innaga  iyo Soomaaliya aanu nahay laba dal oo walaalo ah, hase yeeshee madax-banaanidayada iyo gooni isu taagayo aanu ahayn wax aanu cid la wadaagi karno ama cid ka tallo gelin karno ee ay tahay madax-banaani buuxda”

Madaxweyne Siilaanyo waxa kale oo uu sheegay inuu Turkiga ka wada hadleen sidii laba xafiis looga kala furi lahaa Turkiga iyo Somaliland, isagoo arrintaasi ka hadlaya waxa uu yidhi “Waxa kale oo aanu ka wada hadlay inaanu Hargeysa iyo Turkiga ay labada dal ka kala furtaan laba xafiis oo ka shaqeeya dannaha labada dal”.

Weftiga madaxweynaha ayaa labaddii toddobaad ee u dambeeyey safar shaqo ku maqnaa dalka Turkiga, waxaanu halkaasi kula kulmay madax ka tirsan dalkaasi iyo ganacsatadda dalkaasi, waxaanu u mahadnaqay soo dhoweyntii loo sameeyey.

Madaxweynaha waxa madaarka Hargeysa ku soo dhoweeyey madaxweyne ku xigeenka Md;Cabdiraxmaan Saylici, shirgudoonka labadda gole baarlamaan iyo dadweyne kale.

Si kastaba ha ahaatee, Turkiga ayaa wadda sidii labadda dhinac ee Somaliland iyo Soomaaliya iskugu soodhowaan lahaayeen, maadaama oo dalkeedu marti galiyey wada hadalka labadda dhinac u socda, waxaana bisha dambe la filayaa inuu bilaabmo wada hadalkii u dhexeeyey Somaliland iyo Soomaaliya kaas oo lagaga hadli doono labadda mawqif ee labadda dhinac kala taagan yihiin oo aad u kala durugsan.

Wada-hadaladii hore ayaa lagaga hadlay sidii labada dhinac xidhiidh u wada yeelan lahaayeen, wax badana iskaga kaashan lahaayeen, haseyeeshee looma gudbin labada mawqif ee ay kala taagan yihiin, maadaama oo Somaliland aaminsantahay inay dal gaar ah tahay, halka Soomaaliyana aaminsantahay inay qayb Soomaaliya ka mid ah tahay Somaliland, kuwaas oo kala taagan aba daraf oo kala durugsan.

Wasiirka Arrimaha Dibadda Somaliland Maxamed Biixi Yoonis ayaa hore us heegay in wareegga dambe si toos ah loo guddo gali doonno arrimaha waaweyn ee la isku hayo, isla markaana qolo waliba soo bandhigi doonto aragtideedda ku aadan arrimahaasi.






Barkhad-Ladiif  M. Cumar, Hiiraan Online 
[email protected]  
Hargeysa, Somaliland












Click here
10/11/2013 2:01 PM EST
Jimco, Oktoobar 11, 2013 (HOL) — Madaxweynaha Somalia, Xasan Sheekh Maxamuud iyo wafdi uu hoggaaminayo oo ay ka mid ahaayeen wasiirrada arrimaha dibadda iyo difaaca ayaa u ambabaxay maanta magaalada Addis Ababa, iyadoo madaxweynuhu uu sheegay intii uusan dhoofin in la xoojiyo dagaallada lagula jiro Al-shabaab.

10/11/2013 1:57 PM EST
Jimco, Oktoobar 11, 2013 (HOL) — Guddoomiyaha gobolka Bay, Cabdi Aadan Hoosow ayaa maanta dib guu laabtay Muqdihso isgaoo ka warbixiyay safarro uu kusoo maray dalalka caalamka qaarkood, isagoo ka mid ahaa xubnihii ka qaybgalay shirkii Brussels.

10/11/2013 10:22 AM EST
Jimco, October 11, 2013 (HOL) - Taliyaha ciidamada booliska Soomaaliya Gen. C/xakiim Daahir Siciid (Saacid) ayaa dhagax dhigay xarunta kulleejka gabdhaha agoonta booliska Soomaaliyeed isagoo sidoo kalana kormeeray xarunta oo ay hadda ka socoto dhib u dhis balaaran.

10/11/2013 9:29 AM EST
Jimco, Oktoobar 11, 2013 (HOL) — Markab ganacsi ayaa badbaadiyay dad tahriibayaal ah oo u badan Soomaali, kuwaasoo la socday laba doomood oo saddexdii maalmood ee lasoo dhaafay ay doomihii siday dul sabbeynayeen biyaha u dhexeeya Talyaaniga iyo Liibiya.

10/11/2013 9:01 AM EST
Jimco, Oktoobar 11, 2013 (HOL) — Wasiirka warfaafinta Somalia, Cabdullaahi Ciilmooge Xirsi ayaa maanta sheegay in sababihii shirkadda SKA & Logistic ee maamuli jirtay garoonka diyaaradaha Muqdisho shaqada looga joojiyay ay tahay waxqabad la’aan, isagoo xusay inay muddo badan ka fikirayeen sidii ay u heli lahaayeen shirkad bedesha.

10/11/2013 9:01 AM EST
Jimco, Oktoobar 11, 2013 (HOL) — Danjiraha Somalia u fadhiya dalka Kenya, Maxamed Cali Ameerika ayaa ka hadlay xujey Soomaaliyeed oo lagu qabtay garoonka diyaaradaha Nairobi ee Jommo Kenyatta, kuwaasoo haatan ku xiran magaalada Nairobi.

10/11/2013 8:24 AM EST
Jimco, Oktoobar 11, 2013 (HOL) — Kaddib shir jaraa'id oo guddoomiyaha maamulka gobolka Hiiraan, Cabdi Faarax Laqanyo uu maanta ku qabtay magaalada Baladweyne ayuu ku sheegay inuu kasoo horjeedo kulamo shirar maalmihii ugu danbeeyayba ka socday magaalada Muqdisho oo sida uu sheegay la doonayo in lagu dhiso maamul lagu magacaabo Gal-Hiiraan.

10/11/2013 2:52 AM EST
Jimco, Oktoobar 11, 2013 (HOL) — Doomo ay saaran yihiin in ka badan 200 oo ruux oo tahriibayaal ah ayaa ku dhawaaday xeebaha Talyaaniga, sida ay sheegeen ciidmada badda Talyaaniga. iyadoo la sheegayo in doomahan oo labada ay weli ku jiraan biyaha dalka Liibiya.

10/11/2013 2:51 AM EST
Jimco, Oktoobar 11, 2013 (HOL) — Wasiirka Boosaha iyo Isgaadhsiinta Somaliland, Maxamed Jaamac Abgaal, ayaa markii ugu horeysay sheegay in inta aanu sanadkani dhamaanuu dalka ka hirgalin doono Boos ay yeelato Somaliland.

10/11/2013 2:09 AM EST
Jimco, Oktoobar 11, 2013 (HOL) — Xarakada Al-shabaab ayaa ku goodisay inay weerarro ka geysan doono dalalka Uganda iyo Kenya oo ay ciidammo kaga sugan yihiin Soomaaliya.

10/11/2013 2:07 AM EST
Jimco, Oktoobar 11, 2013 (HOL) — Qaraxyo ayaa xalay siyaabo kala duwan uga dhacay qaar ka mid ah degmooyinka magaalada Muqdisho, iyadoo qof rayid ah lagu dilay degmada Marko ee gobolka Shabeellada hoose.

10/11/2013 2:06 AM EST
Jimco, Oktoobar 11, 2013 (HOL) — Ra’iisul wasaaraha Somalia, Cabdi Faarax Shirdoon (Saacid) ayaa hay’adaha ammaanka ee dowladda Somalia ugu baaqay inay adkeeyaan ammaanka deegaannada ay dowladdu gacanta ku hayso.