3/28/2024
Today from Hiiraan Online:  _
Wararka Maanta- Axad, Mar 17, 2013
Wariye C/casiis Cabdinuu (Koronto) oo Maanta Xorriyadiisii dib u helay

Axad, 17 Maarso, 2013(HOL):- Wariye C/casiis C/nuur Ibraahim (Koronto) ayaa maanta xoriyadiisii dib u helay,  kadib markii ku dhawaad sedex bilood ah uu ku xirnaa xabsiga dhexe gobolka Banaadir.

Abdiaziz Koronto.jpg
Wariye C/casiis Koronto ayaa lagu eedeeyay in uu faafiyay warbixin ay saraakiisha ciidamadu sheegeen in ay ahayd mid been abuur ah, taasoo ahayd haweeney sheegtay in ay kufsadeen rag ku labisnaa dareeska ciidamada Booliska Soomaaliyeed.

Gudoomiyaha maxkamadda Sare ee dowladda Soomaaliya Caydiid C/laahi Ilkaxanaf ayaa sheegay in baaritaanno ay sameeyeen ay u cadaatay in wariye Koronto uusan lahayd wax danbi ah sidaas daraadeedna ay maxkamaddu fasaxday.

Kadib markii ay maxkamaddu fasaxday wariye Koronto ayuu saxaafadda kula hadlay ilinka hore ee maxkamadda, wuxuuna sheegay in uu aad ugu faraxsanyahay in uu dib u helo xoriyadiisa.

Wariyahany ayay horaantii bishii Febraayo ee sanadkan maxkamaddu ku xukuntay xabsi mudo hal Sano ah, haseyeeshee xukunkaasi ayaa waxaa si kulul u cambaareeyay ururka saxafiyiinta qaranka Soomaaliyeed, ururrada caalamiga ah ee u doodda xuquuqda saxaafadda iyo kuwa xuquuqul insaanka, waxaana xukunkaasi racfaan ka qaatay qareenkii u doodayay wariye C/casiis Koronto.

3-dii bishan aynu ku jirno ee Maarso ayay Maxkamadda Racfaanka gobolka Banaadir dib u dhageysatay dacwada arinta la xiriirto kufsiga haweeneyda, waxaana dood dheer kadib ay maxkamaddu xukunkii ka qafiifisay wariye Koronto, iyadoona ku xukuntay mudo lix bilood ah, waxayna sidoo kale Maxkamaddu cafis u fidisay haweeneydii sheegtay in la kufsaday oo iyaduna hore ugu xukunayd hal sano oo xabsi ah.

Arintan la xiriirto haweeneyda la kufsaday  ayaa mudooyinkii ugu danbeeyay ahayd mid siweyn looga hadal hayo dalka gudihiisa iyo dibadiisaba, iyadoona saraakiil ka tirsan dowladda Soomaaliya oo uu ka mid yahay taliyaha ciidamada Booliska Soomaaliyeed Shariif Sheekhunaa Maye ay sheegeen in arinta haweeneyda sheegatay in la kufsaday ay  ahayd mid been abuur ah oo la doonayay in lagu bahdilo sumcadda booliska Soomaaliyeed, waa siday hadalka u dhigeena.

Amarka maxkamadda sare ee dalka ay kusii deysay wariye C/casiis Koronto ayaa waxa si diiran usoo dhaweeyay guud ahaan saxafiyiinta Soomaaliyeed gaar ahaan kuwa ku dhaqan gobolka Banaadir oo iyagu dadaal dheer u galay sidii wariye C/casiis koronto uu dib ugu heli lahaa xoriyadiisa.

Xasan Nuur, Hiiraan Online
[email protected]
Kismaayo-Soomaaliya.













Click here
3/17/2013 5:19 PM EST
Axad, March 17, 2013(HOL)—Wararka naga soo gaaraya magaalada Baydhabo ee xarunta u ah Gobolka Bay ayaa waxay sheegayaan in caawa uu dagaal ka dhacay deegaanka Awdiinle oo 30km u jirta magaalada Baydhabo, wuxuuna warku intaas ku darayaa in dagaalku uu ahaa mid aad u culus.

3/17/2013 1:53 PM EST
Axad, Maarso 17, 2013 (HOL) — Ra’iisal wasaaraha Xukuumada Soomaaliya, Cabdi Faarax Shir-doon (Saacid) ayaa si diirran u soo dhaweeyey sii daynta weriye Cabdicasiis Cabdinuur Ibraahim (Koronto) oo muddo 65 maalmood ah ku xirnaa xabsiga dhexe ee Muqdisho.

3/17/2013 1:42 PM EST
Axad, Maarso 17, 2013 (HOL) — Madaxweynaha Dowladda Soomaaliya, Xasan Sheekh Maxamuud ayaa soo dhaweeyay maanta oo Axad ah magacaabista ra’iisul wasaaraha cusub ee dalka Shiinaha, Li Keqiang isagoo u rajeeyay in si sharciga dalkaas waafaqsan uu u guto xilkiisa.

3/17/2013 1:21 PM EST
Axad, Maarso 17, 2013 (HOL) — Kooxo hubeysan ayaa maanta laba qof oo uu ku jiray mid ka mid ah ciidamada taraafikada Muqdisho ku toogtay xaafado ka tirsan magaalada Muqdisho, kuwaasoo ay u suurogashay inay si fudud uga baxsadaan goobihiii ay dilalka la geysteen.

3/17/2013 12:41 PM EST
Axad, Maarso 17, 2013 (HOL) — Xoogagga Al-shabaab ayaa maanta dib ugu laabtay degmada Xudur ee xarunta gobolka Bakool, kaddib markii ay isaga baxeen ciidamadii Itoobiya iyo kuwii dowladda Soomaaliya oo muddo hal sano ah gacanta ku hayay.

3/17/2013 11:53 AM EST
Axad, Maarso 17, 2013 (HOL) — Xisbiyadda mucaaradka iyo dadweynaha ayaa aragtiyo kala duwan ka bixiyey qaadacadii uu madaxweynaha Somaliland qaadacay shirka Bisha may ka dhici doona magaaladda London oo uu sheegay inay tahay shir loo qabanayo Soomaaliya.

3/17/2013 11:51 AM EST
Axad, Maarso 17, 2013 (HOL) — Madaxweynaha dawlad Deegaanka Soomaalida Itoobiya Mudane: Cabdi Maxamed Cumar, ayaa booqasho ku maraya deegaano ay baryahan dambe dirir colaadeed ka taagnayd ee deegaanka Xarshimeed ee gobolka jigjiga ee dalka Itoobiya.

3/17/2013 11:48 AM EST
Axad, Maarso 17, 2013 (HOL) — Dr. Cali C/raxmaan Xirsi oo ahaa xubin firficoon oo ka tirsan sagaalka xubnood ee guddiga kumeel gaarka ah ee doorashooyinka Puntalnd ayaa shaaciyey in uu xilkaas iska casiley.

3/17/2013 11:46 AM EST
Axad, Maarso 17, 2013 (HOL) — Iyadoo ay dhowaan wasaaradda war-faafinta ee Puntland soo saartay amar deegaanada Puntland looga mamnuucayo idaacadaha aan xarumaha ku lahayn Puntland, balse bah-wadaagta la ah ee ka dhex hadla Idaacadaha maxalliga ah ee ka howlgala deegaanada Puntland, ayaa waxaa arintaas markii ugu horeysey faah faahin ka bixiyey wasiirka Wasaaradda Maxamuud Caydiid Dirir.

3/17/2013 11:43 AM EST
Axad, Maarso 17, 2013 (HOL) — Wasiirkii hore ee wasaaradda qorsheynta iyo xiriirka caalamiga ah ee Putland Mudane Daa'uud Maxamed Cumar oo dhowaan xilkaas iska casiley ayaa munaasabad maanta ka dhacday magaalada Garoowe si rasmi ah xilka ugu wareejiyey.

3/17/2013 7:42 AM EST
Axad, 17 Maarso, 2013(HOL) - Ciidamada dowladda Soomaaliya kuwa Itoobiya ayaa lagu soo waramayaa in ay gabi ahaanba isaga baxeen magaalada Xudur ee xarunta gobolka Bakool, iyadoona daafaha magaaladaasi ay soo buuxdhaafiyeen cutubyo ka tirsan dagaalyahannada Al-shabaab.

3/17/2013 2:29 AM EST
Axad, Maarso 17, 2013 (HOL) — Labadii cisho ee la soo dhaafay 17 ruux oo isugu jira curuur iyo dad da’ah ah ayaa ugu geeriyooday magaalada Baladweyne wax u eg daacuun laakiin aysan si rasmi ah wali dhaqaatirtu ugu dhawaaqin.

3/17/2013 2:16 AM EST
Axad, Maarso 17, 2013 (HOL) — Magaalada Baydhabo ee xarunta gobolka bay ayaa waxaa shalay booqasho ku tagay xidhibaannadii ugu tirada badnaa tan iyo markii ay dowladdii KMG ahayd kasoo guurtay degmadasa sannadkii 2008, iyadoo xildhibaannada ay la kulmi doonaan waxgaradka, maamulka iyo shacabka ku nool gobolka Bay.

3/17/2013 2:07 AM EST
Axad, Maarso 17, 2013 (HOL) — Ugu yaraan toddoba qof oo isugu jira ilmo iyo dad waaweyn ayaa ku dhaawacmay degmada Xamar-jajab ee gobolka Banaadir kaddib markii ay weerar ku qaadeen eeyo xanuunsan.