11/14/2019
Today from Hiiraan Online:  _
Wararka Maanta- Jimco, Jun 21, 2013
Guddoomiyaha Baarlamanka Soomaaliya oo Xarunta Golaha Shacabka kula kumay Ururrada Dhallinyaro Soomaaliyeed



Jimco, Juun 21, 2013 (HOL) — Guddoomiyaha baarlamaanka Somalia, Maxamed Sheekh Cismaan (Jawaari) ayaa maanta kulan la yeeshay qaar ka mid ah ururrada dhallinyarada Soomaaliyeed, isagoo ku boorriyay inay ka qayb-qaataan horumarinta dalka iyo sugidda ammaanka.

Kulankan oo ka dhacay xarunta golaha shacabka Soomaaliyeed ayaa waxaa kasoo qaybgalay 300 oo dhallinyaro ah, iyadoo la isku dhaafsanayay fikrado ku saabsan dastuurka dalka iyo sidii dhallinyaradu qaybtooda uga qaadan lahaayeen mustaqbalka dalka.

“Waxaan jecel nahay inaan dhageysanno afkaartiinna, waxaadna ogaataan in dalka aad idinka leedihiin, maantana muraadkeennu wuxuu yahay inaad noqotaan dhallinyaradii aan burrito isha u dhiibi lahayn. Waxaana idinka ka codsanayaa inaad sheegataan waxyaabaha aad u baahan tihiin innaguna diyaar ayaan u nahay inaan idinka saacidno,” ayuu yiri Jawaari oo ka hadlayay kulankan.

Dhallinyaradii kulanka kasoo qaybgalay oo goobta ka hadlay ayaa qaarkood waxay sheegeen in dowladda Soomaaliya ay uga baahan yihiin in marka hore ay sugto ammaankooda. Iyagoo sheegay in tan kale ee ay doonayaan in waxbarashada la kobciyo, si loo helo dhallinyaro waxbartay oo maamulka la wareega.

“Guddoomiye dhalinyarada halkan isugu timid waa kuwa la doonayo in dalka ay hoggaamiyaan, waxana ka codsanaynaa dowladda inay mideyso ururrada dhalliyarada Soomaaliyeed, si loo helo hoggaan mideysan oo dhalinyarada ay leeyihiin,” ayuu yiri mid ka mid ah dhallinyaradii kulankaas ka qaybgalay.

Fikradaha dhalinyarada kaddib ayaa waxaa hadlay Mudane Jawaari isagoo ku boorriyay dhallinyaradii kulankaas kasoo qaybgalay inay muujiyaan isku-duubni ayna qayb ka qaataan dhismaha iyo horumarinta dalkooda.

“Midda labaad ee aan doonayo inaan idiin caddeeyo waa inaad maan-dooriyaha la dagaalantaan, waayo qofkii maan-dooriye barta aad ayay u adag tahay inuu iska daayo, waxaan idinku boorrinayaa inaad dhallinyarada kale ee maan-dooriyaha isticmaala aad ka joojisaan si mustaqbalkooda uu u hagaago,” ayuu guddoomiyuhu hadalkiisu ku daray.

Sidoo kale, wuxuu guddoomiyuhu kula dardaarmay dhallinyarada inay bartaan dhaqanka Soomaaliyeed ayna ku faanaan inay Soomaali yihiin, taas oo uu sheegay inay tahay midda keliya ee ay kaga muuqan karaan dunida inteeda kale.

Ugu dambeyn, guddoomiyaha baarlamaanka wuxuu sheegay in la dhisayo gole cusub oo lagu magacaabo golaha dhallinyarada baarlamanaka Somalia, kuwaasoo si toos ah ula shaqeyn doona xildhibaannada baarlamaanka Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
6/21/2013 10:12 AM EST
Jimco, June 21, 2013(HOL)—Shirweynihii Dallada Caalmiga ah ee u Dooda Xoriyatul Qowlka ee loo yaqaano International Freedom of Express Exchange (IFEX) ayaa lagu soo gunaanaday Dalka Cambodia, gaar ahaan magaalada Koofur bari Asia ee Phnom Penh.

6/21/2013 6:56 AM EST
Jimco, Juun 21, 2013 (HOL) — Madaxweynaha cusub ee maamulka Ximan iyo Xeeb iyo ku xigeenkiisa oo dhawaan loo doortay xilalkaas ayaa lagu caleemo saaray maanta oo Jimco ah magaalada Cadaado ee gobolka Gal-guduud oo xarun u ah maamulkaas.

6/21/2013 5:01 AM EST
Jimco, Juun 21, 2013 (HOL) — Guddoomiyaha baarlamanaka Soomaaliya, Prof. Maxamed Cismaan (Jawaari) iyo ra’iisul wasaaraha Soomaaliya, Cabdi Faarax Shirdoon (Saacid) ayaa tacsi u diray ehelladii uu ka geeriyooday Prof. Maxamed Faarax Jimcaale oo ka mid ahaa xildhibaannada baarlamaanka Soomaaliya.

6/21/2013 4:49 AM EST
Jimco, Juun 21, 2013 (HOL) — Shirkii baarlamaanka Carabta oo magaalada Qaahira ee xarunta dalka Masar lagu soo gabagabeeyay ayaa go’aannadii lagu gaaray waxaa ka mid ahaa in dowladda Soomaaliya laga taageero dhinaca dib u dhiska.

6/21/2013 4:38 AM EST
Jimco, Juun 21, 2013 (HOL) — Inkastoo beesha caalamka ay rajo weyn ka qabtay in Soomaaliya ay nabad la isku halleyn karo ka dhalato, haddana weerarradii ay Arbacadii ku qaadday Al-shabaab xarunta weyn ee Qaramada Midoobay ay ku leedahay Muqdisho ayaa muujinaysa in ammaanka Somalia uusan ahayn mid xilligan wanaagsan, Al-shabaab ayna awood u leedahay in ay weerarto goobaha muhiimka ah.

6/21/2013 1:24 AM EST
Guddoomiyaha Gobolka Banaadir ayaa wuxuu ka warbixiyey qaraxii la beegsaday xerada UNDP ay ka deggen yihiin magaalada Muqdisho. Waxaa wareystay Ibraahim C. Baafo.