7/10/2020
Today from Hiiraan Online:  _
Wararka Maanta- Arbaco, May 22, 2013
Isbitaalka Shifo oo ka mid ah Isbitaallada uu Turkigu ka Hirgeliyay Muqdisho oo Kumannaan Ruux lagu Daweeyay



Arbaco, May 22, 2013 (HOL) — Kumannaan Soomaali ah ayaa dawooyin lacag la’aan ah ka helay isbitaalka Shifo oo ka mid ah isbitaallada ay ka hirgelisay Muqdisho hay’adaha bisha cas ee Turkiga iyo hay’adda TIKA oo dhinaca horumarinta dibadda u qaabilsan dowladda Turkiga.

Isbitaalkan ayaa ka daweeyay dadkaas faraha badan dhaawacyo iyo xanuunno kala duwan oo asiibay, waxaana maalin walba ay daweeyaan boqolaal qof oo Soomaali ah. Iyadoo isbitaalkan ay yaallaan 66 sariirood oo bukaannada xalaadoodu daran tahay la seexiyo.

Madaxa mashruucan, Seyda Sever ayaa sheegtay in dhamaan howlahooda ay ku qabtaan si lacag la’aan ah, kuwaasoo ay ku jiraan qalliinno ay qaar ka mid ah bukaannada ku sameeyeen iyadoo aan lacago laga qaadin.

“Inta badan dadka isbitaalkan daweynta u soo doonta waa kuwa ku nool xeryaha barakacayaasha ee Muqdisho ku yaalla,” ayay tiri Sever oo intaas raacisay: “Ma jiro wax dhaqaale ah oo isbitaalkan ka helno uma sameyn in aan dhaqeel ka helo. Ujeeddadeennu waa inaan caawino dadka Soomaalida ah oo keliya.”

Sever waxay sheegtay in dhammaan dhaqaatiirta ka howlgala Isbitaalka Shifa ay yihiin kuwo si mutadawacnimo ah ku shaqeeya, waxayna diyaar u yihiin inay caawiyaan dadka kaalmada caafimaad u baahan.

“Dhaqaatiirtu waxay sameeyaan toddobaadkiiba 50 illaa 60 qalliin, in laga shaqeeyo Soomaaliyana ma ahan mid fudud. Runtii waa mid aad u adag. Weerradii argagaxisada way laba jibaarmeen. Maalin walba waxaan si dhib kusoo markaan inta u dhexeysa guryaha aan deggennahay iyo isbitaalka. Dadka caafimaadka u imaanaya isbitaalkana waan iska baarayaa, waayo waxaan ka baqaynaa weerarro argagaxiso,” ayay Sever hadalkeeda ku dartay.

Ugu dambeyn, sarkaaladdan waxay sheegtay inay xusuustaan in kolonyo ay wateen shaqaale ka tirsan Turkiga oo qarax lagula beegsaday Muqdisho lagu dilay darawal Soomali ah, iyadoo xustay in Soomaalidu ay og yihiin in dadka Turkiga ah ay dalkooda u joogaan inay caawiyaan.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
5/22/2013 9:34 AM EST
Arbaco, May 22, 2013 (HOL) — Bandhig-dhaqameed ay kasoo qayb-galeen in ka badan 50-dowladoood ayaa ka dhacay magaalada qadiimigaa ee Konya oo ku taalla dalka Turkiga. Bandhig dhaqameedkan ayaa loosoo agaasimay si layaab leh, iyadoo ay ka dhex muuqdeen ardayda Soomaaliyeed ee wax ka barta dalka Turkiga Soomaalida dalkaas ku nool.

5/22/2013 9:09 AM EST
Shir hordhac ah oo loogu gogol Xaarayo shirweynaha dib u dhiska Soomaaliya ayaa lagu qabtay magaalada Nairobi ee xarunta dalka Kenya.

5/22/2013 8:09 AM EST
Arbaco, May 22, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa maanta xafiiskiisa ku qaabilay wafti uu hoggaaminayo wakiilka Midowga Afrika ee Soomaaliya, danjire Maxamed Saalax Anaadif iyo saraakiisha sar-sare ee AMISOM.

5/22/2013 7:50 AM EST
Arbaco, May 22, 2013 (HOL) — Xildhibaannada baarlamaanka ayaa dib uga laabtay maanta Mooshin ay ka keeneen xukuumadda Soomaaliya sida uu ka sheegay fadhigii maanta ee baarlamaanka guddoomiyaha baarlamaanka Somaaliya, Prof. Maxamed Sheekh Cismaan (Jawaari).

5/22/2013 7:41 AM EST
Arbaco, May 22, 2013(HOL) :- Wararka ka imaanaya deegaanka Buusaar oo qiyaastii 40 KM dhanka Bari uga beegaanka Degmada Ceelwaaq ee gobolka Gedo ayaa sheegaya in goordhaw qarax lala eegtay gudoomiyaha deegaanka Buusaar Mudane Iftiin Xuseen C/laahi, iyadoona qaraxaasi uu ka badbaaday gudoomiyaha.

5/22/2013 3:31 AM EST
Arbaco, May 22, 2013 (HOL) — Saraakiisha gobolka Oklahoma ee dalka Mareykanka ee ay duufaantii xooganeyd ku dhufatay gelinkii dambe ee isniintii ayaa sheegay in ay rejo wanaagsan ka qabaan in ay dhawaan soo af-jaraan howlaha gurmadka ah ee ay wadeen tan iyo tii ay mashaqadu dhacday, taasi oo ay ku baadi-goobeyaan dadka iyo duunyo wixii ay ku habsadeen dhismeyaashii dumay.

5/22/2013 3:22 AM EST
Arbaco, May 22, 2013 (HOL) — Xildhibaannada baarlamaanka Soomaaliya ayaa lagu wadaa inay maanta ka doodaan mooshin ka dhan ah xukuumadda Soomaaliya kaasoo dhawaan la horgeeyay baarlamaanka, inkastoo xubno ka mid ah kuwii saxiixay ay sheegeen inay ka la laabteen go’aankooda.