7/10/2020
Today from Hiiraan Online:  _
Wararka Maanta- Khamiis, May 23, 2013
Bannaanbax lagu taageerayay Mooshinkii ay Xildhibaannada Baarlamaanku ka laabteen oo Muqdisho ka dhacay (SAWIRRO)



Khamiis, May 23, 2013 (HOL) — Bannaanbax ay ka qaybagleen boqollaal qof iyo mas’uuliyiinta gobolka Banaadir laguna taageerayay dowladda Somalia iyo mooshinkii ay ka laabteen xubnaha baarlamaanka Soomaaliya ayaa lagu qabtay magaalada Muqdisho ee xarunta Soomaaliya. 

Dibadbaxyaasha oo ka kala yimid degmooyinka gobolka banaadir ayaa ku dhawaaqayay erayo ay ku taageerayaan dowladda Soomaaliya iyo xubnaha baarlamaanka ee ka laabtay mooshinkii looga horjeeday xukuumadda.

“Waxaan ku faraxsannahay in dibadbaxan uu maanta ka dhaco Muqdisho iyo dowladda Soomaaliya, runtiina waa mid aan wanaagsanayn in xilligan laga keeno xukuumadda mooshin, taasoo dib u dhac ku keeni karto dhibaatadii horay looga soo gudbay,” ayuu yiri guddoomiyaha degmada Xamar-weyne, C/llaahi Sahal Gar-dhuub oo ku hadlayay magaca guddoomiyeyaasha degmooyinka gobolka Banaadir.

Sidoo kale, guddoomiyaha degmada Xamarweyne ayaa sheegay in looga baahan yahay xukuumadda Soomaaliya inay saxdo khaladaadka keenay in mooshin laga keeno, si looga fogaado in mooshin kale laga keeno.

Ku xigeenka guddoomiyaha gobolka Banaadir ee dhinaca nabadgalyada, Warsame Joodax oo isaguna la hadlay dibadbaxayaasha oo isugu soo ururay barxadda Sayidka ayaa sheegay in wax lagu farxo ay tahay in dadka ku nool Muqdisho ay muujiyaan sida ay ugu faraxsan yihiin mooshinkii xukuumadda laga keenay ee laga laabay.

 

“Xilligan looma baahna in mooshin laga keeno xukuumadda, waayo wuxuu wax u dhimayaa horumarka ay xukuumaddu gaartay,” ayuu yiri Joodax oo ku daray hadalkiisa in maamulka gobolku iyo shacabka ay si isku mid ah u soo dhaweynayaan ka laabashada mooshinkaas.

Afhayeenka gobolka Banaadir, Maxamed Yuusuf oo isaguna la hadlay dadkii dibadbaxa dhigayay ayaa sheegay inay waddaniyad muujiyeen shacabka ku nool gobolka Banaadir, isagoo sidoo kalena hamblayo u diray AMISOM iyo ururka Midowga Afrika.

“Ciidamada Midowga Afrika wax weyn ayay ka qabteen dalkeenna, hambalyo ayaan u diraynaa iyaga iyo ururka Midowga Afrika oo sabab u ahaa in dalka ay yimaadaan si ay u taageeraan shacabka iyo dowladda Soomaaliya,” ayuu yiri afhayeenka gobolka oo ugu baaqay shacabka inay qayb ka qaataan dib u soo celinta amniga caasimadda iyo dib u dhiskeeda.

Mas’uuliyiinta ka hadlay dibadbaxa ayaa waxaa ka mid ahayd guddoomiyaha haweenka gobolka Banaadir, Jawaahri Baarqab oo sheegtay in shacabku ay taageersan yihiin waxqabadka xukuumadda, taasna ay tahay midda maanta ay isugu yimaadeen shacabka Muqdisho si ay shucuurtooda u muujiyaan.

Dadweynaha dibadbaxa dhigayay ayaa waxay socod kusoo mareen xaafado ka tirsan Muqdisho, iyagoo ku qaylinayay erayo ay ku taageerayaan dib uga laabshadii mooshinkii ka dhanka ahaa xukuumadda Soomaaliya.

Bannaanbaxan ayaa kusoo beegmaya iyadoo maalin ka hor Muqdisho lagu qabtay dibadbax kale oo lagu taageerayay isla xukuumadda Soomaaliya dadka ku nool Muqdisho shana ay ku dalbanayeen in laga laabto mooshinkii ka dhanka ahaa xukuumadda Soomaaliya.





 

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
5/23/2013 1:08 PM EST
Khamiis, May 23, 2013 (HOL) — Urur goboleedka IGAD ayaa warbixin ay soo saareen maanta waxay ku sheegeen in dowladda Somalia looga dambeeyo dhismaha maamul goboleedyada dalka iyo hirgelinta habka federaalka ah ee dalka uu ku dhaqmayo, iyadoo la ixtiraamayo dastuurka Soomaaliya.

5/23/2013 12:44 PM EST
Khamiis, May 23, 2013 (HOL) — Shan qof ayaa siyaabo kala duwan loogu dilay xalay degmada Gaarisa ee xarunta gobolka Waqooyi-bari Kenya iyo xerada IFO oo ka mid ah xeryaha dhadhaab ee dalka Kenya, iyadoo kooxaha dilalkan geystay ay baxsadeen.

5/23/2013 12:11 PM EST
Khamiis, May 23, 2013 (HOL) — Xukuumadda Somalia ayaa soo dhaweysay go’aankii uu baarlamaanka Somaaliya uga laabtay mooshinkii xukuumadda laga keenay, kaddib shir ay golaha wasiirradu ku yeesheen maanta xarunta ay ku leeyihiin Muqdisho, kaasoo uu shir-guddoominayay ra’iisul wasaaraha Soomaaliya, Cabdi Faarax Shirdoon (Saacid).

5/23/2013 10:48 AM EST
Kulan ay isugu yimaadeen qaar kamid ah jaaliyadda Soomaaliyeed ee magaalada Nairobi ayaa loogu mahadceliyay xildhibaanadii ka noqday mooshinka ka dhanka ahaa xukuumada Soomaaliya, kaasoo dhicisoobay kadib markii ay ka laabteen tiro badan oo xildhibaano ah, iyadoo ay soo hareen wax ka yar 40 xildhibaan.

5/23/2013 8:11 AM EST
Khamiis, May 23, 2013 (HOL) —Maxkamadda ciidamada qalabka sida ee Puntland ayaa maanta xukun dil ah ku riddey eedaysaneyaal loo soo qabtay dilkii Sheekh C/qaadir Nuur Faarax – oo bishii lasoo dhaafay ee Febaraayo- lagu diley magaalada Garoowe ee xarunta gobolka Nugaal.

5/23/2013 8:07 AM EST
Khamiis, May 23, 2013 (HOL) — Madaxweynaha Soomaaliya oo ka hadlayay munaasabad loogu dabaal-dagayay 50-guuradii kasoo wareegtay markii la aasaasay ururuka Midowga Afirka oo maanta Muqdisho lagu qabtay ayaa sheegay inuu rajeynayo in dhawaan shirka ururka Midowga Afrika lagu qabto magaalada Muqdisho ee xarunta Soomaaliya.

5/23/2013 8:04 AM EST
Khamiis, May 23, 2013 (HOL) — Waxaa magaalada Addis Ababa ee dalka Itoobiya ka furmay shir looga hadlayo badbaadada iyo nabadda warbaahinta ku hadasha Afka Soomaaliga si oo ay ka qeybgalayaan saxafiyiin ka kala yimid Soomaaliya, Somaliland iyo Yurub.

5/23/2013 7:14 AM EST
Warbixin oo uu soo bandhigay guddiga runta, cadaalada iyo dib u hesheesiinta Kenya ee (TJRC) ayaa muujinaysa tacadiyadii lixaadka lahaa ee ay la kulmeen Soomaalida ku nool gobolka waqooyi bari ee dalka Kenya, kuwaasoo loo gaystay xadgudubyo ka dhan ah xuquuqda aadanaha xilliyadii gumaysiga iyo maamuladii ka dambeeyay ee ay kala hogaaminayeen madaxweynayaashii Jommo Kenyatta iyo Daniel Arab Moi.

5/23/2013 6:24 AM EST
Khamiis, May 23, 2013 (HOL) — Warar dheeraad ah oo ayaa ka soo baxaya dagaal culus oo deegaanno galbeedka kaga beegan magaalada Baladweyne ee xarunta gobollka Hiiraan ku dhaxmaray xoogagga Al-shabaab iyo dad xoola dhaqato ah, kadib markii sida wararku sheegayaan Al-shabaab weerar ku qaadeen deegaannka Far-libaax ee gobolka Hiiraan.

5/23/2013 5:30 AM EST
Khamiis, May 23, 2013(HOL) :- Gudigii ka koobnaa 16-ka xubnood ee dowladda Soomaaliya u magacoowday arimaha Jubooyinka, mudooyinkii u danbeeyayna ku sugnaa magaalada Kismaayo ayaa ka warbixiyay halka ay u marayaan kulamo maalmihii u danbeeyay ay la lahaayeen waxgaradka iyo odoyaasha kasoo jeeda Jubooyinka.

5/23/2013 2:08 AM EST
Khamiis, May 23, 2013 (HOL) — Dowladda Uganda ayaa waxay waddaa olole ay ku doonayso in dalalka Afrika ay go’aan cad kaga qaataan maxkamadda dambiyada dagaalka caalamiga ah ee ICC, taasoo ay ku eedeeyeen inay bar-tilmaameed ka dhigato madaxda Afrika.

5/23/2013 1:40 AM EST
Khamiis, May 23, 2013 (HOL) — Munaasabad lagu xusayo sannad-guuradii 50-aad ee kasoo wareegtay markii la aasaasay ururka Midowga Afrika ayaa maanta ka dhacay Muqdisho, iyadoo lagu wado in madaxda dowladda ugu sarreysa ay ka qaybgalaan munaasabaddaas.