7/19/2019
Today from Hiiraan Online:  _
Wararka Maanta- Arbaco, May 15, 2013
Dagaallo khasaare kala duwan geystay oo Ciidamada Dowladda iyo Al-shabaab ku dhexmaray Gobolka Gedo


Arbaco, May 15, 2013 (HOL) — Ugu yaraan lix qof oo dhinacyadii dagaalamay ka tirsan ayaa ku dhintay dagaal culus oo ciidamada dowladda Soomaaliya iyo Al-shabaab ku dhexmaray gobolka Gedo tiro intaas ka badanna way ku dhaawacmeen.

Dagaalkan ayaa qarxay markii xoogag taabacsan Al-shabaab ay weerar ku qaadeen gaadiid ay wateen ciidammo iyo saraakiil ka tirsan kuwa dowladda Soomaaliya oo kasoo ambabaxay degmada Balad-xaawo kuna socda degmada Garbahaarey ee xarunta gobolka Gedo.

Inkastoo aan si dhab ah loo ogeyn khasaaraha rasmiga ah ee dagaalka ka dhashay ayaa haddana wararka laga helayo gobolka Gedo waxay sheegayaan in dagaalku uu billowday shalay gellinkii dambe uuna socday illaa xalay fiidkii.

Guddoomiyaha gobolka Gedo, Maxamed Cabdi Kaliil oo saxaafaddu ay wax ka weydiisay dagaalka iyo khasaaraha ka dhashay ayaa ka gaabsaday inuu ka hadlo, isagoo sheegay in weli ay jirto xiisad wax tira-koob ahna uusan hayn.

Al-shabaab ayaan iyaduna ka hadlin dagaalka, waxaana wararka laga helayo deegaannadii lagu dagaalamay ay sheegayaan inay weli xiisad weyn ka jirto jidka isku xira degmooyinka Baladxaawo iyo Garbahaarey.

Dagaalkan ayaa qayb ka noqonaya dagaallada gobolka Gedo ku dhexmara xoogagga Al-shabaab iyo ciidamada dowladda Soomaaliya, iyadoo dhinac walba uu isku dayayo inuu la wareego gacan ku haynta gobolka oo dhan.

Maxamed Xaaji Xuseen, Hiiraan Online
[email protected]
Muqdisho, Soomaaliya











Click here
5/15/2013 2:59 PM EST
Arbaco, May 15, 2013 (HOL) — In ka badan 90-xildhibaan oo ka tirsan baarlamaanka Soomaaliya ayaa u gudbiyay mooshin ka dhan ah xukuumadda Soomaaliya, kaasoo ay ku sheegeen in ra'iisul wasaare Saacid iyo xukuumaddiisa ay kalsooni weydiisato golaha baarlamaanka Soomaaliya.

5/15/2013 2:57 PM EST
Arbaco, May 15, 2013 (HOL) — Madaxweynaha Soomaaliya, Xasan Sheekh Maxamuud ayaa maanta wuxuu soo dhaweyay Midowga Yurub oo tababarkii ciidamada ka billaabay gudaha Soomaaliya, isagaoo ku tilmaamay inay xoojinayso ciidammo ay yeelato Soomaaliya.

5/15/2013 10:46 AM EST
Arbaco, 15 May, 2013(HOL) :- Waxaa maanta xarunta Jaamacadda Kismaayo ka dhacday doorashada madaxweeynenimo ee maamul goboleedka Jubbaland, waxaana doorashadani ku tartamayay ku dhawaad ilaa 3 Musharax oo u taagnaa xilka Madaxweeynenimo ee dowlad goboleedka Jubbaland.

5/15/2013 8:44 AM EST
Arbaco, 15 May, 2013(HOL) :- Waxaa goordhawayd lasoo gabagabeeyay doorashada madaxweeynaha dowlad goboleedka Jubbaland, iyadoona xilka madaxtinimo ee dowlad goboleedka uu ku guuleeystay gudoomiyii KMG ahaa degmada Kismaayo Sheekh Axmed Max’ed Islaam (Axmed Madoobe)

5/15/2013 7:04 AM EST
Arbaco, May 15, 2013 (HOL) — Kooxo hubeysan oo burcad ah ayaa gudaha u galay xarunta shirkadda Dahabshiil ee Muqdisho, iyadoo ay ku gadaaman yihiin ciidamada dowladda oo goobtaas soo gaaray markii ay kooxdan gudaha u galeen xarunta.

5/15/2013 5:26 AM EST
Arbaco, May 15, 2013(HOL) :- Ra’isul wasaaraha xukuumadda federaalka Soomaaliya Mudane Cabdi Faarax Shirdoon (Saacid) ayaa magacaabay guddi ka kooban ilaa 16 xubnood oo ka kala tirsan labada gole ee dowladda, kuwaasoo kasoo shaqeyn doona arimaha Jubooyinka iyo weliba sidii xal waara looga gaari lahaa.

5/15/2013 4:54 AM EST
Arbaco, May 15, 2013(HOL) :- Masuuliyiin kasoo jeeda Jubooyinka ayaa maalintii labaad ku xayiran garoonka diyaaradaha magaalada Kismaayo, iyadoona masuuliyiintani uu hogaaminayo siyaasi lagu magacaabo Max’ed Amiin oo kasoo jeeda Jubooyinka.