4/13/2021
Today from Hiiraan Online:  _
Wararka Maanta- Jimco, Oct 11, 2013
Xarakada Al-shabaab oo ku Hanjabtay inay Weerarayso Dalalka Uganda iyo Kenya oo ay ciidammo ka joogaan Soomaaliya


Jimco, Oktoobar 11, 2013 (HOL) — Xarakada Al-shabaab ayaa ku goodisay inay weerarro ka geysan doono dalalka Uganda iyo Kenya oo ay ciidammo kaga sugan yihiin Soomaaliya.

Madaxa Al-shabaab ee Jubbooyinka, Sheekh C/raxmaan Xudeyfa oo hadal siiyay qaar ka mid ah warbaahinta taageerta Al-shabaab ayaa sheegay inay qorsheynayaan inay qaraxyo iyo weerarro ka geystaan dalalka Uganda iyo Kenya.

“Haddii ay wax walba noo adeegsadeen innaguna waxaan u adeegsanaynaa wixii aan awoodno,” ayuu ku yiri hadalkiisa isagoo sheegay in ciidamada ka socda dalalka ay dhibaatooyin ku hayaan shacabka Soomaaliyeed.

Sarkaalkan ayaa ugu baaqay shacabka Soomaaliyeed inay ka qaybqaataan dagaallada ay ku jiraan, isagoo xusay in dhibaatada looga bixi karo Kitaabka Alle oo si wanaagsan loo qabsado laguna dhaqmo.

“Waxaan shacabka Soomaaliyeed ugu baaqayaa inay Kitaabka Alle gacanta ku qabsadaan oo ay fahmaan, waxaana looga baahan yahay inay la diriraan kuwa doonaya inaan lagu dhaqmin,” ayuu hadalkiisa raaciyay.

Sidoo kale, Sheekh Xudeyfa wuxuu sheegay in xoogag ka tirsan ururkooda ay ku sugan yihiin dalalka ay doonayaan inay qaraxyada ka geystaan, isagoo xusay inay yihiin kuwo noloshooda ka doortay inay difaacaan Kitaabka Alle.

“Mujaahidiintu waxay go’aansadeen inay ka aargutaan kuwa dhibaatada ku haya dadkooda iyo dalkooda, waxaana noo qorsheysan inaan xilliyada soo socda weerarno labadan dal,” ayuu mar kale yiri sarkaalkan.

Hadalkan ayaa wuxuu kusoo beegmayaa iyadoo Al-shabaab ay dhamaadkii bishii hore weerar maalmo qaatay ku qaaday dhisme ganacsi oo ku yaalla bartamaha magaalada Nairobi ee xarunta dalka Kenya, kaasoo ay naftooda ku waayeen 67-qof oo Kenyan iyo ajnabi isugu jiray.

Dalka Uganda oo ay ciidamada ugu badan ka joogaan Soomaaliy ayaa horay u sheegay inay xoojiyeen ammaanka dalkooda si ay uga hortagaan inay ka geysto Al-shabaab weerarro la mid ah kuwii ay dalkaas ka geystay sannadkii 2010, kuwaasoo ay ku dhinteen 76-qof oo ciyaar daawanayay.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
10/11/2013 2:01 PM EST
Jimco, Oktoobar 11, 2013 (HOL) — Madaxweynaha Somalia, Xasan Sheekh Maxamuud iyo wafdi uu hoggaaminayo oo ay ka mid ahaayeen wasiirrada arrimaha dibadda iyo difaaca ayaa u ambabaxay maanta magaalada Addis Ababa, iyadoo madaxweynuhu uu sheegay intii uusan dhoofin in la xoojiyo dagaallada lagula jiro Al-shabaab.

10/11/2013 1:57 PM EST
Jimco, Oktoobar 11, 2013 (HOL) — Guddoomiyaha gobolka Bay, Cabdi Aadan Hoosow ayaa maanta dib guu laabtay Muqdihso isgaoo ka warbixiyay safarro uu kusoo maray dalalka caalamka qaarkood, isagoo ka mid ahaa xubnihii ka qaybgalay shirkii Brussels.

10/11/2013 10:22 AM EST
Jimco, October 11, 2013 (HOL) - Taliyaha ciidamada booliska Soomaaliya Gen. C/xakiim Daahir Siciid (Saacid) ayaa dhagax dhigay xarunta kulleejka gabdhaha agoonta booliska Soomaaliyeed isagoo sidoo kalana kormeeray xarunta oo ay hadda ka socoto dhib u dhis balaaran.

10/11/2013 9:29 AM EST
Jimco, Oktoobar 11, 2013 (HOL) — Markab ganacsi ayaa badbaadiyay dad tahriibayaal ah oo u badan Soomaali, kuwaasoo la socday laba doomood oo saddexdii maalmood ee lasoo dhaafay ay doomihii siday dul sabbeynayeen biyaha u dhexeeya Talyaaniga iyo Liibiya.

10/11/2013 9:01 AM EST
Jimco, Oktoobar 11, 2013 (HOL) — Wasiirka warfaafinta Somalia, Cabdullaahi Ciilmooge Xirsi ayaa maanta sheegay in sababihii shirkadda SKA & Logistic ee maamuli jirtay garoonka diyaaradaha Muqdisho shaqada looga joojiyay ay tahay waxqabad la’aan, isagoo xusay inay muddo badan ka fikirayeen sidii ay u heli lahaayeen shirkad bedesha.

10/11/2013 9:01 AM EST
Jimco, Oktoobar 11, 2013 (HOL) — Danjiraha Somalia u fadhiya dalka Kenya, Maxamed Cali Ameerika ayaa ka hadlay xujey Soomaaliyeed oo lagu qabtay garoonka diyaaradaha Nairobi ee Jommo Kenyatta, kuwaasoo haatan ku xiran magaalada Nairobi.

10/11/2013 8:24 AM EST
Jimco, Oktoobar 11, 2013 (HOL) — Kaddib shir jaraa'id oo guddoomiyaha maamulka gobolka Hiiraan, Cabdi Faarax Laqanyo uu maanta ku qabtay magaalada Baladweyne ayuu ku sheegay inuu kasoo horjeedo kulamo shirar maalmihii ugu danbeeyayba ka socday magaalada Muqdisho oo sida uu sheegay la doonayo in lagu dhiso maamul lagu magacaabo Gal-Hiiraan.

10/11/2013 3:10 AM EST
Jimco, Oktoobar 11, 2013 (HOL) — Madaxweynaha Somaliland, Axmed Maxamed Maxamuud (Siilaanyo) oo dalka dib ugu soo noqday, ayaa sheegay inay Turkiga u sharaxeen inay Somaliland iyo Soomaaliya laba dal kala tahay, isla markaana loo baahan yahay inay laba dal ula kala dhaqmaan.

10/11/2013 2:52 AM EST
Jimco, Oktoobar 11, 2013 (HOL) — Doomo ay saaran yihiin in ka badan 200 oo ruux oo tahriibayaal ah ayaa ku dhawaaday xeebaha Talyaaniga, sida ay sheegeen ciidmada badda Talyaaniga. iyadoo la sheegayo in doomahan oo labada ay weli ku jiraan biyaha dalka Liibiya.

10/11/2013 2:51 AM EST
Jimco, Oktoobar 11, 2013 (HOL) — Wasiirka Boosaha iyo Isgaadhsiinta Somaliland, Maxamed Jaamac Abgaal, ayaa markii ugu horeysay sheegay in inta aanu sanadkani dhamaanuu dalka ka hirgalin doono Boos ay yeelato Somaliland.

10/11/2013 2:07 AM EST
Jimco, Oktoobar 11, 2013 (HOL) — Qaraxyo ayaa xalay siyaabo kala duwan uga dhacay qaar ka mid ah degmooyinka magaalada Muqdisho, iyadoo qof rayid ah lagu dilay degmada Marko ee gobolka Shabeellada hoose.

10/11/2013 2:06 AM EST
Jimco, Oktoobar 11, 2013 (HOL) — Ra’iisul wasaaraha Somalia, Cabdi Faarax Shirdoon (Saacid) ayaa hay’adaha ammaanka ee dowladda Somalia ugu baaqay inay adkeeyaan ammaanka deegaannada ay dowladdu gacanta ku hayso.