7/10/2020
Today from Hiiraan Online:  _
Wararka Maanta- Talaado, May 21, 2013
Bannaanbax lagu Taageerayo Xukuumadda Federaalka Somalia oo Maanta ka dhacay Magaalada Muqdisho (SAWIRRO)



Talaado, May 21, 2013 (HOL) — Bannaanbax lagu taageerayay xukuumadda Soomaaliya laguna dalbanayay in la joojiyo mooshinka ay xildhibaanno ka tirsan baarlamaanka ka gudbiyeen xukuumadda ayaa maanta ka dhacay Magaalada Muqdisho.

Boqolaal qof oo dibadbaxan ka qaybqaadanayay ayaa ku dhawaaqayya erayo ay ku taageerayaan xukuumadda ayna uga soo horjeedeen mooshinka laga gudbiyay, waxaana dibadbaxayaashu ay u badnaayeen haween iyo caruur yaryar.

“Ma doonayno kuwo doonaya inay dalka burburiyaan, xukuumaddu waa mid howlo waaweyn oo muuqda ka qabatay dalka iyo magaalada Muqdisho, waxaan u aragnaa mooshinka kaga keenay mid lagu diiddan yahay horumar ay xukuumaddu sameysay,” ayay yiraahdeen haween dibadbaxa ka qayb-qaadanayay oo la hadlay warbaahinta.

Dibadbaxayaasha ayaa waxay wateen boorar ay ku qoran yihiin erayo ay ka mid yihiin: [Waxaan taageeraynaa kuna qanacsannahay dowladda Somalia] iyo erayo kale oo ay ka mid ahaayeen waa in la joojiyo mooshinka ka dhanka ah xukuumadda.


“Waxaan kasoo horjeednaa kuwa doonaya inay ka horyimaadaan horumarka ay xukuumaddu ku tallaabsatay, waxaana ka codsanaynaa xildhibaannadii mooshinka keenay inay ka laabtaan go’aankooda,” ayay yiraahdeen qaar ka mid ah dibadbaxayaasha oo ku qalinayay waa in xukuumadda la garab istaago si ay howsheeda u gudato.

Lama oga ciddii soo qabanqaabisay dibadbaxan, waxaase dadka goobta ku sugnaa ka muuqday qiiro ay ku muujinayaan sida ay uga soo horjeedaan in carqalad la geliyo howlaha xukuumadda iyo dowladda Soomaaliya oo ay ku sheegeen inay tahay mid wax wanaagsan qabatay muddadii yarayd ee ay jirtay.

Bannaanbaxan ayaa wuxuu kusoo beegmay xilli xildhibaanno ka tirsan golaha baarlamaank Soomaaliya ay mooshin ka dhan ah xukuumadda u gudbiyeen baarlamaanka kaasoo ay saxiixeen 129 xubnood, inkastoo qaar ka mid ah ay sheegeen inay ka laabteen go’aankoodaas.

Ma jiro weli hadal kasoo baxay dhinaca xukuumadda Soomaaliya oo ah sida ay u arago mooshinka laga gudbiyay oo guddoonka baarlamaanka Somalia uu sheegay inuu yahay mid sharci ah oo buuxiyay shuruudihii loo baahnaa oo dhan.




 

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
5/21/2013 3:21 PM EST
Talaado, May 21, 2013 (HOL) — Degmada Buurhakabo ee gobolka Bay yaa maanta loo doortay guddoomiye cusub kaasoo lagu magacaabo, Axmed Maxamed Yuusuf oo loo yaqaano (Axmed Layaab), doorashada ayaa waxaa kasoo goobjoog ka ahaa wafuud ka socatay wasaaradda arrimaha gudaha iyo Amniga Qaranka ee dowladda Soomaaliya iyo madaxda maamulka Bay, waxaa kaloo goob-joog ka ahaa ahaa madxda AMISOM iyo ugaasyada Digil iyo Mirifle.

5/21/2013 12:14 PM EST
Talaado, May 21, 2013 (HOL) — Madaxweynaha Somaliland Mudane Axmed Maxamed Maxamuud (Siilaanyo), ayaa maanta xafiiskiisa ku qaabilay Safiirka midowga Yurub u qaabilsan Soomaaliya Michele Cervone d’Urso.

5/21/2013 12:07 PM EST
Talaado, May 21, 2013 (HOL) — Kulan ay salaadiinta Soomaaliyeed maanta ku yeesheen Muqdisho ayaa lagu furay xarun cusub, iyadoo sidoo kalena ay goluhu taageero u muujiyeen xukuumadda Soomaaliya ee uu hoggaaminayo ra’iisul wasaare Cabdi Faarax Shirdoon (Saacid) oo mooshin laga geeyay baarlamaanka Soomaaliya.

5/21/2013 9:00 AM EST
Xaflad lagu soo bandhigay hidihii iyo dhaqankii soo jireenka ahaa ee Soomaaliyeed ayaa lagu qabtay hotelka Liaco Regecny ee magaalada Nairobi ee dalka Kenya.

5/21/2013 8:07 AM EST
Talaado, May 21, 2013 (HOL) — Afhayeenka ciidamada AMISOM ayaa ka hadlay maanta howlgallo ay booliiska dowladda Soomaaliya iyo kuwa AMISOM ka wadaan Muqdisho, kuwaasoo lagu soo qabqabtay boqollaal qof oo u badan dhallinyaro.

5/21/2013 7:57 AM EST
Talaado, May 21, 2013 (HOL) — Hay’adda shaqada adduunka ee ILO ayaa maanta ka furtay magaalada Muqdihso kallan looga hadlayo horumarinta ganacisga Haweenka Soomaaliyeed, kaasoo dib loogu eegayo horumarada laga sameeyay ganacsiyo yar-yar oo horay loogu furay haween danyar ah oo Soomaaliyeed.

5/21/2013 7:04 AM EST
Talaado, May 21, 2013 (HOL) — Marka laga soo tago howlgalka ciidamada maamulka gobollka Hiiraan ay ka wadaan xaafaddaha magaalada Baladweyne, dhinaca waxaa soconaya kulamo kula duwan oo ay leeyihiin mas'uuliyiinta maamulka gobollka, saraakiisha ciidamada Jabuuti iyo odayaasha beellaha dega gobollka Hiiraan kuwaasoo qeyb ka ah dadaal ballaaran oo maamulka iyo saraakiisha AMISOM ugu jiraan 22 sano kadib in bulshadu kaalin ku yeellato sugida amniga.

5/21/2013 7:01 AM EST
Talaado, May 21, 2013 (HOL) — Gudoomiyaha Golaha Wakiiladda C/raxmaan Maxamed Cabdilaahi Cirro, ayaa sheegay inuu madaxweynaha Soomaaliya dhaawacay qodobadii Somaliland iyo Soomaaliya ku heshiiyeen shirkii Ankara ee Turkiga.

5/21/2013 2:04 AM EST
Talaado, May 21, 2013 (HOL) — Xildhibaanno ka mid ah kuwii mooshinka ka geeyay xukuumadda Soomaaliya ayaa qaarkood sheegay inay ka laabteen go’aankaas, iyagoo xusay inay u tanaasuleen danta dalka, dadka iyo diinta Islaamka oo ay u dhaarteen inay ilaalinayaan.