3/28/2024
Today from Hiiraan Online:  _
Wararka Maanta- Khamiis, Mar 21, 2013
Iskahorimaad khasaare geystay oo Kooxo hubeysan ku Dhexmaray Koonfurta Magaalada Gaalkacyo ee Gobolka Mudug


Khamiis, Maarso 21, 2013 (HOL) — Ugu yaraan laba qof ayaa ku dhintay afar kalena way ku dhaawacmeen iskahorimaad kooxo hubeysan xalay ku dhexmaray koonfurta magaalada Gaalkacyo ee xarunta gobolka Mudug.

Taliyaha booliiska magaalada Gaalkacyo ee maamulka Galmudug, Cabdi Xasan Qooreey ayaa sheegay inaysan garanayn sababta keentay dagaalka dhexmaray labada kooxood, balse ay wadaan baaritaanno ay ku raadinayaan kooxihii iskahorimaadku dhexmaray.

“Dagaalku wuxuu dhacay xalay 10:30 habeenimo, waxaana labada qof ee ku dhintay iyo afarta dhaawacmay ay ka mid ahaayeen dhinacyadii dagaalamay,” ayuu yiri Qooreey oo sheegay in falkan uu kusoo beegmay xilli magaaladu ay deggenayd bilhii lasoo dhaafay.

Maleeshiyada dagaalantay ayaan la ogeyn cid ay ka amarqaataan iyo sababta keentay iskahorimaadkooda, iyadoo dadka deegaanku ay sheegeen in dhinacyadu ay isku adeegsadeen hub kala duwan oo u badan midka fudud.

“Aad ayaan u baqnay xalay, waayo dagaalku wuxuu ahaa mid aad u daran oo muddo socday, dhinacyadu waxay isku adeegsanayeen qoryaha culus iyo kuwa fudud, balse ma maqal rayid uu khasaare soo gaaray,” ayuu yiri mid ka mid ah dadka ku nool Koonfurta Gaalkacyo.

Degmada Gaalkacyo ayaa waxay u qaybsan tahay laba dhinac, iyadoo ay ka kala taliyaan maamulka Galmudug iyo Puntland, iyado goobtii uu xalay ka dhacay iskahorimaadka uu ku yaallo dugsi sare.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
3/21/2013 3:22 PM EST
Khamiis, Maarso 21, 2013 (HOL) — Hal qof ayaa ku dhintay, saddex qof oo uu ku jiray sarkaal ka tirsan ciidamada dowladda ayaa ku dhaawacmay qarax ismiidaamin ah oo ka dhacay gudaha suuqa Bakaaraha, kaasoo lagu bartilmaameedsanayay ciidammo ka tirsan kuwa dowladda Soomaaliya.

3/21/2013 2:26 PM EST
Khamiis, Maarso 21, 2013 (HOL) — Taliyaha ciidamada Midowga Afrika ee AMISOM, Jen. Andrew Gutti ayaa maanta shaaca ka qaaday in ciidamadooda ay isku diyaarinayaan sidii ay ula wareegi lahaayene goobihii ay Itoobiya kala baxday ciidamadeeda.

3/21/2013 1:45 PM EST
Khamiis, Maarso 21, 2013 (HOL) — Golaha wasiiradda Soomaaliya ayaa maanta isugu yimid shirkoodii joogtada ahaa, kaasoo uu guddoominayay ra’iisul wasaaraha, Cabdi Faarax Shirdoon (Saacid), iyadoo looga hadlay qodobbo dhawr ah oo ay ka mid ahaayeen qorshe loogu magac-daray “The New Deal”, arrimaha amniga iyo soo celinta hantidii dowladda, gaar ahaana warshaddihii dalka.

3/21/2013 1:16 PM EST
Khamiis, Maarso 21, 2013 (HOL) — Madaxweynaha Soomaaliya, Xasan Sheekh Maxamuud ayaa maanta kormeer howleed ku tagay dekedda weyn ee magaalada, waxaana kormeerkan ku wehlinayay xubno dowladda ka tirsan, wuxuuna socod ku maray bakhaarada dekedda iyo goobaha kale oo ay ka kooban tahay dekedda.

3/21/2013 11:12 AM EST
Khamiis, 21 Maarso, 2013(HOL):- Laba askari ayaa ku dhimatay mid kalena waxaa kasoo gaaray dhaawac kadib markii ay israsaaseyn dhexmartay askar kawada tirsan ciidamada dowladda Soomaaliya ee magaalada Kismaayo.

3/21/2013 10:48 AM EST
Khamiis, 21 Maarso, 2013(HOL) - Wafdi uu hogaaminayo ra’isul wasaaraha dowladda federaalka Soomaaliya Mudane Cabdi faarax Shirdoon Saacid ayaa la filayaa in uu dhawaan soo gaaro magaalada Kismaayo ee xarunta Gobolka J/hoose sida ay warbaahinta u xaqiijiyeen xubno ka tirsan masuuliyiinta shirka maamul u sameynta Jubooyinka.

3/21/2013 9:56 AM EST
Khamiis, 21 Maarso, 2013(HOL) - Gudiga isboortiga gobolka J/hoose oo maanta shir jara’aid ku qabtay xafiiskooda magaalada Kismaayo ayaa u mahadceliyay shaqsiyaad ay sheegeen in ay gacan weyn ka geysteen sidii dib loogu dhisi lahaa Isboortiga gobolka J/hoose.

3/21/2013 8:26 AM EST
Khamiis, Maarso 21, 2013 (HOL) — Afar ka mid ah ciidamada xoogga dalka ayaa siyaabo kala duwan loogu dilay degmada Dayniile ee gobolka Banaadir, gaar ahaan xaafadaha ku teedsan jidka warshadaha.

3/21/2013 8:09 AM EST
Khamiis, Maarso 21, 2013 (HOL) — Magaalooyinka Somaliland ayaa maanta laga xusay maalinta biyaha aduunka oo si weyn loogu dabaaldegay qiimaha ay leeyihiin biyuhu.

3/21/2013 7:51 AM EST
Khamiis, Maarso 21, 2013 (HOL) — Madaxweynaha Soomaaliya, Xasan Sheekh Maxamuud ayaa kulan ku saabsan Xuquuqda Aadanaha kula yeeshay maanta xarunta madaxtooyada khabiir Qaramada Midoobay u qaabilsan dhinaca xuquuqda aadanaha, Shamsul Baari.

3/21/2013 2:53 AM EST
Khamiis, Maarso 21, 2013 (HOL) — Ururka Midowga Yurub ayaa lacag dhan 43-milyan oo doollar ugu deeqay ciidamada Midowga Afrika ee AMISOM ee ka howgala Soomaaliya, waxaana gargaarkan lagu dhawaaqay Talaadadii lasoo dhaafay ee bishan Maarso ay ahayd 19-ka.

3/21/2013 2:30 AM EST
Khamiis, Maarso 21, 2013 (HOL) — Waaxda arrimaha dibadda Mareykayka ayaa soo saartay warbixin lacago lagu dul dhigay madaxa laba ruux oo u dhashay dalka Mareykanka oo ka barbar dagaalama Al-shabaab oo xiriir la leh Al-Qaacida.