11/13/2019
Today from Hiiraan Online:  _
Wararka Maanta- Khamiis, Jun 20, 2013
Golaha Wasiiradda Xukuumadda Somalia oo Maanta ku ansixiyey Shirkoodii Danjirayaal cusub oo la Magacaabay



Khamiis, Juun 20, 2013 (HOL) — Golaha Wasiirrada Xukuumadda Somalia oo maanta yeeshay kulan uu shir-guddoominayay ra’iisul wasaare Cabdi faarax Shirdoon (Saacid) ayaa ayaa lagu ansixiyay magcaabista shan safiir oo cusub.

Danjirayaasha la ansxiyay ayaa waxay kala yihiin: Jen. Muuse Xasan Cabdulle oo loo magacaabay daniraha Soomaaliya ee dalka Talyaaniga,  Axmed Cabdisalaam Xaaji Aadan oo loo magacaabay danjiraha Soomaaliya ee dalka Itoobiya, Cali Saciid Faqi oo loo magacaabay danjiraha Soomaaliya ee dalka Belgium iyo Midowga Yurub, Nuur Faarah Xirsi oo loo magacaabay danjiraha Soomaaliya ee dalka Malaysia iyo Saciid Nuur Yuusuf oo horay u ahaa danjirihii Soomaaliya ee Itoobiya oo loo wareejiyay dalka Tansaaniya.

Ra’iisul wasaaraha ayaa magcaabista safiirrada ku tilmaamay inay ka mid tahay qorshaha xukuumaddiisa ee xoojinta xiriirka dublamaasiyadeed ee Soomaaliya la leedahay caalamka.

“Tallaabadan waxay ka mid tahay qorshaha xukuumadda ee lagu adkaynayo xiriirka dublamaasiyadeed ee aynu la leenahay caalamka iyo dar-dar-gelinta shaqada ergada dublamaasiyadeed ee Soomaaliya u jooga caalamka,” ayuu yiri ra’iisul wasaaruhu Saacid.

Intaas kaddib golaha wasiirrada ayaa ka dooday ammaanka dalka, waxyana warbixin laga dhegeystay wasiirka arrimaha gudaha iyo amniga Qaranka, Cabdikariim Xuseen Guuleed, iyadoo wasiirku sharraxaad ka bixiyay weerar ay shalay A-shabaab ku qaadday dhismihii hay’adda UNDP ee Muqdisho, iyadoo markaas kaddib goluhu si buuxda ayuu u dhaleeceeyay falkaas.

Sidoo kale, golaha wasiirradu waxay dood ka yeesheen sidii kor logu qaadi lahaa heerka nolosha ee ciidamada Qaranka, wuxuuna goluhu boogaadiyay kaalinta ciidamada qalabka sida ee ku aaddan suggidda ammaanka dalka iyo la-dagaalanka cadawga lidka ku ah Qaranka Soomaaliya.

Goluhu wuxuu garawsaday in loo baahan yahay in sare loo qaado heerka nololeed ee ciidamada iyo qoysaskooda, iyadoo arrintaasi loo xilsaaray inay Khamiista soo socota talo ka keenan wasaaradaha kala ah arrimaha gudaha, gaashaandhiga, maaliyadda iyo horumarinta addeega bulshada.

Ugu dameyntiina, golaha ayaa ansixiyey heshiishka “Coutonu” oo ay Somalia dhawaan saxiixday, waxaana qorshuhu yahay in xukuumaddu ay dhawaan heshiishkan u gudbiso baarlamanka federaalka Soomaaliya si uu u ansixiyo.

Heshiishka Coutonu ayaa fursad u siiya dalalka saboolka ah ee dunida oo ay ka mid tahay Soomaaliya inay helaan deeqo toos ah iyo in laga dhaafo gabi ahaan lacagaha casnhuuraha ah ee ku waajibay.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
6/20/2013 3:41 PM EST
Khamiis, Juun 20, 2013 (HOL) — Xildhibaan Maxamed Faarax Jimcaale oo ka mid ahaa mudanayaasha baarlamaanka federaalka Soomaaliya ayaa maanta ku geeriyooday isbitaalka Madiina ee magaalada Muqdisho, kaddib uu muddo ku xanuunsanayay halkaas.

6/20/2013 11:18 AM EST
Khamiis, Juun 20, 2013 (HOL) — Madaxweynaha Soomaaliya, Xasan Sheekh Maxamud oo ka qaybgalay xafladdii xiritaanka shirweynaha Qaran ee dib-u-habeynta waxbarashada dalka oo saddex maalmood socday ayaa shegeay in waxbarashadu ay tahay mid ahmiyad gaar ah u leh Shacabka Soomaaliyeed.

6/20/2013 11:14 AM EST
Khamiis, Juun 20, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa wareegto uu maanta kasoo saaray xafiiskiisa ku magcaabay guddi heer Qaran oo u xirsaaray qabanqaabada xusaska maalmaha xorriyadda Soomaaliyya ee 26-ka Juun iyo 01-da Luuliyo.

6/20/2013 11:07 AM EST
Khamiis, June 20, 2013(HOL) - Wafdi ka socday safaarada Soomaalida ay ku leedahay dalka Kenya iyo wafdi kale oo Jubbaland ka tirsan ayaa booqday gudoomiye kuxigeenka maamulkii KMG ahaa ee Kismaayo Yaasiin Nuur Gaas (Raadeer), xilli ay xaaladiisa caafimaad si wayn uga soo raysay.

6/20/2013 8:39 AM EST
Khamiis, Juun 20, 2013 (HOL) — Ururka SYL II oo ah urur dhallinyaro ayaa ku qabtay degmada Marko ee gobolka Shabeellada Hoose munaasabad loogu magac-daray (U hiilli Askariga ha ku dhiiradee waajibkiisa”, taasoo ay qayb ka qaateen abaabulkeeda shacabka ku nool degmada Marko.

6/20/2013 8:11 AM EST
Khamiis, Juun 20, 2013 (HOL) — Tababar socon doona muddo afar casho ah ayay AMISOM maanta uga furtay Muqdisho guddiga maamulka iyo amniga baarlamaanka federaalka Soomaaliya, kaasoo lagu barayo habka dhismaha maamullada gobollada iyo sugidda ammaanka.

6/20/2013 7:57 AM EST
Khamiis, Juun 20, 2013 (HOL) — Maxkamadda dambiyada caalamiga ah ee ICC ayaa dib u dhigtay billaashada dacwaddii bani’aadamnimo ee loo haystay madaxweynaha dalka Kenya, Uhuru Kenyatta, taasoo billaaban lahayd 09-ka bisha July ee soo socota.

6/20/2013 7:23 AM EST
Khamiis, Juun 20, 2013 (HOL) —Maamulka gobolka Hiiraan ayaa si kulul u cambaareeyay weerarka maalintii shalay xoogagga Al-shabaab ku qaadeen xarunta hay'adda UNDP ee magaalada Muqdisho kaasoo sababay khasaare isugu jira dhimasho iyo dhaawac.

6/20/2013 7:16 AM EST
Khamiis, Juun 20, 2013 (HOL) — Xarakada Al-shabaab oo weerar ay dhowr qof oo shaqaale ah oo ka tirsan hay’adda UNDP iyo dad rayid ah ku dhinteen ku qaadday xarunta Hay’adaha Qaramada ee Muqdisho ayaa ku goodisay inay sii wadayso weerarrada ay la beegsanayso goobaha ay daggan yihiin hay’adaha Qaramada Midoobay ee Muqdisho ku yaalla.

6/20/2013 3:33 AM EST
Khamiis, Juun 20, 2013 (HOL) — Riwaayadan oo qabanqaabadeeda iyo maal-gelinteedaba uu lahaa ururka u dooda xuquuqda dhallinyarada ee SYAO ayaa waxaa jiliyay kooxda Qaylo-dhaan, waxaana ka qaybgalay xubno fara badan oo ka tirsan maamulka gobolka Banaadir iyo dadweyne kale.

6/20/2013 2:31 AM EST
Khamiis, Juun 20, 2013 (HOL) — Dowladda Mareykanka ayaa sheegay inuu si aad ah u cambaareynayo weerarradii ismiidaaminta iyo tooska ahaa ee shalay ay Al-shabaab la beegsatay xarunta hay’adaha Qaramada Midoobay ee Muqidsho, iyagoo ku tilmaamay weerar bahalnimo ah.

6/20/2013 2:29 AM EST
Khamiis, Juun 20, 2013 (HOL) — Qaramada Midoobay ayaa sheegay inay sii socon doonaan howlaha ay ka hayaan Soomaaliya, weerarkii shalay xarunta ay ku leeyihiin Muqdisho lala beegsadayna uusan horistaagi doonin howlaha ay dalka ka hayaan.