7/10/2020
Today from Hiiraan Online:  _
Wararka Maanta- Jimco, May 24, 2013
Dowlada Kenya oo dib u furtay Diiwaan-gelinta Qoxootiga iyo Dadka kale ee Magan-galyo doonka ah ee dalkeeda galaya


Jimco, May 24, 2013 (HOL) — Xukuumadda Kenya ayaa dib u furtay diiwaan-gelinta dadka magan-galyo doonka ah ee dalkeeda galaya, kuwaas oo ay ku jiraan qoxootiga ka tagaya Soomaaliya, kaddib lix bilood oo aysan jirin wax diiwaan-gelin ah. 

Hay’adda qoxootiga adduunka ee UNHCR ayaa sheegtay in waaxda arrimaha qoxootiga ee dalka Kenya (DRA) ay dib u furtay diiwaan-gelinta qoxootiga iyo dadka kale ee magan-galyo doonka sideedii bishan May.

“Howshan dib u u diiwaan-gelinta qoxootiga waxaa lagu billaabay 4,000 oo qof oo soo gaaray xeryaya Dhadhaab, kuwaasoo sugayay in loo diiwaan-geliyo qoxooti ahaa,” ayaa lagu yiri warbixinta ay soo saartay UNHCR.

Dowladdii hore ee Kenya ayaa bishii November ee sannadkii hore joojisay diiwaan-gelinta qoxootiga iyo dadka kale ee magan-galyo doonka ah, kaddib markii ay ku eedeysay inay qayb ka yihiin falalka ammaan-darro ee ka dhacaya gudaha dalkeeda.

Sidoo kale, xukuumaddii Kenya waxay dadka Soomaalida ah ee dalkaas ku nool iyo qoxootiga Soomaaliyeedba ku amartay inay isaga baxaan dalkeeda iyadoo sheegtay inay mas’uul ka yihiin ammaan-darrada dalkeeda.

Ku simaha madaxa Qoxootiga Kenya, Sora Katelo ayaa sheegay in sababtii ay Kenya u joojisay diiwaangelinta qoxootiga ay tahay nabadgalyo la’aan ka soo korortay xeryaha Qoxootiga iyo magaalooyinka waaweyn ee Kenya.

Lama oga sida ay hay’adaha samafalka iyo kuwa caawiya qoxootiga ay uga howlgeli karaan xeryaha qoxootiga Dhadhaab ee dalka Kenya, iyadoo ay ka dhacayaan halkaas falal isugu jira afduub iyo dilal loo geysto shacaba iyo shaqaalaha samafalka.

Xeryaha ku yaalla deegaanka Dhadhaab ee dalka Kenya ayaa waxay hoy u yihiin kumannaan Qoxooti Soomaaliyeed ah, kuwaasoo ka cararay colaadaha iyo abaaraha is-bar-bar ee ka taagan Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
5/24/2013 4:52 PM EST
Jimco, May 24, 2013 (HOL) — Xildhibaan C/raxmaan Xoosh Jabriil oo ka mid ah wafdi ay xukuumadda Soomaaliya u dirtay magaalada Kismaayo ee gobolka Jubbada Hoose si ay xal uga gaaraan khilaaf ku saabsan maamulka Jubaland ee dhawaan looga dhawaaqay degmadaas ayaa sheegay inay jirto wadashaqeyn la’aan u dhexeysa iyaga iyo ciidamad ka socda Kenya ee qaybta ka ah AMISOM.

5/24/2013 2:03 PM EST
Jimco, May 24, 2013 (HOL) — Xukuumadda Soomaaliya ayaa sheegtay inay diiwaan-gelisay 1,345 ruux oo ajnabi ah oo ku sugan Muqdisho, kuwaasoo la sheegay inay isugu jiraan dublamaasiyiin, shaqaale u shaqeeya NGO-yo iyo ganacsato.

5/24/2013 8:38 AM EST
Jimco, May 24, 2013 (HOL) — Ciidanka booliska magaalada Laascaanood ee gobolka Sool ayaa xabsiga u taxaabay dad haween u badan oo ku sugnaa guri ku yaalla bartamaha magaaladaas.

5/24/2013 7:26 AM EST
Jimco, May 24, 2013 (HOL) — Wasiirrada Arrimaha Dibadda ee IGAD oo kulan ku yeeshay magaalada Addis Ababa ee dalka Itoobiya ayaa waxay ku go'aansadeen in dowladda Somalia ay qabato shir deg-deg ah oo loogu yeerayo dhammaan qaybaha ay quseyso ee ku nool gobollada Jubbooyinka, si shirkaas uu uga soo baxo Road-map lagu dhisayo maamul KMG ah oo laga hirgeliyo Jubbooyinka.

5/24/2013 12:44 AM EST
Jimco, May 24, 2013 (HOL) — Madaxweynayaasha dalalka Bariga Afrika ee ku bahoobay ururka IGAD ayaa maanta kulan ku yeelanaya magaalada Addis Ababa ee xarunta dalka Itoobiya, kaasoo ay kaga hadli doonaan arrinta ka taagan gobollada Jubbooyinka.

5/24/2013 12:11 AM EST
Jimco, May 24, 2013 (HOL) - Ururka u dhaqdhaqaaqa la dagaalan qabyaaladda ee loo yaqaano ATM (Anti-Tribalism Movement) iyo bahda Isboortiga ee magaalada London ayaa abaal-marin guddoonsiiyey shabakadda Hiiraan Online. Iyagoo ku abaal-mariyey heerka ay ka gaareen warbaahinta iyo sida ay u kasbatay kalsoonida shacabka Soomaaliyeed meel kasta oo ay adduunka ka joogaan.