3/29/2024
Today from Hiiraan Online:  _
Wararka Maanta- Talaado, Mar 26, 2013
Ra’iisul Wasaaraha Soomaaliya iyo Wafdi uu Hoggaaminayo oo u Ambabaxay Kismaayo iyo Ammaanka oo aad loo Adkeeyay

Talaado, Maarso 26, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) iyo wafdi uu hoggaaminayo ayaa u amababaxay maanta magaalada Kismaayo ee xarunta gobolka Jubbada Hoose kaddib markii uu baaqday safar uu shalay ku tegi lahaa degmadaas.

Ammaanka magaalada Kismaayo ayaa aad loo adkeeyay waxaana wariyaha HOL ee Kismaayo, Xasan Nuur Maxamed uu soo sheegay aroornimadii hore ee saaka in la jaray dhammaan isgaarsiinta degmadaas, laguna soo rogay bandow magaalada oo dhan.

“Dhammaan iskuulladii waa la fasaxay, dadkana waxaa lagu amray inaysan guryahooda kasoo bixi kariin illaa laga gaarayo 12:00 duhurnimo,” ayuu yiri Xasan Nuur oo intaas ku daray in waddooyinka magaalada oo dhan la dhigay ciidammo ammaanka ilaaliya.

Garoonka diyaaradaha ee Kismaayo ayaa waxaa ku sugan mas’uuliyiinta kala duwan ee maamulka KMG ah ee Kismaayo iyo saraakiisha AMISOM, iyadoo sidoo kale ay joogaan magaaladaas wariyeyaal kala duwna si ay u tabiyaan wararka ku saabsan socdaalka ra’iisul wasaaraha.

Socdaalka ra’iisul wasaaraha ayaa salka ku haya sidii lagu dhameyn lahaa khilaafaadka u dhexeeya dowladda Soomaaliya iyo maamulka Raas-kambooni oo ku saabsan maamul u sameynta gobollada Jubbooyinka.

Ra’iisul wasaaraha ayaa lagu wadaa inuu kulammo la qaato mas’uuliyiinta maamulka gobolka markii uu halkaas tago, isagoo sidoo kale goobjoog ka noqon doona furitaanka shirka maamul u sameynta Jubbooyinka.

Maamulka Jubaland ayaa wuxuu kulminayaa gobollada Jubbooyinka iyo Gedo, waxaa howsha maamul u sameyntay wadday IGAD iyo dowladda Kenya taasoo ka careysiisay dowladda Soomaaliya, inkastoo arrintu ay u muuqato in xal laga gaaray.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
3/26/2013 2:35 PM EST
Talaado, Maarso 26, 2013 (HOL) — Madaxweynaha Soomaaliya, Xasan Sheekh Maxamuud iyo wafdigii uu hoggaaminayay ayaa maanta ka qeyb-galay furitaanka shirka ururka Jaamacadda Carabta oo ka furmay magaalada Doxa ee dalka Qatar.

3/26/2013 2:16 PM EST
Talaado, Maarso 26, 2013 (HOL) — Munaasabad looga hadlay imtixaanaadka shahaadiga ah ee dugsiyada sare iyo kuwa dhexe ee maamulka Khaatumo ayaa lagu qabatay magaalada Buuhoodle ee gogolka Cayn, iyadoo halkaas laga sheegay inaanay dhici doonin imtixaanno maamullo kale wadaan in laga qaado ardayda qalin-jebinta u diyaarsan.

3/26/2013 1:28 PM EST
Talaado, Maarso 26, 2013 (HOL) — Hay’adda sirdoonka dalka Itoobiya ayaa Isniintii shalay sheegtay inay xirtay sideed xubnood oo ka tirsan Xarakada Al-shabaab ee ka dagaalanta Soomaaliya, kuwaasoo doonayay inay afduubaan shaqaale ka tirsan hay’adaha Qaramada Midoobay.

3/26/2013 12:59 PM EST
Talaado, Maarso 26, 2013 (HOL) — Ugu yaraan sagaal qof ayaa ku dhintay in ka badan labaatameeyo kalena way ku dhaawacmeen kaddib roobab xoog leh oo ka da’ay dalka jamhuuriyadda Jabuuti, halkaasoo ay sannadihii lasoo dhaafay ka di’in wax roobab ah.

3/26/2013 12:22 PM EST
Talaado, Maarso 26, 2013 (HOL) — Wafdi ballaaran oo uu horkacayey ergeyga dowladda Maraykanka u qaabilsan arimaha Soomaaliya James Swan, ayaa maanta soo gaarey magaalada Garoowe ee xarunta maamulka Putland.

3/26/2013 9:41 AM EST
Talaado, Maarso 26, 2013 (HOL) — Waxaa maanta la dhaariyay maamulka gobalka Bay iyo kan degmada , kaddib markii la xaliyay khillafkii taagnaa ee qaar ka mid ah xildhibaannadii joogay magaalada Baydhabo ay isku haysteen, iyadoo la magacaabay guddoomiye ku xigeenkii gobalka Bay, kaas oo loo magacaabay, Shiine Macalin Nuurow, iyadoo isla markaasna loo dhaariyay.

3/26/2013 9:12 AM EST
Talaado, 26 Maarso, 2013(HOL) :- Waxaa maanta magaalada Kismaayo soo gaaray wafdi uu horkacayay ra’isul wasaaraha dowladda federaalka Soomaaliya Mudane Cabdi Faarax Shirdoon (Saacid), iyadoona ra'isul wasaaruhu ay safarkiisa ku wehlinayeen masuuliyiin uu kamid yahay wasiirka warfaafinta Mudane C/laahi Ciilmooge Xirsi.

3/26/2013 8:50 AM EST
Talaado, Maarso 26, 2013 (HOL) — Wasiir u dowlihii wasaaradda horumarinta iyo adeegga bulshada, Maxamuud Ismaaciil Barkhad ayaa si lama filaan ah maanta ugu geeriyooday magaalada Nairobi ee xarunta dalka Kenya, iyadoo aan la sheegin qaabka uu u dhintay.

3/26/2013 8:11 AM EST
Talaado, Maarso 26, 2013 (HOL) —Wasiirka wasaarrada Kheyaaradka dalka ee xukuumada Soomaaliya C/risaaq Cumar Maxamed iyo wafdi uu horkacayo oo ka socday wasaarrada caafimaadka ayaa maanta tagay magaalada Baladweyne ee xarunta gobollka Hiiraan.

3/26/2013 7:24 AM EST
Talaado, Maarso 26, 2013 (HOL) — Wali waxaa si is daba jooga ah u socnaya gurmadka caafimaad ee loo fidinayo dadka uu soo ritay cudurka shuba-biyoodka ee magaalada Baladweyne kuwaa oo tiradoodo sii korartay.

3/26/2013 7:18 AM EST
Talaado, Maarso 26, 2013 (HOL) — Guddoomiyaha gobollka Hiiraan C/fitaax Xassan Afrax oo dib ugu laabtay galinkii danbe ee maalintii shalay magaalada Baladweyn kadib booqasho dhowr todobaad qaadatay oo uu ku tagay magaalada Muqdisho.

3/26/2013 2:10 AM EST
Talaado, Maarso 26, 2013 (HOL) — Ugu yaraan laba askari ayaa ku dhintay saddex kalena way ku dhaawacmeen dagaal culus oo ciidamada kawada tirsan dowladda Soomaaliya ku dhexmaray degmada Marko ee xarunta gobolka Shabeellada Hoose.

3/26/2013 2:07 AM EST
Talaado, Maarso 26, 2013 (HOL) — Madaxweynaha Soomaaliya, Xassan Sh. Maxamuud iyo wafdi uu hoggaaminayo ayaa gaaray magaalada Dooxa ee dalka Qatar, halkaasoo uu maanta ka shirka dalalka Jaamacadda Carabta, kaasoo lagu soo qaadi doono arrimaha Soomaaliya.