7/10/2020
Today from Hiiraan Online:  _
Wararka Maanta- Khamiis, May 23, 2013
Shan ruux oo siyaabo kala duwan loogu dilay Magaalada Gaarisa iyo Xerada Qoxootiga ee IFO ee Dalka Kenya


Khamiis, May 23, 2013 (HOL) — Shan qof ayaa siyaabo kala duwan loogu dilay xalay degmada Gaarisa ee xarunta gobolka Waqooyi-bari Kenya iyo xerada IFO oo ka mid ah xeryaha dhadhaab ee dalka Kenya, iyadoo kooxaha dilalkan geystay ay baxsadeen.

Dilka hore ayaa ka dhacay magaalada Gaarisa xalay fiidkii iyadoo lagu dilay laba qof oo shacab ah, waxaana dilka kaddib ay booliiska Kenya sameeyeen baaritaanno sababay inay gubaan suuq lagu iibiyo jaadka iyo warshad lagu shiido galleyda oo ku taalla isla degmada Gaarisa.

Taliyaha booliiska gobolka Waqooyi-bari ee dalka Kenya, Charlton Murithi ayaa iska fogeeyay in ciidamada booliisku ay ka dambeeyeen gubitaanka suuqa iyo warshadda, isagoo sheegay in taasi ay u arkeen inay tahay mid lagu qalqal-gelinayo howlgallada booliiska, balse uu amar ku bixiyay in howgalladooda ay sii wataan.

“Dabku wuxuu kacay intii howlgalku socday, waxaana u aragnay inuu yahay mid lagu carqaladeynayo howlgalka, booliiskana waxaan amar ku siinnay in ay howshooda wataan,” ayuu yiri Murithi.

Milkiilaha warshadda la gubay oo lagu magacaabo Maxamed Muxumad ayaa u sheegay warbaahinta Kenya in ciidamada Kenya ay warshadiisa gubeen, isagoo xusay in lacago fara badan oo Kenyan Shillin iyo Doollar isugu jira ay ku gubteen warshadda.

“Warshadeyda waxaa gubay booliiska, waxaana ku jiray hanti fara badan oo mood iyo maal leh, waxaan ka xusi karaa lix kun oo doollar iyo 250,000 oo Kenyan shilling ah, sidoo kale waxaa ku gubtay dhammaan buugaagtii ay ku qornaayeen daymaha,” ayuu yiri Muxumad oo sheegay in bishii November ee sannadkii hore ay isla ciidamada Kenya gubeen warshaddiisa.

Dhanka kale, saddex qof oo shacab ah ayaa iyagana lagu dilay xerada IFO oo ka mid ah xeryaha qoxootiga Dhadhaab ee dalka Kenya, iyadoo kooxihii weerarka fuliyay ay baxsadeen.

Saddexda qof ee la dilay ayaa waxaa ku jiray wiil yar, kaasoo aabbihii oo lagu magacaabo, C/llaahi Bedel oo la hadlay BBC-da uu sheegay in wiilkiisa uu soo watay kaddib markii uu xanuun dareemay, ayna toogasho ku dileen kooxo hubeysan oo baxsaday.

C/llaahi Bedel wuxuu intaas ku daray in markii maydka lasoo qaaday la dilay laba qof oo maydka la socday, wuxuuna xusay inuusan garanayn cidda dilka u geystay saddexdan qof oo mid uu wiilkiisa ahaa.

Dilalkan ayaa waxay imaanayaan xilli ay madaxda cusub ee Kenya sheegeen in la adkeynayo ammaanka deegaannada Kenya ee ku dhow soohdinta ay la wadaagaan Soomaaliya.

Maxamed Xaaji Xuseen. Hiiraan Online
[email protected]
Muqdisho, Soomaaliya










Click here
5/23/2013 1:08 PM EST
Khamiis, May 23, 2013 (HOL) — Urur goboleedka IGAD ayaa warbixin ay soo saareen maanta waxay ku sheegeen in dowladda Somalia looga dambeeyo dhismaha maamul goboleedyada dalka iyo hirgelinta habka federaalka ah ee dalka uu ku dhaqmayo, iyadoo la ixtiraamayo dastuurka Soomaaliya.

5/23/2013 12:11 PM EST
Khamiis, May 23, 2013 (HOL) — Xukuumadda Somalia ayaa soo dhaweysay go’aankii uu baarlamaanka Somaaliya uga laabtay mooshinkii xukuumadda laga keenay, kaddib shir ay golaha wasiirradu ku yeesheen maanta xarunta ay ku leeyihiin Muqdisho, kaasoo uu shir-guddoominayay ra’iisul wasaaraha Soomaaliya, Cabdi Faarax Shirdoon (Saacid).

5/23/2013 10:48 AM EST
Kulan ay isugu yimaadeen qaar kamid ah jaaliyadda Soomaaliyeed ee magaalada Nairobi ayaa loogu mahadceliyay xildhibaanadii ka noqday mooshinka ka dhanka ahaa xukuumada Soomaaliya, kaasoo dhicisoobay kadib markii ay ka laabteen tiro badan oo xildhibaano ah, iyadoo ay soo hareen wax ka yar 40 xildhibaan.

5/23/2013 8:11 AM EST
Khamiis, May 23, 2013 (HOL) —Maxkamadda ciidamada qalabka sida ee Puntland ayaa maanta xukun dil ah ku riddey eedaysaneyaal loo soo qabtay dilkii Sheekh C/qaadir Nuur Faarax – oo bishii lasoo dhaafay ee Febaraayo- lagu diley magaalada Garoowe ee xarunta gobolka Nugaal.

5/23/2013 8:07 AM EST
Khamiis, May 23, 2013 (HOL) — Madaxweynaha Soomaaliya oo ka hadlayay munaasabad loogu dabaal-dagayay 50-guuradii kasoo wareegtay markii la aasaasay ururuka Midowga Afirka oo maanta Muqdisho lagu qabtay ayaa sheegay inuu rajeynayo in dhawaan shirka ururka Midowga Afrika lagu qabto magaalada Muqdisho ee xarunta Soomaaliya.

5/23/2013 8:06 AM EST
Khamiis, May 23, 2013 (HOL) — Bannaanbax ay ka qaybagleen boqollaal qof iyo mas’uuliyiinta gobolka Banaadir laguna taageerayay dowladda Somalia iyo mooshinkii ay ka laabteen xubnaha baarlamaanka Soomaaliya ayaa lagu qabtay magaalada Muqdisho ee xarunta Soomaaliya.

5/23/2013 8:04 AM EST
Khamiis, May 23, 2013 (HOL) — Waxaa magaalada Addis Ababa ee dalka Itoobiya ka furmay shir looga hadlayo badbaadada iyo nabadda warbaahinta ku hadasha Afka Soomaaliga si oo ay ka qeybgalayaan saxafiyiin ka kala yimid Soomaaliya, Somaliland iyo Yurub.

5/23/2013 7:14 AM EST
Warbixin oo uu soo bandhigay guddiga runta, cadaalada iyo dib u hesheesiinta Kenya ee (TJRC) ayaa muujinaysa tacadiyadii lixaadka lahaa ee ay la kulmeen Soomaalida ku nool gobolka waqooyi bari ee dalka Kenya, kuwaasoo loo gaystay xadgudubyo ka dhan ah xuquuqda aadanaha xilliyadii gumaysiga iyo maamuladii ka dambeeyay ee ay kala hogaaminayeen madaxweynayaashii Jommo Kenyatta iyo Daniel Arab Moi.

5/23/2013 6:24 AM EST
Khamiis, May 23, 2013 (HOL) — Warar dheeraad ah oo ayaa ka soo baxaya dagaal culus oo deegaanno galbeedka kaga beegan magaalada Baladweyne ee xarunta gobollka Hiiraan ku dhaxmaray xoogagga Al-shabaab iyo dad xoola dhaqato ah, kadib markii sida wararku sheegayaan Al-shabaab weerar ku qaadeen deegaannka Far-libaax ee gobolka Hiiraan.

5/23/2013 5:30 AM EST
Khamiis, May 23, 2013(HOL) :- Gudigii ka koobnaa 16-ka xubnood ee dowladda Soomaaliya u magacoowday arimaha Jubooyinka, mudooyinkii u danbeeyayna ku sugnaa magaalada Kismaayo ayaa ka warbixiyay halka ay u marayaan kulamo maalmihii u danbeeyay ay la lahaayeen waxgaradka iyo odoyaasha kasoo jeeda Jubooyinka.

5/23/2013 2:08 AM EST
Khamiis, May 23, 2013 (HOL) — Dowladda Uganda ayaa waxay waddaa olole ay ku doonayso in dalalka Afrika ay go’aan cad kaga qaataan maxkamadda dambiyada dagaalka caalamiga ah ee ICC, taasoo ay ku eedeeyeen inay bar-tilmaameed ka dhigato madaxda Afrika.

5/23/2013 1:40 AM EST
Khamiis, May 23, 2013 (HOL) — Munaasabad lagu xusayo sannad-guuradii 50-aad ee kasoo wareegtay markii la aasaasay ururka Midowga Afrika ayaa maanta ka dhacay Muqdisho, iyadoo lagu wado in madaxda dowladda ugu sarreysa ay ka qaybgalaan munaasabaddaas.